تابعنا على

من يوميات دوجة و مجيدة

مجيدة تعمل في البسيسة

نشرت

في

البسيسة الصفاقسية بنة و منفعة - YouTube

– اووه يا مجيدة ساعة ملطوخة قدام باب الحوش ويديا طاحوا وانا ندق في الباب شلعزة وين غاطسة

ياسين الرباعي

– بالله يزي عليا وبرة يا دوجة , ليدك في العاهد الله لا سمعتك , مفرشة جلد في الدويرة ونقي في فتيتة قمح قلت نعمل بسيسة وسيدك قادر ماهو بشيمتو مدفونة في هاكة المغبون الراديون حاططهولي على الطياح ما خلاني نسمع شي

– وششه والله فكرتني في البسيسة قريب توفالنا وسيدك النوري كل صباح ما يخرج الا ما ياكل كعبات عليق بالبسيسة توة نعيدلو ياخفنا الحمص والفول ونجي نعملها بحفاك

– وخيتي ايجا مرحبا اما راني عويناتي وفاوا لا نجم نقي ولا نغربل كيف راد عليا ربي , حتى طريف القمح وليت ندعدس بعويناتي قام سيدك قادر نقاهولي والله خرجهولي يشره يباركلو

– كان للسعد ماهو حال هكة الكناين يعملوا اعماك يا مجيدة والا هاكة مكبوبين السعد الي عندي غير هكة راد الله علينا

– بالله استك عليا انت , حتى يقدوا غسيل روسهم وحومتهم طولك يا نهار الي هافي تحفر روحها وتهز صغارها وتقول يا دار بويا تقول شعماتلهم والا في وجهنا كروع يعطيهالهم بين الفلوع ويرشق في عينهم مطلوع , وما قهروني كان هاكة الاولاد متاعي في جرتهم لا يقولولهم اكدسوا اعملوا حويجة مع امي ولا شدوا بيتكم …. ومن العشية للعشية الي هافي تكر شلاكتها وتجي تلهدني ببوستين وتقلي امي تسلم عليك يا امي مجيدة وتشد بيتها , لين يسلموا عليا بالكشي توحشت خليقتهم انا , وحش الصيف قاطع ما حاشتيش بوحشهم

– الكل كيف كيف تقول بازقين في افام بعفهم يعطي ما يهدهم , حقة يا مارا ياخي ما تقليش دربالة مرت خوك خليفة شكان بها سمعت بها مريفة في حالة

– ليدك في العاهد الله حالتها تبكي الحجر يا دوجة , في غير جاهك رقدت وقامت تلقى فهرها يابس لوحة لا تتحرك لا تتورك , لا بعد رقدت في القاعة على جلد منو للحصيرة وجرتها على عين قفاها ليلة كاملة صبحت في غلبت كراية تحرك , حتى سيدي خليفة بحفاها بايت بخلوا يمشيوا للسرير اما لاباس الحق صبح , اوكة عاد ما خلاوا باش بلحطولها بناتها لا خلاوه فليّو ولا خلاوه زيت زيتونة وشي , لين جاني لهوني سيدي خليفة وقلي كلملي عمك الصادق يهزهولها يدلكها ويمسدها , الحق ملي مشالها تفهنت شوية يجعل يويداتو ما تعرف على نار هاكة الراجل

– يا لطيف هافا الكل يجرى فيها دربالة وما نسمعش , اع عليك علاش ما تقليش راني مشيت طيرت عليها السو , يالا توة نعدي عليها وقت نمشي لحبيبة بنتي ماهي جويرتها تتسمى , اخر مرة ريتها في الخميس متع فخفاخة يرحمها , انت ما مشيتش عاد تعزي يا مجيدة سالوا عليك بناتها

– ماهو نهارتها خلينا كازي والا فيازي والا شسمو ولد كمونة في القعادة , والله قهروني بالاسامي المقلبة قد ما قلتلهم سميوا حاجة نجم نقولها وشيْ خلاتني بقة في حيط وسماتو كيف ما حبت هي يعطيها كية

– ههههه يشويك يا مجيدة قتلتني بالفحك , نيازي اسمو نيازي انا ما حفظتو الا ما مهيرية ليلة وهي تقلي عليه

– ايه وشكون عاد جاء للخميس يا دوجة؟

– ما كدس حد عليها وخيتي الدار تملى وتفرغ , عزيزة كانت لا تفر لا تافي والله تشاواوا عليها الناس الكل الا هاكة الشايب متاعها شادد كرسي في باب الحوش وعينيه على البنات الداخلة والخارجة ويسال هافي شكون وهافي بنت شكون , اول خميس وهو يخطب يعجبكشي ها الحديف تقول كان يستنى فيها تقبل , بناتو يقولوا يا بويا موش وقتو توة اكدس مع الرجال , وهو يقلهم ماهي فرصة ياخي بعد عندي سقين باش ندور في الزنق ونلوج ؟ توة هافا راجل هافا لا يحشم لا يكابر يعمي عينو ان شاء الله

