– ابويا ابويا جبتشي شكلاطة؟

– لين الشكلاطة على رخصها ياخي ، برة كول كعيبة اسمر قوة ومنفعة

– موش ليلي راهي

– شعزاك تغمز شييها عينك تطلعشي استهويت يا كازي قول لامك تعملك قطنة ما ورد افرك بها عينك

– تغمز والا تقعد يا رامي وهو يفيق والا يحس بوك بحاجة

– لا والله شلقت بعينو ترف قلو ما نفيقش شرجعتني ياخي

– موش على عينو انا ، نحكي عليا انا ما لاحظتش عليا حاجة

– علاش شيوجعك انت زادة ، ماهو استانست مرة حزامك ومرة شقيقة ومرة جاير ومرة يديك مفركة …

– اووه على امي ، توة يا راجل ما قتليش عجبكشي شعري الليلة ومكياجي

– اهاه والله تظهر مبدلة شوية ، وانت شقام عليك خسارة الفلوس والحجامات والمكياج موش كان خذينا بيهم دوارة والا راس لغدوة خير

– اما راس واما دوارة يراني في فوارة ، ياخي ما تعرفش شفمة غدوة

– شفمة ياخي لاباس ماهو ، زعمة ماشي يجيبوا الحليب والسكر والبن

– بالله شدخلني فيهم يجيبوا والا يقعدوا ماهو ستانسنا بالصفوف وكبان سعدهم ووعدهم ، غدوة اربعطاش في الشهر راهو

– اربعطاش… اربعطاش … برة برة غدوة ماهي قرة العنز ، يالا وصي الصغار يلبسوا بالباهي تصبح باردة الدنيا راهي

بالله نندب والا نبرد القايلة ، ياخي ناوي تجلطني ، غدوة ماهو عيد ـ

– اما عيد زادة احنا وين والعيد وين ياخي جاء المفتي وانا ما فيباليش؟

– لا هذا عيد بلاش مفتي والناس يحبوا بعضهم ايا عرفتوشي عيد شنو

– حتى عيد الشجرة تعدى فيبالي ، يطلعشي عيد ميلاد سجيعة اختي والله جاب ربي فكرتني خلي ناخذلها دماق والا قرطاس لوبان والا تعرفشي كان عندك شقف فارغ هات نعبهولها بالأفاح والله تفرح بيه

– سجيعة وافاح ! … يرزيك فيا خلي ترتاح ، غدوة عيد الحب يا راجل وانا خذيتلك قلاسط بشكير عوض هاكم الي عندك وصبعك خرج منهم ، ايا اهم ان شاء الله يعجبوك وكل عام وانت بخير

– اما حب زادة ، توة بعد ما شاب هزوه للكتاب يشرق علينا هو حتى قدام الصغار ، يزيك يا مارا من العياه ، غدوة الاحد ووصيتلك على ملخة توة يشوشطها انت ما عليك كان تنفخ اللوبية الليلة وداير ان شاء الله …

– ايا قوم عاد وعي يزي من النوم خلي نشوفوا ما يصلح بنا

– صبحنا صباح الخير يا فتاح يا رزاق ، توة هكة حتى نهار الاحد ما تهنيش عليا نصبح راقد شوية

– مالا عاد تصبح راقد همك حاجة انت ، قوم نحب نخمل البيت وطلعلي الكوسالات للسطح اوكي شميسة تشره اليوم ، وشوف شتاخذنا فطور

– يا رسول الله ما تهنيش عليا نرتاح فتيتة ، باهي انا قمت نغسل وجهي ونطلعلك الي تحب للسطح ونخرج

– وين خارج الله يبارك ، اكدس هون اعمل معايا حاجة حزامي نفتر وصحتي وفات

– باهي انا قمت هات شنعمل معاك

– توة كملتها بيت البانو وانت داخل تشرول في الماء اخرج حتى الساعة

– باهي توة نلمد جراري بيت القعدة مابين لمدت بيت النوم انت

– ما تعفصليش غادي ما ريتهاش ممسوحة البلاصة ، خاسر عليا انت تقوم تعفص هكك ، راك ماشي تقتلني انت وصغارك ، برة للكوجينة اقعد غاد حتى نعيطلك

