وانا نشوف توة في الناس تبرمج في العطلة هذا في الوتيل الفلاني وهذا في الوتيل الفلتاني والبيسين هذي طايرة وهذي صغيرة وهذا ماكلتو باهية وهذا لا … تذكرت عطلتنا وقت كنا نسكنوا في الربط ونستناوا اخر نهار في القراية باش نطلعوا للغابة لدار الجدة ومن الفلة يبدى الجهاد اول ما يستقبلونا كل من اتجه للغابة طول نبداوا اللعب قبل حتى ما ندخلوا نسلموا يا تتشكل قسمة متاع ماتش كورة وقت تكون كورة القراطس تعملت وتربطت وجاهزة للاستعمال او غميض وطرح جري على الطاير او في الجنان وماكلة الزلوز المغزاز والمشماش الاخضر من الشجرة وطبعا بالسرقة لان الجنان بعد الميالي كان من الممنوعات انك تدخلو ولازم نعفصوا في السطر متاع الميالي باش ما نخليوش بلاصة الساقين ونكونوا حافيين باش العفصة ما تبانش متاع شكون , وفي سطور الميالي نبداوا ماشين وناكلوا في ڨرون الحلبة الخضراء والڨرفالة والحمص الاخضر .

…..

وتجتمع النسوة وقتها ويتجبدوا الكرنيات انا ولدي طاح في الحساب والاخرى بنتها طاحت في الفرنسية اما بسم الله عليهم ذكيين المعلم قال هكة والفايدة موش توة المهم في الساتت ياخذوا السيزيام … وبعد تطيب طنجرة محمص مغلي والخضرة من الجنان خبيزة وسلق … وتتحط شقالة للصغار وهذا السلف سرفس متاعنا وقتها وتبدى السهرية بقلية حمص وفول ويتنصب معد الديمينو للرجال واحنا كل مجموعة في تركينا هذم يلعبوا في سلطان بلغ والاخرين في الخماس ونختموها بطريحة بنفس الشلاكة الي لعبنا بيها وقت يهرب السارق من السلطان في تنفيذ الحكم وتقوم عركة ويقوم واحد من الرجال يخبط فينا ويقلنا ايا تمغطوا يا بناي الكلب وانتم لا ترقدوا لا ليل لا نهار , وطبعا يضرب الصغار الكل ولا مرا تتكلم ويعز بها وتقول علاش ولدي والا ولدجي ما عمل شي وفاش قام تضرب فيه وتحلف بالايمان لا قعدتها وتهز صعارها كيف نساء توة …… وبعد الطريحة نضطر للنوم والكلنا طرحة وحدة في البيت وكليم الشوالق فوقنا الي يرقد على جنب يقوم عليه.

……

واحنا راقدين عاد في بيت النساء ويبداوا يرغيوا والحق ما عندهمش تقطيع وترييش وساعات وحدة تسيب نكتة والا كلمة خضراء ونضحكوا وقتها تسمع : صار انتم لتوة فايقين يقطع ريحتكم ما نجموش نتكلموا كلمة وحدنا , الصباح تتخلط صحفة البسيسة وشقالة العليق والشريح نكملوا ونخرجوا للجنان وتبدى مرحلة جديدة من اللعب والهرج وتقريبا الصباح كان مخصص لمرج الارانب في المطمورة ومحاولة مسكهم او سرقان العظم من تحت الدجاج وتكسيرهم ولتوة ماني عارف علاش كنا نتشمتو ونكسروا العظم وعارفين بعدها طريحة وزادة تكون فمة مرمة في تركينة الجنان والصبة مصبوبة وتحتها كدس التراب ونبداوا مسابقة احسن تنڨيزة وشكون يجي واقف …. وقتها يكون حضر شقان الريق وشقان الريق له نكهة خاصة فهو عبارة عن تسخين فاضل العشاء وصحن مقلي وهاكي البطاطا جرارات موش فريت بلاش بركة وكعبة الطماطم من الجنان والخبز لفيف او مبسوط.

…..

ومن غادي طول للزنقة والجنان وموعد مع جماعة الزنقة الاخرى لتكويرة تكون على الشوكوطوم او سطل ليم يعني الرابح ياكل بلاش وطبيعي التكويرة توفى بعركة وندخلوا مغبرين من ساسنا لراسنا وطول تقلك امك برة عبي كرتل ماء من البير صحيت خلي نغسلك طرافك وتبدى مغامرة جديدة في المطهرة بالقرصان والتشويش وتجليد اللحم بهاكي الكاسة الكحلة ونخرجوا بربطة البشكير ونوصلوا للسهرية ويتعاود السيناريو من الليل للصباح لوسط انهار.

…..

يعني العطلة متاعنا كانت اول ان كلوسف all inclusive كيف صغار توة ما فاتنا شئ معنتها !

