ماهو عاد العاقبة عندكم مشينا لنزول المنصف ولد السيدة خلت سلفت مرت الهادي ولد عمتي ، وهوما الحق دار العروسة قالولهم جيبوا القريب القريب والا شهزنا حال ،

ايا مشينا لدار العروس باش نهزوا معاهم فياج بعدلي قالونا جيبوا الكراهب فارغة ، اول ما وصلنا نلقاوا هاكة الراجل الي يهلل ويكبر في الزنقة وتلقاه في كل عرس وينظم في الكراهب انت اوقف هون وانت استنى نخرجلك الكرهبة الاخرى وانت شكون معاك وقداش نزيدك … السيد هذا اسمو الطاهر طلع ، ايا راكينا ودخلنا بالزغاريد وقعدت في وسط الدار مقابل شباك البيت الي يبدلوا فيها النساء وكان معرج شوية باش يتبردوا وباللازمة نسيت حتى شقدمولي نفر كان في فمي يرحي وبرة في الحلو ،

هكك وجاء الطاهر كيف الشيطان وقال ايا يجعل منكم قوموا حلوا الكراهب خلي نعبيوا ونمشيوا شمازال عاد ، يا طاهر راهم مازالوا يبدلوا في العقل يا طاهر من طولك من عرضك وشي قال توة نخرجهم ها النساء ،

ايا خرجت المارا وتنصبت جنبي والطاهر يمشكي فيهم انت اركب هون وانت خليك مع فلان وانت استنى شوية ، هكك وجابلي ثلاثة عزاوز قلي ايا اهم هذم معاك يباركلك لا تباركلك يا طاهر تسخايبني ماشي نوصل فياج للعمرة عاطيني ثلاثة قاطعين الغسلة والممو حشاهم في كرهبتو ، اما شماشي نعمل لعنت الشيطان وشديت الصف متع الكراهب هكك وامك نفيسة تقول اووه يشويه الطاهر خرجنا كيف مذاهيب الشيرة اوكة خرجت بشلاكة الشمع وما لبستش دماقي ، يجعل منك يا وليدي اهبط جيبهولي اوكة تلقاه في شكارة بيضة تحت سرير بيت النوم ايا بدينا في ها الليلة الكلبة ،

وهبطت نلوج من كرهبة لكرهبة نلوج على مفتاح الدار وفي الاخر طلع عند بو العروس الي سبق في كرهبة العروس ، وجاب ربي خلاوا شباك الميحاض محلول سلبطنا وليد صغير من غادي حلنا من داخل ومدينا دماق نفيسة وقصدنا ربي.

احنا في الصف بيب بيب بيب وعيشوشة تقلي يا وليدي بالله تلقاشي حماص اوقف صرفلي خمسة لاف نستحقهم للرشقان ، تقوم نفيسة تقلها بالله اما رشقان ياخي نسيت امس العشية مشينا للوصف شعزاك وليت تنسى يا عيشوشة ، وبداوا عاد هاكة الثلاثة عزاوز في المافيولا متع الوصف وام العروسة وخلتها وامها وبوها الي يدور دورة ويقلهم ايا كملتوشي قبل ما يمغرب المغرب وترصيلكم تكملوا الوصف على الضو والخساير …

ايا وصلنا وقامت امك فطومة قاتلي يا وليدى انا في الكرهبة ويجعل منك جيبلي مشيرب ماء نشرب دوايا والله خرجت ونسيت ما شربتوش جاب ربي ديما فوقي هو ، وجبتلها الماء وهبطتهم ودخلنا وانا نلوج على الطاهر وصلشي ولا ريحتو ، والناس يستناوا باش يدخلوا مع بعضهم وهذا وين هذا فين زعمة عوقت بيه الكرهبة …

هكك وكرهبة جايا تزمر وبو العروس مشالوا يا طاهر ماهو لاباس شبيك لتوة ، قلو لا هاكة البنات اشتهاوا كورني جيلاط من عند العارم عديتهم بنيات بكر العزايات انا ملكدلي عيشوشة ونفيسة وفطومة وهو يضرب في الجيلاط مع الفستق … برة يحط قلبك يا طاهر ويعمل الله في الرجوع …

