راجل و سيد الرجال
“شرمولة”
نشرت
قبل سنة واحدةفي
من قبل
ياسين الرباعي Yassine Rebaïيا حسرة الحاصيلو محلاها ايامات رمضان وجو رمضان خاصة هاكي الغناية الي حفظناها في الناس الكل تخرج وتحوس واحنا في الدار وانت ماهامك شي بعدلي شادد القهوة برة يرزيكم فيها ، وتزيد تقلك برمج نمشيوا لويلة للقروان والله محسونة بنت خلتي تحكي وتعود عليها وقاتلك الي ما شقش الفطر على الاذان في القروان ما عندو ما شاف …
قلتلها توة بالكشي احنا هوني نشقوا الفطر على لليري يامة لليري يااا والا روح من السوق عمار … يا بنتي يخرج رمضان ونهزك وين ما تحب تعرفني ما نحبش دخلة وخرجة في الصيام ، ايا شعندنا فيه تقلي اهو وفى شمازال فيه محسوب وما تنساش تحيبلي البصل الاحمر للشرمولة راهي ما تجي فاوحة كان بيه ،
ايا هزيت القغة وخرجت ندور من خضار لخضار وها البصل الاحمر لا ريحتو لين قلي واحد اوكي فمة كميونة لظهرة تبيع ومن حينك مشيت نجري نلقاهم زوز كماين وحدة بالفراز والكيلو بستة لاف والاخرى بالبصل الاحمر الكيلو بسبعة لاف … هزيت التلفون وقلتلها يا مرا السنة الشرمولة اعملها بالفراز خير من البصل …
والحق كانت متفهمة وقاتلي ماهو نعرفك تسكرها وتجيب المفاتح ، اسمع ورحمة بويا ما تجيبش البصل لا عملتها اهو نقلك ، لا محسوب كان قعدنا بلاش شرمولة وكيلو الزبيب اعملهونا لكلوكة وفرد مرة نربحوا حق الحوت … وولات عاد في ماشي تقطعلنا العادة ونكدسوا من دون الناس والسنة لا اذان في القروان ولا شرمولة وماشي تخلينا ضحكة والحاصيلو تحلت عليا ولا قالت نسكت.
وليت كيف الناس الملاح رجعت لمولى الكميونة وقريب نقلو يخدمها ويصبها عندي في الدار فمشي ما تسكت وداير ان شاء ولا تقطعلنا عادة وتحل دوسي اخر اخر سبحان ما سكرو وهو دوسي الحلو ونحبوا من عند مدام فلانة حلوها يشره والكعك متاعها موش باهي امشي للمدام الاخرى اما الحلو العربي هاكة خلي توة نوصي سجيعة اختي عندها جارتها هي ويا هي في الحلو العربي …
تصفح أيضا
– الو ، شبيك تبطى باش تهز عليا فاش لاهي ياخي؟
– لا شي كنت لاهي في شوية خدمة ، شبيك انت لين تطلب فيا
– توة فمة واحد يقول لمرتو لين تطلب فيا ؟ زايد الرومنسية عندها اماليها ، غير نكلمو يترعد الراجل
– بالعكس انا لو ما طلبتش انت كنت ماشي نطلبك توحشتك
– اح عيني وجعتني … توحشتني والله ضحكتني وانا ما عينيش
– ايا باهي لين كلمتني ويزي من خسارة الفلوس في التلفون
– حتى انا قلت شبيه لتوة ما بدى يڨرڨر على فلوس التلفون ، ايا اسمع جيب في يدك شكارة بشماط. طيبت طبيخة للفطور والله شاهيتها حتى الدنيا سخنت اما يصفى
– والله احسن ما عملت ، باهي توة نجيب معايا وتحبشي حاجة اخرى
– ايه وجيبنّا شوية وشق زادة
– لين الوشق والبخور زادة؟
– مالا شبعدها الطبيخة ماهو لازم نفوح الدار بطلقة بخور ياخي ما نعرفكش انت وصغارك
– باهي الله يبارك
– استنى ما تعلقش ، انا كلمت امي تجي بحذانا تعدالها جيبها
– باهي وتوة نجيب امي فرد مرة
– بالله جايب امك والفطور طبيخة ! خلي مرة اخرى
– اهي امك جاية للطبيخة شنو المشكل؟
– امي موش برانية عاد ، خلي امك مرة اخرى
– اهاه بالحق امي برانية علينا ! ايا زايد توة قلي شتحب اخر وبرة
– جيبنµا فيشة جديدة للكليماتيزور متع بيت النوم اهو قتلك وانت كل عام تقلي العام الجاي
– توة على رخص الضو ، ماهو صيف ويتعدى ويتعدى وزيد كانك تسخن في بيت النوم صير ارقد في بيت القعاد اوكي فيها كليماتيزور
