– الو ايا كل عام وانت بخير ياا ، ايا قلي وقتاش نجي نهزك عندنا

– سنين دايمة ولا يقطعكم عليا اما خليني في دويرتي يحيييك

– ايا ايجا ذوق عيدنا قلو دارك قلي وقتاش نجيك وبرة

– باهي تعرفشي خلي وقت تطلعوا للبحر تغسلو الجلد نطلع اعماكم نشقشق لحيمتي فرد مرة

– اما جلد؟ بالله ماهو صدقناه للجامع يااا

– يا غبينتو الساعة علوشكم نظيف وجلدو يشره يالا صدقة بالغة ان شاء الله مالا خلي نجيكم نعصبن الدوارة نعرفك تحب تعصبيني

– دوارة شكون كونشي دوارتي ماهو ولات تتباوع وشولقتها وقطعت المصارن والمنديل ياخي هزيت رميتها في الزبلة وبرة

– هكة راد الله يا ناري على الدوارة بهاكة الحساب في الزبلة ، تعرفشي نهار تجيوا تطيبوا الراس ايجاني توة نعملهولك بالملثوث محرحر على كيف كيفك

– اما راس زادة؟ فيبالي حضرت الشاليمو قلتلها قرقطوا خلي نشوشطو دكتها تحتها وكدس في الشمس وانا دخلت نقيل فتيتة خرحت نلقاه جيفة هزيت لوحتو وبرة وزيد هي قالت ما تاكلش الراس من الاول ولين ها التشوشيط وتحوسلنا الدنيا

– يا مندبة قريعية ويا غبينة ويا هي ، توة انتم هكة عيدكم جماعة توة ، بالله باش عيد هو وشنو بنتو اذا ما تحوسوش فيه العلوش ، ايا خليني ساتكة انا ماهو نتكلم نولي مشومة ، ايجاني توة وفوح دويرتك بفتيتة مشوي وتوة نعملك القلاية

– كونشي ترامي تعملهم قلاية يااا ، ماهي قاتلك المقلي موش باهي وطروف المشوي مع طريفات سلتة كلمت صاحبتها تعرف تراتور عطاتهملو توة يجيبهم حاضرين مع السلايط

– وشنو ها الترتور اللطف علينا؟

– طباخ يااا طباخ

– ياخي الطباخ ولى ترتور في وقتنا هافا ! وفاش قام الطباخ ماهو لم صغيراتك وشعل كانون وبضحكة وبلعبة يتشوى وتتلمو عليه

– يااا راهو ولاوا هكك باقل حوسة ويجيك حاضر كل شي

– ايا تعرفشي يا وليدي لا تجيني لا نجيك ولا نحب تفريك لحم انا نتكلم نشوام نسكت تجيني غصة ، اهو نحيت طروف القديد من الحبل وماشي نعمل الجرادق ونسليهم ونتعشاهم خير مليون مرة من الترتور متاعكم وما كذبش اليهودي كيف كان يدعي على صغارو يقلهم يعطيك غلبة مسلم يجيه عيد في العام ما يقدوش واحنا حديفنا قياس ...

ماهو عاد العاقبة عندكم مشينا لنزول المنصف ولد السيدة خلت سلفت مرت الهادي ولد عمتي ، وهوما الحق دار العروسة قالولهم جيبوا القريب القريب والا شهزنا حال ،

ايا مشينا لدار العروس باش نهزوا معاهم فياج بعدلي قالونا جيبوا الكراهب فارغة ، اول ما وصلنا نلقاوا هاكة الراجل الي يهلل ويكبر في الزنقة وتلقاه في كل عرس وينظم في الكراهب انت اوقف هون وانت استنى نخرجلك الكرهبة الاخرى وانت شكون معاك وقداش نزيدك … السيد هذا اسمو الطاهر طلع ، ايا راكينا ودخلنا بالزغاريد وقعدت في وسط الدار مقابل شباك البيت الي يبدلوا فيها النساء وكان معرج شوية باش يتبردوا وباللازمة نسيت حتى شقدمولي نفر كان في فمي يرحي وبرة في الحلو ،

هكك وجاء الطاهر كيف الشيطان وقال ايا يجعل منكم قوموا حلوا الكراهب خلي نعبيوا ونمشيوا شمازال عاد ، يا طاهر راهم مازالوا يبدلوا في العقل يا طاهر من طولك من عرضك وشي قال توة نخرجهم ها النساء ،

ايا خرجت المارا وتنصبت جنبي والطاهر يمشكي فيهم انت اركب هون وانت خليك مع فلان وانت استنى شوية ، هكك وجابلي ثلاثة عزاوز قلي ايا اهم هذم معاك يباركلك لا تباركلك يا طاهر تسخايبني ماشي نوصل فياج للعمرة عاطيني ثلاثة قاطعين الغسلة والممو حشاهم في كرهبتو ، اما شماشي نعمل لعنت الشيطان وشديت الصف متع الكراهب هكك وامك نفيسة تقول اووه يشويه الطاهر خرجنا كيف مذاهيب الشيرة اوكة خرجت بشلاكة الشمع وما لبستش دماقي ، يجعل منك يا وليدي اهبط جيبهولي اوكة تلقاه في شكارة بيضة تحت سرير بيت النوم ايا بدينا في ها الليلة الكلبة ،

وهبطت نلوج من كرهبة لكرهبة نلوج على مفتاح الدار وفي الاخر طلع عند بو العروس الي سبق في كرهبة العروس ، وجاب ربي خلاوا شباك الميحاض محلول سلبطنا وليد صغير من غادي حلنا من داخل ومدينا دماق نفيسة وقصدنا ربي.