اخر ضربة في العشاء وكيف العادة فرشت هاكة البساط على الفيراندا وجبدت الراديو نبعول فيه ونستنى في ليان الهندي وبرج الدلاع ، ونسمع كان في صوت من البرسيانة الي في الفيراندا يقلي :

كهو انت كل ليلة اقعد لوج على البرود وبعول هاكة الراديون الي طول النهار يخشخش ما فهمتش كيفاش تسمع بيه ، ايا اسمع اليوم ماهو جور فريال ، دبر راسك هزني لاي مطراح المهم نخرج

– اما فريال الي نهزك ليلها زادة ، فريال هذي يا نمشيلها وحدي يا لوح

– هكة راد الله عليا الراجل ما يفهمش بالسوري ، معنتها الليلة فيشطة والناس مريحين فهمتشي توة

– وفاش قام يرحوا ياخي العيد جاء فيسع؟

– راك قريب تجلطني يا راجل ، اليوم عيد المرأة وتوة نشوفك عاد شتهديلي موش كل مرة ادكها تحتك وتسمع وتسكت ، الي يقلك سجيعة اختي كل عيد مرا تجيها قطعة ذهب وانا حتى عرف تل ما جبتهوليش خليني ساكتة برك

– موش في مارس عملوا عيد مرا زادة وقبلها عيد حب واهو عيد ميلادك قريب ولحق عليه عيد عرسنا ؟.. لا بالكشي نخدم على اعياد النساء انا ماذا من اعيادكم؟ ايا تعرفشي كيفاش مادامهي فريال وفيشطة شقولك نكلموا سجيعة اختك وتعصبلونا هاكي دوارة العيد الي واخذة بلاصة في بيت الثلج ومضيقة على شكاير الجلبانة والفول وتوة نجيب اللبن ونعديوه نهار ماصارش

– ولا موش ماشي يصير راهو ، انا نقلو عيد النساء وهو يقلي دوارة ، ايا نندب والا نستنى حتى يتلمو ، الجموسي ومن دراك غنى على النساء وانت تقلي سجيعة ولبن ، هزنا لبعض المطراح نبرد خليقتي والا للبحر نشقشق لحيمتي ونتعشاوا البرة كان هذا ،

– الجموسي قال ويقوللك هذا عسل وهو صحن هريسة ومن الابرة يعديوا جمل ما قالش هزوهم للبحر وعشاوات البرة ، يرحمو فهم الطرح من بكري ، ايا شعندنا فيه توة ، قلي وين تحب تمشي باش ننفخ عجالي الموبيلات على بكري وحاول تضعف شوية شلعزة ياما نهار تتقرض العجلة

– والله لشكون تحرقص يا مرت الاعمى ، انا قلت نلبس قفطاني الفاروزي ونحمر خديداتي وهو يقلي ينفخ العجالي ، ياسيدي كلمت سجيعة وجاية هي وراجلها بالكرهبة يهزونا معاهم اوكة ماشي يهزنا للكازينو وبعد يعشينا البرة دجاجة مصلية انت هز سطوشك واخرج وعلى الاقل هو يوصلنا وانت خلص الخرجة وقول يعيش النساء الله يعيش النساء ..

اصعب مهمة يعطيوهالك في العرس هو انك تجيب الصناعة وترجعها , يقولولك اوكي في السلطنية زنقة ندرا شنو وامشي عاد وابدى اسال على الزنقة ورتيبة الصناعة …