– تلوج عليها عاد انت ، حاططني كيف الهجالة ، علاش ياخي ما عنديش راجل وبيت نوم انا ، ما يهمنيش جيب فيشة وطول الخيط ونخدموا متع بيت النوم، واسمع هذا تصير ترقدلي قدام التلفزة ما يساعدنيش راهو، واهي امي ماشي تشد بيت القعاد نشوفك شتعمل الليلة
– ايه توة نبات في البيت مع امك ماهي موش برانية عاد
– برة يكب سعدي باهيشي ، اوكي قيلا ماشية لدار الحبيب خويا، امي موش لازم. جيب طلقة وشق وايجا …
. توة ولاوا الناس في المطر الكل تولي رومنسية وقال اشنوة نعشق المطر ونخرج للقهوة مع الفيالة ونشد كرسي بحذا البلار وتجي رعدة قوية وبالخوف تعنقني صاحبتي وتتحشى في حضني … وولات كلمة ربي يرحمنا يقصد بها رعدة اخرى ما اقوى
رومنسية قبل تختلف عليكم برشة راهي , قبل تصب المطر تتقسم العايلة الي يدز في الماء من وسط الدار باش ما يدخلش الماء للبيوت والي يلبس بوط وكبوط شمع ويخرج يحفر ساقية تولي مجرى متاع ماء للجنان باش نجموا ندخلوا للحوش والي يحل في منفس الماجل خير ما يتعبى و يطرشق ,
اما جماعة الربط فعلى حالهم لا تسال وقت تتبلع الزنقة باللبزة والماء والفوارة تولي تطلع في الماء من النقب الكل والي بكرتل يغرف في الماء من الميحاض والي ينقب في ساس البيت الي على الزنقة باش يخرج الماء من البيت والي في السطح يغلف في شبابك الفنار بالمشمع باش ما يهبطوش ماء ,
وبعد الحرب هذي في الجنان والا في الزنقة يخرجوا الصغار بالسرقة ويلوجوا على غديرة كبيرة وغارقة شوية وتولي حصة سباحة وزعمة زعمة نعاونوا في العباد الي تحب تشق البورة ونرجعوا للدار كيف الفلالس ويتم استقبالنا بهاكي الموسيقى الترحيبية المعتادة : وين كنتوا يرزيني فيكم راسكم عريان ولحمكم بالماء باش تتسوقطوا ونقعد نقالع فيكم برة يشويكم صحتي وفات في جرتكم ,
ويسخن بانو الماء على البابور ونهارتها غسيل الراس كنفور راهو الماء من الماجل باش انقصوا منو مادام ربي رحمنا , وتبدى رحلة جديدة متاع قرص وتشويش وكل قطعة تتحك في البدن تاكل ما كتبلها مع كلمتين سماح من نوع وليتوا زنزي ويديا تفركوا في جرتكم يفرك يديكم , شعرك باللبزة نحب نعرف منين جاتك يراك في اللبزة خلي نرتاح ,
وتقعد احسن لقطة هي اخرها وقت فاضل الماء الي في البانو يتصب عليك باش تشللك وتنشفلك لحمك وتلحق ما فاتها من قرصان وتشويش وتربطلك راسك بالبشكير وتقلك برة حط الميدة وشوف دروسك ونادي خوك يخويك ويرزيني فيك …
اما خير زعمة رومنسية قبل والا رومنسية توة ؟
اليوم هزان دبش سلسبيل بنت سجيعة جارة سلفت اخت مرتي ، طبعا العرس قريب ولازم نمشيوا خير ما نقعدوا حديث خاصة هوما جاونا في طهور شادي ولد رشيد حوانتي الحومة ، ايا قلت للصغار يحضروا باش نهزوهم قامت قاتلي راهم وصاوني بحبوا الكرهبة فارغة يطلعوشي معانا نساء يمشيوا لدار العروس …
لبست سوريتي المنورة الفاروزي ولبست مرتي قفطانها الوردي الي تسلفتو من مرت خويا وعملتلو عطفة بالمساك خاطر طويل عليها شوية وقصدنا ربي ودوب دخلنا زغردوا علينا الحق ومدولنا كاس روزاطة باردة تشره وكعبة بتي فور وقالونا نستناوا الكراهب يجيوا من دار العروس ، ايا احنا هكك وعم العروسة يحكيلي كيفاش جارهم من قبلة بنا على الثاني وسكر عليهم الهواء وطيح الطابية وحرمهم من كعيبة هندي ونسمعوا في الكراهب تزمر بيب بيب … وقالوا شكون مولى هاكي الكاترال يبعدها باش تدخل الكميونة الي ماشي تهز الجراري والبيبليوتاك والمسند.