– ياخي باكو الحليب وفى يا مرا؟ موش لازم توة نخلط شوية بسيسة

– وانت حتى تقد القهوة والحومة باش تعرف شنو وفى وشنو مازال في الدار ، وغير تهلكلي الرخامة بالزيت وقت تخلط ماهو نعرفك خلواض وموش مرتب ، وقيلا كيلة الزيت فرغت زادة خلي هكك ما تعبيهاش توة تهلكلي الدنيا توة نكمل ونعبيها انا

– باهي مالا شناكل انا في ها النهار ،

– هز طرف بشماط قرشو واخرج جيبنا الفطور

– باهي انا امس وصيت منصور الجزار على ملخة والا كروع بقري اعملهمنا لوبية والا شاهيهم وفرصة اليوم احد

– ملخة وكرووووع ؟ بالكشي الخدامة الي خلاهالك بوك انا ، هاكة شناقصني اليوم كان نشوشط الملخة ، ايا لمد عليا عسلك وجيبنّا دجاجة والا طرف لحم توة نكبو في الكوكوت وكيف ما يجي كولوه

– والراجل الي وصيتو كيفاش ما يصيرش منو راهو نسفه عليه

– بالكشي شاورتني انت ؟ دبر راسك هزهم لاميمتك تعملهم

– يجبر ربي ، باهي شنو اخر تحب

– نحبك ما تبطاش وتجي فيسع تهبط هاكة الكوسالات تجيشي مطر ، موش كيف العادة تمشي للقهوة وتتعدى لامك تبلع قلبك غادي ماهو نعرفك عاد تتحل معاها في الحديث وهي ما احبها في خليقتي وتوة تجبدلك الزمني الكل وتجيني وجهك مقلوب

– توة موش البارح دجاج احنا وقبلها لحم ، خلي نبدلوا المطعم بحاجة اخرى ، نجيبشي مرقة

– كونشي تقشرها انت قلي مرقة يعطيني شنقة كيف ما يحس بيا حد

– امين … -شقلت شنو امين على شكون

– لا لقيت ابال في التلفون طلع امين ولد خويا

– وشبيه زادة ناقصني كان خوك وصغارو انا اليوم

– بالله وين نعرف عليه اوكة طلب وما فقتش بيه ، ايا انا خارج

– كهو الي عطاك على الخروح انت وانا جد بويا طالع هوني ، لا مرة قال نهز نخرجها ونفطرها البرة والا تهزني للجردة نبرد خليقتي

– باهي تعرفشي ، ايا احضر فيسع ونخرجوا قبل ما يجيوا الصغار من الايتيد ، نفطروا البرة ونجيبولهم حاجة في يدينا

– بالله شوفوا الراجل قلبو يلعب ع الزيت ، الواحد مصرانتو على وبرة والاخر يقلو شوية للقطوسة ، ياخي ما تشوفش في الدار حايسة والا تتمقصص عليا ماهو نعرفك تقتل البق بترامك وقت تتمقصص وتجبد بالراكح عليا

– ماهو خارج للفطور موش قتلي برة اقضي

– قتلك ايه وقتلك زادة اعمل معايا حاجة وانت لاك هون

– موش جيت نعمل قتلي ما تعفصش

– والله زايد ما يفهمك حد في ها الدار برة اخرج وما تبطاش

– باهي كان منصور جابها مشوشطة الملخة نجيبهاشي

– يشوشط لحمي في ها النهار ، توة لازم عليك الملخة تقول تتوحم عليا جيب دجاجة وايجا وحكة طماطم وما تنساش كعبات غلة رتيبة اختي ومحسونة مرت خويا جايين يعشيوا عندنا وتلقاشي طرف بندق للتاي وربطة نعناع ، ايه وتعدى للمدام متع الحلو خوذلي حتى رطل حلو لوز نستر بيه وجهي

– ايا باهي مالا توة فرد مرة نجيب مادام اختي جاية في الليل تسهر بحذانا

– لين توة كيف يجيوا نعطيهم من هاكة القطو والمقروض الاسمر الي عندنا يزي من خسارة الفلوس ياخي برانية اختك ، جيب فتيتة وبرة للعشية

– لا اختك الي موش برانية بالحق ، ايا بلازمة الفطور ملخة وكيلو حلو للسهرية وشوف شكون يهبطلك الكوسالات وانا نعمل قهوة ونقضي ونجي ….

