ايا عاد فتكم بالهدرة قمت الصباح وفيبالي نتلصص في البيت نلبس في دبشي قبل ما تفيق النافورة وتحرمني من قهوة الصباح وقعدة كل نهار سبت مع الاصحاب والاحباب ، وسبحان الله نسمع في صوت طالع يقلي:

………..

– شبيك كيف السارق وسارح على الفجاري على فين خير ان شاء الله؟

– بسم الله المانع الستار تقول من تحت بسم الله طلعتلي ، يا بنتي خارج نعمل قهوة ما بين فقت انتي والصغار ، قلت ما نحيركمش ميسالش ماهو؟

– القهوة صباح وليل ياخي! انا قايمة توة نطيبهالك والا لواش ياخي ما يشرقش عليا petit dej كيف خلق ربي ، ايا ورحمة بويا العزيز الغالي ما غناني خارجة معاك واشرب قهوتك وانا خلي نشوف الدنيا

– اما دنيا الي تشوفها ؟ ماهو قتلك قهوة مع صحابي سويعة ونجي واوكة اليوما سبت توة نجيبلك مرفة في يدي واعملهالنا بخبز الشعير

– اما شعير يرا قنباعتي تطير خلي نرتاح ، اليوم دبروا روسكم في الفطور انا هابطة مع سلوى اختي للصولد ، اللطف قريب يوفى وانا لا ريت لا سمعت وبعد petit dej وصلني للبلاد ماشي نتلاقاوا في دروج المدينة وماتبعدش باش وقت نكملوا نكلمك تجي خير ما ترصيلي في الكيران وتاكسيات بو بلاصة ونتخنق بريحة الغاز ونبقع دبشي في هاكة الكراسي الي تقول حاضرين على عامة الحرب واعطيني فلوس في يدي تعجبنيشي حاجة

– ايا اصبح لله قلو فلوس ، الصولد ودور فيه اوكي الدنيا قدامك اما يزي ما شريت وما مريت وانت صيف كامل اهو نكري لعرس فلانة اهو نشري لغرس فلتانة وتوة تقلي نشري؟

– مالا تحبني ندور كيف الباصة في عقلها شوف بعينك وموت بقلبك؟ خليلي فلوس والا هات كارطة البانكة ولا تقلي في الاحمر ولا في الازرق موش تحمار وتزراق كان كيف نقلك على حاجة

– يا بنتي يهديك راهو ادوات الصغار ودبشهم وترسيمهم ما خلالي شي وانتي تقلي صولد ، وبعد تقلي عصيدة وفاكية …

– والله ذكرتني ، فرد مرة انا هابطة هات نقضي الزڨوڨو وما لازمو على بكري وخلي نوصي على طرف حلو العادل خويا مروح بحذانا في المولد نقعدوشي بلاش كعبة حلو زادة

– انا ناقص وزيدني العادل …

– بالله شتتمتم وشتقول ما سمعتكش؟

– لا قتلك مرحبا بيه وتوة ناخذ صندوق مقروض القروان للعادل ماهو المولد منسوب للقروان عاد

– ايا نندب والا نستنى ؟ انا نقلو خويا مروح من بلاد لبلاد وهو يقلي صندوق مقروض ، اهي مدامة متع حلو هي ويا هي توة نوصيها

– صولد ومكتب وعصيدة وحلو للعادل … هذم خدمة عام كامل ما تكفيهمش موش شهرية ، ايا تعرفشي كيفاش حتى المرقة انساها حتى يوافقولنا على القرض وشلوش عظمتين وانا خارج للقهوة وسلملي على سلوى كان جاتك

(ماهو عاد خذينا الزڨوڨو وداير ان شاء الله وفي بالي حاجة ورتحنا منها ، هكك وقاتلي: )

– ايا اسمع العشية نخرجوا مع بعضنا لازمنا الفارينة والسكر والحليب والفاكية للعصيدة

– ماك تعرفني نحبها كحلة العصيدة وبلاش زينة وحتى نلحس الطنجرة نشبع انا ويزينا من المصروف وزيد اهو قلك الفارينة مقطوعة والسكر ما فمش والحليب زادة

– انت تاكلها كحلة والا ما تاكلهاش بالكشي عاملتها ليلك انا ، نحبها ما يخصها شيء كيف كل عام الي يذوقها يقلي يعطيك الصحة كيفاش عملتها

– باهي السنة قلهم عملتها كحلة على الموضة وبلاش سكر باهية للريجيم ، ماهو دز فازتك واصنع كذبة تتشرب فيسع

– والله يا راجل ما تقتلني ناقصة عمر كان انت ، وحقة هاك ذكرتني ، قلك فمة دويڨرات شمع بغطاهم نحب ناخذ منهم والله صحيفاتي وفاوا كل عام الي نعطيها صحفة عوينتك ما تارا سو وخاصة اختك ومرت خوك

– كهو انت داك على خويا ومرت خويا تقول خواتك يجيوا بها يتجراوا الصحفة

– وعاد شبيه المهم يجي نهار وناخذهم ، ايا بالله اسكت عليا وقبل ما ننسى هاكة ولدك يحبك تمشي للمعلم وتقيدو في الايتيد قبل ما يكمل وما يلقاش بلاصة