بعد عناء من زنقة لزنقة توصل وتدق الباب تخرجلك امك رتيبة وتقلك توة جايني وانا نقلي في عشايا ايا تعرفشي باش ما نبطاوش برة جيبلي رطيل بصل وقرنات فلفل وحكة طماطم ونمشيوا , تمشي تجيب القضية وتستناها وتقلك يسالشي نتعداوا في عرافنا لبنتي نجيبوها تكمل تطيب هي عشاء بوها واخواتها , بنتك وين يا للا رتيبة ؟ اهي هوني في قرمدة , نمشيوا لبنتها ونرجعوها للدار وبعد تقلي ايا استنى عاد نبدل سفساريا ونهز الماعون الطار والبندير والدربوكة , تدخل وتخرج معاها صر الماعون وتركب دوب ما نشدوا الثنية تقلك يشويني كيف مفهوبة الشيرة وليت اوكة خرجت بشلاكتي عوف نلبس دماقي برة يفبت غرستك نرجعو نلبس الدماق ,

برة ترجع , وقتها تقلك ايا شد فنيت قابس نهزوا لطيفة وبنتها الي يخدموا اعمايا , شدينا فنيت قابس , ايا هذم وين يا امي رتيبة ؟ فعلا عزاهم البلايص تبدلت عليا وقيلا في حي المعز برة ادخل توة نولي نعرف وين , ايا ما نطولوهاش توصل للطيفة وبنتها وتلقاهم مازالوا يكملوا في طلية صابون , ايا نكملوا ونمشيوا يا رتيبة وادخل بحفانا ودخل هاكة السبتري الي اعماك توة نعملولوا كاس تاي , ما نحبش تاي اخرجوا برك …

ايا يخرجوا ونوصلو لدار العروسة في ثنية العين , يبدى عاد الزغاريد اسمع افزع الصناعة جات ويبدى التشفشيق والله كريم والرشقان … ايا اهم كملوا رتحنا , يجيك بو العروسة يقلك برة لا يقطعك وصلهم ماك تعرف منين جبتهم , ايا تركب رتيبة ولطيفة وبنتها وتقلك نوصلوها هي قبل راجلها حنظلة لطيفة وما يحبهاش توخر , تقوم لطيفة تقلها ايا هات الجورني يا رتيبة اوكة خيرات الرشوق اليومة , تقلها لا خيرات لا تسمع الكفب وخيتي عاملين 10 لاف من وحدة لوحدة ترشق بيهم وعلى العشرة دينار عندنا ماك تعرف حتى ام العروس قالت عطات 50 وانا يراهم بعدي , اهي 10 ليلك و10 لبنيتك وربي يهني الامة يا لطيفة ,

تقوم لطيفة وجها يطوال وتقلها ما يزيش قد جياني وسفساريا لحسة بلصقة بالحنة وبنتي يديها طاحو بالطار اما شماشي يعمل الميت قدام غاسلو هاتهم وبرة ويجبر علينا ربي , ايا عيش وليدي اوقف ناخف الخبز للعشاء وفرد مرة خوفنا قازوزة يباركلك , ايا تراكي وتقضيلها وتقلك والله لا عندي صرف كان واتات خطرة اخرى تعدى نعطيهملك هاك عرفت الدار ,

ايا توصلهم وتشد الثنية للسلطنية والمغرب غرب وبدا الظلام , يا امي رتيبة ايا قلي منين ندخل لدارك ؟ تقلك وليدي فعلى بوه الدنيا فلام وانا النفر جمالي اوكة في راس الزنقة دجّاج عندنا وانت زيد شوف , توة شماشي تشوف وفمة دجاج يقعد للمغرب هو؟ , باهي عندكشي نومرو ولدك والا حد نطلبو , تقلك كونشي المنجي جارنا نومروه في السطوش خاف شوفو ,

ايا تراكي وتحل السطوس وتلقى مخزن غادي يا لوبان يا محرمة يا سواك يا بلوطة ملحومة بالوشق يا دوارو وعشرينات …. وتطلع ورقة فيها نومرو المنجي وتطلبو يقلك انا في القهوة نلعب في الرامي كان تحب ايجا استناني نكمل وندخلوا مع بعضنا , وتعدى للقهوة وتستنى المنجي ويركب وتدخلوا وتوصل رتيبة ودام الفرح وربي يكمل ويهني ان شاء الله