ايا قمت كيف الناس الملاح وبعدت كرهبتي بعد ما ترحرحت مرتي القدام وجابت ثلاثة نساء معاها اخف وحدة فيها توزن 120 كيلو لين الكرهبة بركت طبست عليها قلتلها ياسر عليها الكرهبة راهو توة يطيبوا الامورتيسرات ، قاتلي بالله اسكت وانت ديما هكة قلبك على الكرهبة تقول ما كسبتها كان انت يصفى ما بجرالها شي وعيطت لمفيدة قالتلها ايجا ايجا ترص جنبي القدام كان ما لقيتش كرهبة وجات مفيدة …
ايا حكمت عليا نشد وراء الكميونة الي فيها المزاودي وما نخلي حد يدوبل علينا ، وفي كميونة المزاودي عاد البنات والاولاد يتشاطحوا ومرتي تخرج يدها من البلار تقول مركات بونتو والا هزينا البطولة وتقلهم قولولو يغني نلمو نلمو نحبو ونكره امو … ومفيدة تقول والله يشره جوهم وانا تحصرت هوني ومنكب راجلك في صدري قريب ينقبني وهي تقلها اصبر شوية اهو قريب نوصلوا ونسيت عاد نقلكم الي روبة مفيدة بالرشراش ووركها يحك في فخذي وسروالي ولى يلمع خرجتني كيف الرقاصة ،
ايا وصلنا لدار العروس واستقبلونا بالزغاريد وري ري ري وهبطنا وخلاونا الرجال في الفيراندا والنساء دخلوا يريڨلوا الدار وكل قطعة تتحط ري ري ري ري وجابونا كاس السيترون المحنون وكعبة ملبس ، ايا قلتلها اخرج نمشيوا شمازال قاتلي حتى نكمل معاهم حطان الدبش ، وانا نستنى تقريب النساء الكل خرجو الا هي خرجت اخر وحدة ، قلتلها بالله شخلاك لتوة قاتلي ماهم عطاوني القلاصن والبوسطوات نخليهم في قجر القلص والله يشدوا اليد ايا اخرج نمشيوا اوكة مادام شي ،
هكك وعيطت لهاكة الثلاثة قنابل الي جبناهم قاتلي نرجعوهم ياخي قلتلها هات نرجعوا مفيدة ما فيها باس وخليها جنبك قامت قاتلي مفيدة مشات مع الطيب ولد اختك خير خلينا بالخف هكة يفكو من شبايك البلاء الطيب ، قلتلها لا والله ما فيها باس كات قلتلها تجي معانا ربي يهديك … ورجعنا للدار عاد والعاقبة الافراح عندكم وكيف تستحقوني كلموني المهم نهز مفيدة معايا …
اختتام مهرجان الورد بأريانة بورشة فن تشكيلي
وسام الجمهورية لمنجي الباوندي الحائز على جائزة نوبل للكيمياء
روسيا تطعن رسميا في شرعية رئيس أوكرانيا
صحيفة أمريكية وثّقت 90 حادثة استهداف من الاحتلال لمستشفيات غزة
124 دولة… لن يتمكن نتنياهو من دخولها إذا صدرت بحقه مذكّرة اعتقال
استطلاع
صن نار
- ثقافياقبل 8 ساعات
اختتام مهرجان الورد بأريانة بورشة فن تشكيلي
- تونسيّاقبل 8 ساعات
وسام الجمهورية لمنجي الباوندي الحائز على جائزة نوبل للكيمياء
- صن نارقبل 13 ساعة
روسيا تطعن رسميا في شرعية رئيس أوكرانيا
- صن نارقبل 13 ساعة
صحيفة أمريكية وثّقت 90 حادثة استهداف من الاحتلال لمستشفيات غزة
- صن نارقبل 13 ساعة
124 دولة… لن يتمكن نتنياهو من دخولها إذا صدرت بحقه مذكّرة اعتقال
- اجتماعياقبل 13 ساعة
افتتاح الملتقى الوطني للتكوين المهني
- صن نارقبل 15 ساعة
مدّعي عام المحكمة الجنائية الدولية… هددوني، وأحدهم قال لي: “هذه المحكمة مجعولة لإفريقيا وللرئيس الروسي، وليس لمحاسبة الغرب”
- صن نارقبل 15 ساعة
نجل شاه إيران السابق… “رئيسي” كان قاتلا وحشيا ولا يُؤسف عليه!