– لاه ياخي داخل للسينما هو وما يلقاش بلاصة وزيد ما عنديش باش نقيدو خلي يقرا في الدار السنة فيه البركة توة نقريه انا

– وانت من عامتاش تعرف تقري الصغار اللطف ، اول ما تحل الكتاب تولي تعيط وتقلهم قرايتكم هذي ما نفهمهاش وامشيوا لامكم تفهمكم وتشد هاكة برامج الكورة من بلاصة لبلاصة وهوما يتعاركوا ويتعايطوا علينا تقول شفمة ، ايا اسمع السنة لا نحبك تقلي ستاد ولا ها البرامج متع العياط والعرك في التلفزة ، خلي كل ويكاند نخرجوا كيف الناس من العشية وساعات خرجة لسوسة والا هي المهدية وساعات عشاء البرة ودورة على الدبش والسبابط وكل مرة حاجة خلي نتفرهدوا

– لقيتشي ما محل عليا في ها النهار ، ايا اخرج نلقاوشي سكر وفارينة وناخذلك الفاكية للعصيدة خير ما ترصيلنا بلاش وتتسبب تقلي اوكة ما عملناش قوم خرجنا نحوسوا

ماهو عاد وفى العرس ووفى مرقو ورتحنا من نحبوا نخرجوا وقعدنا كان احنا ما خرجناش وهزنا نتعشاوا البرة ونحب روبة لعرس بنت نفيسة وصباط لنزول ولد فضيلة … وفيبالي ناخذ ذهنة ياخي نفر بالنافورة ساخطتني بليستة قد ماهي قال شنو ايا قوم نخرجوا نقضيوا عاد للصغار لازمهم حوايج للمكتب

– اما مكتب؟ ماهو خذينا الادوات ومازالوا كان الكرارس قلي فريد متع المكتبة اصبر شوية يجيوشي الكرارس الرخاص بعدلي الاخرين لازمهم قرض باش ناخذهم

– اما ادوات واما كرارس؟ كهو محسوب هذا المكتب عندك انت ، والدبش والسبابط والسبدريات نسيتهم ، دبشهم وفى الصغار وكبروا عليه ، حتى انا نحب سودلي جديد راهو سودليا متع عمناول راوه عليا صحابي الي قدام المكتب الكل والمعلمين وتوة عامين نحك وندك فيه ولى يحشم

– توة الصغار لازمهم دبش يجبر عليا ربي توة نكرظيهم من عند التوفيق بن عمي ونخلصوا بالتسرسيب ، اما انت فاش قام عليك السودلي واصلا شخرجك منصبة طولك يا نهار قدام المكتب؟ بالله تمشي اكثر من المدير والمعلمين انت

– بالله اسكت عليا قلو نمشي ، انا النساء الكل طول النهار يا رتيبة وينك نمشيلهم كان وقت الدخول والخروج ووقت اللمجة اما هوما سم الله عليهم ملي يحل المكتب لين يسكر وهوما محلڨين ووالله نفرح وقت ناراهم حتى ساعات يغيب معلم يقولولي عليه قبل بنهار وساعات هو بيدو ما علبالوش بروحو ماشي يغيب وهوما يبدى فيبالهم

– والله كان شديتوا دياركم وريتو ما يصلح بيكم خير وانتم كل وحدة سودلي على كل لون وتقطعو وتريشوا ، ايا شعندي فيكم وقلي ولدك باهيشي القسم الي جاء فيه؟

– بالله ما تذكرنيش انا لتوة مريضة ، بعدلي حطوه مع صغار اكبر منو وزيد المعلمة خلاتو في الطاولة الوسطانية رغم وسيطتها تحطو القدام وتتلهى بيه ، ومشيت للمدير وقلي ما فمش محوال من قسم لقسم وحتى دخلتلو سارة مرت الهادي البوليس والله لا حب ياخذ بخاطرها وانا ورحمة بويا العزيز الغالي كان موش خاطر ستانست بالنساء الي قدام المكتب وستانست بحديثهم ما غناني نحولو لمكتب اخر

– بالحق اسمع كلامي خلي ولدك غاد خير ما ترصيلك مع نساء ما تعرفهمش

– ايا نقصتشي عليا من دوتك وخرجت خلي نقضيوا وفرد مرة عديني لامي نجيب من عندها المقفول الكبير هاكة الليلة جايين دار محسن خويا بالعشاء وشاهي كسكسي باللحم من يويداتي ، اوكة ما تنساش تاخذلنا موخر متع علوش وتجيب اللبن معاك وقد تدخل العشية

– اما محسن واما عشية يعطيك تنحية ! انا نقلها ماشي نكردي الدبش وهي تقلي محسن وكسكسي ، لاه مرتو تكسرت ياخي والا جزارهم سكر؟ اسمع انا الزوز صوردي الي فضلو ماشي ناخذلك بيهم السودلي الي حابتو اما مادام جاي محسن توة ناخذ اللحم وبرة وانت يا من عاش ينوب ربي

– ونهار الاثنين نمشي بالدرشل الي عندي ؟ ايا توة نكلم محسن نقلو خلي مرة اخرى يصفى وخوذلي سودلي فاروزي نستر بيه وجهي قدام المكتب