– بالله كيف تخرج الزبلة نحيلي كعيبتين قارص في يدك

-لين القارص موش قلت العشاء كسكسو؟

– دبر في بويا انت لين ، لازم تحشي خشمك في كل شي ماهي نحي كعبتين وجيبهم وبرة

– لا يعطينا ما يغلبنا ، باهي وتحبشي حاجة اخرى مادامني متعدي للقهوة

– و اشخص كان يسكروهم ها القهاوي خلي تترهن بحذانا في الدار ، انا سمعت بتسكير القهاوي قلت نحضر روحي وقيلا اهي فرحة وما تمتش المحروم محروم

– شعندك ما تحضر ماهو حاضرين من قبل والبن والسكر عندنا في الدار

– بن وسكر ؟؟؟ يراني نبحر خليك ترتاح

– امين

– شتمتم وتقول انت؟

– شيء قتلك اللطف عليك ، ايا موش لازم الخبز مادام كسكسو هواشي توة نعمل قهوة ونجي

– لا قهوة لا لهوة خرج الزبلة وايجا نحب نمشي لامي ناراها عملتلي كعبات حمصية يباركلها موش كيف شعندنا فيها نسمع بالمقروض الاسمر سمعان ذقتو عند اختك قالت امك عملتلها

– قاتلي هي تعدى هز بلاطة بالمقروض غير انا ما مشيتش راهو

– بالله يزي وانتي ديما تغطي عليهم ، شعندنا فيه بالشفاء ، ايا اعطيني عشرين نلف نلقاشي نفيسة اختي غادي نعطيهملها تحبهم عليا خذاتلي حجاب وبوسطو والله توة قداش وانا حشمانة منها

– بالله ناقصة دبش انتي ،حال لين الخسارة حتى تلبس الي عندك

– تعرفشي كيف الي يحكي في حلمو لراجل امو ، توة تعرف شعندي وشما عنديش انت ، هاكة كان جيت لاهي بيا اما خليني ساكتة خير ، حتى تقد الفيس بوك والتلقليق مع النساء ، اسمع موش لقيتني ساكتة معنتها راضية راني والا راقدة على اوذاني واهو نقلك ما عادش يساعدني راهو

– تعرفشي اهم خمسين نلف خلص نفيسة وشوف شناقصك اخر تاخذهولك وايا اخرج امك تستنى تلقاها والمقروض الاسمر غدوة نجيبلك حكة شامية من عند امي وهذي حارة قارص الي وصيتني عليهم ….

وانا نشوف في اعراس توة وكيفاش ساعات حتى الخو يمشي لخوه كان للصالة ودار العرس الحس بايت فيها … رجعت بالذاكرة لاعراس حضرتهم وانا صغير وخاصة الاقراب منهم …

تفكرت كيفاش من قبل العرس بنصف شهر واحنا متلمدين ويبدى حلان الحلو من صمطان الزلوز لتقشيرو لرحيانو وكل نهار يتحلوا صواني واحنا داخلين خارجين للكوشة وكان الحلو فاوح وبوهرتو يعني كعبة البقلاوة والا الملبس تقول ربع خبزة وريحتو تجيبك منين وخاصة الملبس وقت يتكسى ويترمى تحت الجفنة بالكانون وطبعا ما يحلى الملبس كان مسروق وكنا نعين عساس في باب البيت وباقي الصغار تحشي يدها تحت الجفنة وتمد الملبس … وفي وسط ها المعمعة الكل كان الي يدخل وفي يدو قضية تابعة العرس يزغردوا عليه …

هذي دخلت بقصة للعرس ري ري ري وهذا جاب صباط لعرس ري ري ري وكل ليلة تتمد الدربوكة وتبدى الزهويات على السطحة او في وسط الدار وهاكة الغنايات السماح نلمو نلمو نحبو ونكره امو ، لليري يا منة ، نوار اللوز يا مفتح ، يامة سامحيني طيحت الڨلة ، وصبوا الرشراش وناري على الزينة يمة … وقبل العرس بجمعة تتذبح البڨرة او العاصي ويتخبى اللحم ما يظهر كان نهار العشاء الكبير الي فيه صحن برميار سلاطة مشوية وسلاطة خضراء ومطبق طاجين وصحن دوزيام فيه مصلي بطاطا وصحن تروزيام فيه كمونية … والديسار دلاع بارد مازال كيف طلع من البير وبعد تمشي لليان تصوبن يديك وواحد من الصغار يصفيلك …

لكن قبل العشاء وفتكم بالهدرة جمعة كاملة الفطور والعشاء وشقان الريق مشتقات البڨاري هوما الي يطيبوا من كرش وكروع وملخة وذيل ولحم الراس … معنتها لو صغار توة حضروا قبل راهم ماتوا بالشر لانو الماكلات هذم يتباوعوا منهم. … عاد قبل العرس باربعة خمسة ايام بعد ما يتعبى الدبش في الكانستورات ويتڨربط ويتزين تجي الكميونة والكراهب لهزان الدبش وطبعا الكميونة فيها المزاودي والشطاحة ويقولونا ردوا بالكم تتكاوا على هاكة الجراري والمسند ويبدى كنسترو روز فيه السبابط والشلايك يظهر منهم كان التالون والقعر معبي بالطفل وشوش الورد ودبوسة شمبوان فيزونات ويوصل الدبش ويهبط المزاودي على السطحة وتربخ وقتها لين النساء يكملوا ترصيف الدبش وكانت ديما تبطينا هاكي الي تتلهى تريڨل القلاصن والبوسطوات ما نعرفش علاش توخر ، اخر ضربة يشدو وليد صغير يڨرڨبوه على الفرش قال شنو باش تبكر بوليد العروسة ،