احنا في الصف بيب بيب بيب وعيشوشة تقلي يا وليدي بالله تلقاشي حماص اوقف صرفلي خمسة لاف نستحقهم للرشقان ، تقوم نفيسة تقلها بالله اما رشقان ياخي نسيت امس العشية مشينا للوصف شعزاك وليت تنسى يا عيشوشة ، وبداوا عاد هاكة الثلاثة عزاوز في المافيولا متع الوصف وام العروسة وخلتها وامها وبوها الي يدور دورة ويقلهم ايا كملتوشي قبل ما يمغرب المغرب وترصيلكم تكملوا الوصف على الضو والخساير …

ايا وصلنا وقامت امك فطومة قاتلي يا وليدى انا في الكرهبة ويجعل منك جيبلي مشيرب ماء نشرب دوايا والله خرجت ونسيت ما شربتوش جاب ربي ديما فوقي هو ، وجبتلها الماء وهبطتهم ودخلنا وانا نلوج على الطاهر وصلشي ولا ريحتو ، والناس يستناوا باش يدخلوا مع بعضهم وهذا وين هذا فين زعمة عوقت بيه الكرهبة …

هكك وكرهبة جايا تزمر وبو العروس مشالوا يا طاهر ماهو لاباس شبيك لتوة ، قلو لا هاكة البنات اشتهاوا كورني جيلاط من عند العارم عديتهم بنيات بكر العزايات انا ملكدلي عيشوشة ونفيسة وفطومة وهو يضرب في الجيلاط مع الفستق … برة يحط قلبك يا طاهر ويعمل الله في الرجوع …

اخر ضربة في العشاء وكيف العادة فرشت هاكة البساط على الفيراندا وجبدت الراديو نبعول فيه ونستنى في ليان الهندي وبرج الدلاع ، ونسمع كان في صوت من البرسيانة الي في الفيراندا يقلي :

كهو انت كل ليلة اقعد لوج على البرود وبعول هاكة الراديون الي طول النهار يخشخش ما فهمتش كيفاش تسمع بيه ، ايا اسمع اليوم ماهو جور فريال ، دبر راسك هزني لاي مطراح المهم نخرج

– اما فريال الي نهزك ليلها زادة ، فريال هذي يا نمشيلها وحدي يا لوح

– هكة راد الله عليا الراجل ما يفهمش بالسوري ، معنتها الليلة فيشطة والناس مريحين فهمتشي توة

– وفاش قام يرحوا ياخي العيد جاء فيسع؟

– راك قريب تجلطني يا راجل ، اليوم عيد المرأة وتوة نشوفك عاد شتهديلي موش كل مرة ادكها تحتك وتسمع وتسكت ، الي يقلك سجيعة اختي كل عيد مرا تجيها قطعة ذهب وانا حتى عرف تل ما جبتهوليش خليني ساكتة برك

– موش في مارس عملوا عيد مرا زادة وقبلها عيد حب واهو عيد ميلادك قريب ولحق عليه عيد عرسنا ؟.. لا بالكشي نخدم على اعياد النساء انا ماذا من اعيادكم؟ ايا تعرفشي كيفاش مادامهي فريال وفيشطة شقولك نكلموا سجيعة اختك وتعصبلونا هاكي دوارة العيد الي واخذة بلاصة في بيت الثلج ومضيقة على شكاير الجلبانة والفول وتوة نجيب اللبن ونعديوه نهار ماصارش

– ولا موش ماشي يصير راهو ، انا نقلو عيد النساء وهو يقلي دوارة ، ايا نندب والا نستنى حتى يتلمو ، الجموسي ومن دراك غنى على النساء وانت تقلي سجيعة ولبن ، هزنا لبعض المطراح نبرد خليقتي والا للبحر نشقشق لحيمتي ونتعشاوا البرة كان هذا ،

– الجموسي قال ويقوللك هذا عسل وهو صحن هريسة ومن الابرة يعديوا جمل ما قالش هزوهم للبحر وعشاوات البرة ، يرحمو فهم الطرح من بكري ، ايا شعندنا فيه توة ، قلي وين تحب تمشي باش ننفخ عجالي الموبيلات على بكري وحاول تضعف شوية شلعزة ياما نهار تتقرض العجلة

– والله لشكون تحرقص يا مرت الاعمى ، انا قلت نلبس قفطاني الفاروزي ونحمر خديداتي وهو يقلي ينفخ العجالي ، ياسيدي كلمت سجيعة وجاية هي وراجلها بالكرهبة يهزونا معاهم اوكة ماشي يهزنا للكازينو وبعد يعشينا البرة دجاجة مصلية انت هز سطوشك واخرج وعلى الاقل هو يوصلنا وانت خلص الخرجة وقول يعيش النساء الله يعيش النساء ..