– ايجا لهون يا طفل وقلي شعملت عاد في القراية وفي المكتب

– اومة رجعنا والباقي على ربي يا بويا ، المهم راني فديت .. فديت

– فديت من توة يا ابن الكلب والله لا تحشم وانا منقص عليا كل شي باش نقريكم وايتيدات وهمّ على روسكم ..

– بالله سيب الطفل وانت لا تعرف تتكلم لا تعرف تحكي ، محسوب زايد هو من صحابوا يقراوا الايتيد ، غير الاستاذة عاملة عليه بونتو هاكي تعطيه تحت المعدل في المات خاطرو ما قراش عندها ومشى عند استاذ اخر

– لا كان عمل صحيح تعطيه العدد قلو بونتو قلو تسلل ، ما كبيتلهم سعدهم كان انت بدلالك

– ايا لم عليا عسلك موش ناقصتك ها العشية ، ماك قلت الويكاند نخرجوا نتعشاوا البرة ايا اهي جات الويكاند توة نجبد شعري ونلبس ولبس انت الصغار ونخرجوا خلي نبردوا خليقتنا والله جمعة عصب تعدات

– بالله لين خارجين في ها البرد فمشي ما يتسوقطوا الصغار ، تعرفشي توة انا جاي من القهوة نجيب دجاجة مصلية وطرف قلوب وانت اعمل قلية بطاطة وسلاطة ونتعشاوا هوني

– انا حلفت ورحمة بويا العزيز الغالي لا دخلت للكوجينة اليوم ولاني عاملة شي اقتلوني وارتاحوا ، المهم القهوة انت وتجيبلي دجاجة ، لا يكثر خيرك انا خارجة خارجة الليلة اهو قتلك

– باهي وين تحب نمشيوا ، تحبشي نعملوا مشوى في الثنية

– كهو خرجني انت وحطني في السقوطري وريحة المشوي تلصق في دبشي بعد غسيل راسي وتفويحي ، هزنا لرستورون كيف الناس شلعزة

– تعرفشي اهو حل واحد جديد قالوا باهي نمشيولوا

– وانا شهزني للجديد ما نعرف عليه شي ، وتتطلع ماكلتو مشومة ، لا دبر على روحك – باهي نمشيوا لهاكة متع العادة وبرة اوكة نعرفوه يطيب فاوح ونظيف

– كهو انت ما طمعت بالله ، مالا عاد باش ترشق عينيك في مولات المطعم الي شادة الكاسة ما فهمتش شعجبك فيها صفراء معلالة

– لا حول ولا قوة الا بالله ، باهي قول انت وين تحب نمشيوا

– اسمع فمة مطعم تمشيلو رشيدة اختي تحكي عليه شقولك نمشيولوا وبرة ، والا استنى استنى ، قالت عليه لاختك وقيلا ماشيتلو الليلة هي وانا ما احبني في خليقتها هي والحرايق صغارها يحشمونا غادي ، لوح علينا شوفنا بلاصة اخرى

– باهي برة نعملوا بيزا وبرة عند صحيبنا متع العادة

– في ها السقوطري وتقلي بيزا !! والله شي الذوق عندو اماليه

– مالا تعرفشي كيفاش نمشيوا نعملوا صحافي لبلابي نسخنوا بيهم

– والله الرجال عندهم اماليهم ، توة فمة واحد يخرج مرتو يعشيها يوكلها لبلابي ، يامة عليا شنقاسي ، تعرفشي كيفاش جيبنا دجاحة مصلية وتوة نعمل قلية بطاطا وسلاطة مشوية ونقعدوا هون ، والله شي يفدد في ها البلاد ما تلقى وين تمشي …