– اهو جاء اكتوبر مااطولو وما اندبو سبتمبر يا راجل

– الكل بالنقص من عمرنا محسوب مادام شيء لا الطويل ولا القصير

– ايا تراه فاش يذكرك اكتوبر على الاول؟

– فاش يذكرني بالله ماهو في البلح والرمان يربخوا في عز الخريف

– اما بلح يراني نبح وانت الي عطاك على كرشك ، نقصد اكتوبر شنو يجي فيه؟

– فمة عيد الجلاء وقيلا زادة فتوح ولد جارنا الصادق ماشي يكتب الصداق والاشهار في الصيف قالوا

– والله قريب نشق دبشي ونقول فيها وووه … شدخلني في صداق فتوح انا . نقصد 8 اكتوبر باش يذكرك؟

– ثمنية ، ثمنية … موش فيبالي نهارت صبينا هاكة الخرخوط من ظهرة باش خرجنا الميحاض وبيت البانو باش كبرت الكوجينة

– اما كوجينة يراني في تركينة خليك ترتاح مني ، 8 اكتوبر موش نهار جيت عطيت فيا الكلمة وخذيتني؟

– بالله شذكرك فيه ها النهار ؟

– طرشة تحدث في مجنونة تسمعشي بها ، ويزيني من الدرويش متاعك

– مالا فيشطة تلقاه جاب ربي قتلي خلي نوصي على دوارة على وسع طيبهانا نهارتها والا ملخة كان تحب المهم قلي باش نوصي غدوة؟

– نندب والا نستنى يتلمو ها الليلة معاك ، انا نقلو ذكرى خطوبتنا وهو يقلي دوارة ، راهو لازمك تجيبلي كادو في ها المناسبة كيف استبرق بنت خلتي راجلها كل عيد خطوبة وعيد زواج يجيبلها يا فردة ذهب يا لبسة سمحة يا صباط يا كبان سعدي ووعدي ومعاهم شكلاطة ووردة

– توة لازم تحرقها المفاجاة يا مرتي ، ايا مادام انت جبدت الحكاية انا وصيتلك على زوزين قلاسط بشكير تسخن بيهم سقيك في الشتاء وانت كل ليلة تلسعني بسقيك في الفرش وقلت نجيبهملك نهار عيد خطوبتنا

– هكة … قلاسط وبشكير زادة ؟ زايد الرجال عندهم اماليهم والحب لاماليه يشرق عليا محسوب انا

– انا راهو كل نهار عندي نهار حب معاك يا رتيبة موش كان نهار خطوبتنا

– كولني كولني باللوغة ماهو نعرف زهري

– حقة جبتلك ساشاي هندي اوكة بحذا العتبة اغسلو وخليه يبرد مشوار للسهرية …

ايا عاد فتكم بالهدرة قمت الصباح وفيبالي نتلصص في البيت نلبس في دبشي قبل ما تفيق النافورة وتحرمني من قهوة الصباح وقعدة كل نهار سبت مع الاصحاب والاحباب ، وسبحان الله نسمع في صوت طالع يقلي:

………..

– شبيك كيف السارق وسارح على الفجاري على فين خير ان شاء الله؟

– بسم الله المانع الستار تقول من تحت بسم الله طلعتلي ، يا بنتي خارج نعمل قهوة ما بين فقت انتي والصغار ، قلت ما نحيركمش ميسالش ماهو؟

– القهوة صباح وليل ياخي! انا قايمة توة نطيبهالك والا لواش ياخي ما يشرقش عليا petit dej كيف خلق ربي ، ايا ورحمة بويا العزيز الغالي ما غناني خارجة معاك واشرب قهوتك وانا خلي نشوف الدنيا

– اما دنيا الي تشوفها ؟ ماهو قتلك قهوة مع صحابي سويعة ونجي واوكة اليوما سبت توة نجيبلك مرفة في يدي واعملهالنا بخبز الشعير

– اما شعير يرا قنباعتي تطير خلي نرتاح ، اليوم دبروا روسكم في الفطور انا هابطة مع سلوى اختي للصولد ، اللطف قريب يوفى وانا لا ريت لا سمعت وبعد petit dej وصلني للبلاد ماشي نتلاقاوا في دروج المدينة وماتبعدش باش وقت نكملوا نكلمك تجي خير ما ترصيلي في الكيران وتاكسيات بو بلاصة ونتخنق بريحة الغاز ونبقع دبشي في هاكة الكراسي الي تقول حاضرين على عامة الحرب واعطيني فلوس في يدي تعجبنيشي حاجة

– ايا اصبح لله قلو فلوس ، الصولد ودور فيه اوكي الدنيا قدامك اما يزي ما شريت وما مريت وانت صيف كامل اهو نكري لعرس فلانة اهو نشري لغرس فلتانة وتوة تقلي نشري؟

– مالا تحبني ندور كيف الباصة في عقلها شوف بعينك وموت بقلبك؟ خليلي فلوس والا هات كارطة البانكة ولا تقلي في الاحمر ولا في الازرق موش تحمار وتزراق كان كيف نقلك على حاجة

– يا بنتي يهديك راهو ادوات الصغار ودبشهم وترسيمهم ما خلالي شي وانتي تقلي صولد ، وبعد تقلي عصيدة وفاكية …

– والله ذكرتني ، فرد مرة انا هابطة هات نقضي الزڨوڨو وما لازمو على بكري وخلي نوصي على طرف حلو العادل خويا مروح بحذانا في المولد نقعدوشي بلاش كعبة حلو زادة

– انا ناقص وزيدني العادل …

– بالله شتتمتم وشتقول ما سمعتكش؟

– لا قتلك مرحبا بيه وتوة ناخذ صندوق مقروض القروان للعادل ماهو المولد منسوب للقروان عاد

– ايا نندب والا نستنى ؟ انا نقلو خويا مروح من بلاد لبلاد وهو يقلي صندوق مقروض ، اهي مدامة متع حلو هي ويا هي توة نوصيها

– صولد ومكتب وعصيدة وحلو للعادل … هذم خدمة عام كامل ما تكفيهمش موش شهرية ، ايا تعرفشي كيفاش حتى المرقة انساها حتى يوافقولنا على القرض وشلوش عظمتين وانا خارج للقهوة وسلملي على سلوى كان جاتك