ومن غدوة عاد الحمام ويمشيوا النساء والبنات على سقيهم زنقة كاملة وهوما يدربكوا وتربخ الدربوكة في الحمام وساعات تقوم عركة بين اخت العروس واخت العروسة تقلها الي جبتوهم خلصوا عليهم انتم قداش منو خويا والاخرى تقلها ما يهمناش هاكم تابعين العروسة هو يخلص …

ويجي نهار النزول عاد والي يكون ديما في الجنان ونبداوا من الصباح نصبطوا ونبخوا في الجنان من باب الحوش واحنا ماشين ونحفروا بلايص المادري ونعلقوا فيهم التيبات والبوق الالمنيوم ونحلوا هاكة الكراسي الي يتطواوا وقدام منصة البندارة نفرشوا باش خاطر الغبرة متاع الشطيح وتجي سعاد البندارة والا ببويا والا مرت عبعوب كل ناس شكون يجيبوا ويبدى النزول والشطيح بالفلوس الصبية بـ 50 والمعرسة بـ 100 والاولاد والرجال يشطحوا وحدهم تحت زلوزة المهم ما يقربوش للنساء …وتتجلى العروسة ليلتها ويقعدوا عاد كان القراب والعروس واختو وخوه ويطيب التشيش بالقرنيط وتتجبد الدريوكة ويبدى جو جديد للصباح …

ونهار العرس هاكة في الصالة عاد يا صالة مروان يا العموص يا بوزيد ويمكنونا الصغار في بيت الحلو نستفوا البلاتوات وزوز ڨدعان يفرقوا الحلو وزوز اخرين بڨاجو الڨازوز يدوروا واحنا نحلوا في الشقوفات والڨازوز كان كريش والمسدي والمدب حاجة ليكس يعني والنساء وقتها كل وحدة في يدها هاكي المروحة الشنوة تمروح. والمصور يضرب في الفلاش في الفارغ والناس عاملة جو ويختم العرس بهاكي التصويرة المعروفة متاع العروسة قاعدة على تابوراي وراسها مشنق الفوق والعروس واقف بجنبها يكحل عليها من فوق ودام الفرح وتتغنى يا سيد الاسياد يا حبيبي بورڨيبة الغالي …

خف عقلي مرة كباقي الصفاقسية الي ما يلقاوش وين يمشيوا للترويح على النفس ومشيت لاحد منتزهات سيدي منصور وكانت رحلة شبيهة برحلة الدوعاجي في بلاد الطررني ..

بدات الحرب من اول ما دخلت طريق سيدي منصور على مستوى حي بورقيبة ازدحام واكتظاظ غير عاديين مقاهي يمين ويسار والكراسي حشوما والا لزوما والا راهم حطوهم في الكياس وكراهب مراكية وسط الكياس الحاصيلو اكثر من نصف ساعة من حي بورقيبة لمستوى الثكنة متاع الجيش … ومطوح مطوح وصلنا للمنتزه دخلنا زنقة كلها تراب وحجر لين عرضنا باندي لابس خلعة وموشم ومشلط وقلي ادخل راكي هنا …

برة راكينا نلقاه جايني بورقة عطيتو دينار قلؤ لا الفين العسة تناقشت معاه شوية وبعد لعنت الشيطان وعطيتو ودخلنا للمنتزه قعدنا ربع ساعة نستناوا في طاولة تفرغ لين حن علينا ربي مشينا قعدنا ونستناوا في السرفور يا ولدي ايجانا يقلي لحظة انا جايك وهو ماشي جاي قدامي يقول يبازز فينا لين عيطت عليه يا خويا سربينا والا خلي نمشيوا .. ايا حشم وجانا والطلبات جات بعد نصف ساعة بالمنقالة …

الطاولة الي جنبنا فيها بنات واولاد يرحم عمي وبرة شبعونا بدخان الشيشة والكلام الزايد والناقص الي يقولوا فيه في كل مرة نكلمهم يقلي سامحنا وبعد يعودوا يرجعوا … ايا لا فايدة بيه قوم نمشيوا وهات الحساب يا سرفور وما اسرعوا وقتها جانا يجري شعندكم قتلو بيتزا وجواجم وڨلاس واكسبريس ودبوسة ماء … طلع واهبط وقلي 48 د ! يا ولدي ثبت روحك بالكشي طاولة اخرى راهو ما كليناش كافيار ومشوي علوش قلي هذا حسابك…

خلصتو وتميت خارج جيت نهز الكرهبة نلقى صفة كراهب ورايا مشيت للعساس قلي استنى شوية اهم قريب يخرجو والا دز معايا الفران امان محلول راهو … يا ولدي كيفاش هكة مالا انت لواش عساس قلي ايا دز معايا والا استنى ما عندي ما نعملك …. دزيت وخرجت وصلنا للضو الي في مفترق السلطنية الاخضر يشعل والاحمر معدوم وقت تعديت انا ما فمش ضو الكل مطفيين وطبعا الطريق ذات اولوية …

تعديت نلقا الشرطة تستنى فيا وقلي حارق الضو يا ولدي من طولك من عرضك وينو الضو … المهم طلعوا واقفين غادي يحصلوا في العباد وحممولي محضر حرقان ضو ورجعت للبيت فرحا مسرورا امني النفس بعودة للمنتزه مرة اخرى