– هو بيناتنا لازمو مارا يا دوجة بالله هاكة البنات كل وحدة تشد دارها بعد واولادوا الي هافا يجعلوا يقوم بمرتو وصغارو وهو شكون بيه ؟ هافا حلال ربي العالمين هي عرفت مطراحها وربي يرحمها وهو ما ايلو الا بمارا راهو , انا والله فكرتلو في شافية دباشة اخت راجل عبيشة بنتي ماهي تصبات عاد وما خفاتش وزيد ترتاح منها عبيشة راهي حريقة وقبيحة كلمتها تقولها وما كفبوش كيف قالوا اخت الراجل كيف العقرب في الطاجن , حاكة افيم عبيشة بنتي مسيكنة

– وخيتي اوكة يلوج هو وعويناتو تتشاعل كان هافا توة نبعفلو مع حبيبة بنتي تقلو على شافية هافي , اما هو يجبها صغيرة وبيفاء ومزيانة يحب يغرم شبابو الراجل , الفلوس ماهم بالبالة وهو والله شادد رويحنو عاد لين ومن صلو مزيان قشرتو بيفة حمراء ماشي تنطر الدم وكمل بناتو عينهم محلولة لامهم يرحمها , توة يرفاولك بلي يجي لبوهم

– احنا نقولولهم عليها ويراها ويدبروا روسهم بعد انا تعرفني في الماخفة لا نحب ندخل لا نولي مشومة بعد , يصفاوا على بعفهم الكل

– توة نبينا ونصليوا عليه يا مجيدة , انا جيتك نحبك تجي تعملي فتيتة برغل سيدك النوري قلي برغل مجيدة وحدو وما تعملهولي كام هي , ايا وقتاش تجيني باش نقلو يقفينا

– وخيتي وانا مازلت نجمها حركة النعمة ؟ حد التغلية نغليهولو اما الحكان خاطيني راهو

– لا حتى هو قلي انتم احركوه وغليوه وانشروه وانا نحكهولكم يباركلو في صحيحتو , اوكة البنات زادة بين يدينا وكان هافا اعمل حتى نفيص ويبة ليلك نعرف سيدك قادر يحبو

– باهي مالا اقفي قفياتك وقلو ياخفنا ويبة اعماكم ونعملوه حتى احنا عقب برغلنا

– ايا يباركلك يا مجيدة ويشدك لا يهدك خلي نمشي والله خليت الدار حايسة توة نحكيوا بالوهرة عاد وقت نحركوا النعمة

أكمل القراءة
انقر للتعليق

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

من يوميات دوجة و مجيدة

مجيدة في الحمام

نشرت

في

– يا مجيدة شبيك ملي دخلت وانت ساتكة اللطف ووجهك طويل تقول قتلنالك بوك اللطف علينا

– يا دوجة انا تعرفني نفسي عزيزة وراني ماخفة في خاطري من حبيبة بنتك وعازز بيا اهو نقلك زادة

– اووه اووه اللطف الريح البرا , شبيها حبيبة ياخي والله ما فيبالي

ياسين الرباعي

– انا نقول دوجة وبناتها عايلتي هاكم وما عمري خبيت عليكم حاجة ولا عملت حاجة وما استافنتكمش فيها وتوة نسمع من برة الي حبيبة حركت العولة ومن يومت غدوة قلات المقروف وحلت صينية مقروف ابيف وبعد شقلي وشقتلك تحفر في روحها ماشي اطهر ابنها , انا كان موش سيدك قادر مشى يحجم عند سيدك حسين الزواري الطهار وحكالو وقلو كلموني على الطهور ما نسمعش , اع عليكم تعملوا هافا الكل ومجيدة في طرف السالم عاد شبيه كان جيت معاكم للعولة والا عاطيين كان يا دوجة هات غرابلك وترجعوهم كيف الحنكالة عوف تشمسوهم قبل ما ترجعوهم , انا والله لاني على حاجة اما غافتني من حبيبة الحق محسوب اميمتها انا

– يا مجيدة وايدك في العاهد الله ورحمة بويا عبد الله جاء كل شي مع بعفو اللطف وحبيبة حبت تقول للجماعة الكل غير ماك تعرفها تسكن فوق هاكي العزوزة حماتها وما تحبش خومافة وحس قالت فك عليا وتوة نفوقهم صحين صحين وبرة الي ما ناديتهمش والطهور يلمد الكل

– صحين صحين ؟؟ بالكشي مخصوصة لمحمصها انا والا مقروفها انا , وحتى للطهور حلف عليا سيدك قادر قلي الي ما عرفش بقدرك مية سنة عليه وابني عليه طابية

– لا والله ما صارها يا مجيدة وانا جيتك اليوم باش نقلك اوكة حبيبة مستانفتك تمشي معاهم للحمام نهار الطهور وجيتك من جناب الله نحي الغش اللطف علينا متاع هافا احنا وسيدك قادر خليه عندي توة نخلي سيدك النوري يكلمو ويفهمو , ايا يزي من عياهك حبيبة بنتك قبل ماهي بنتي راهي

– وانا من عامتاش تعرفني نحب الحمام من نهارت زلقت فيه ومخروقتي تلاوات وانا لتوة نعالج بها

– والله ما سمعت شبيك لاباس وكيفاش زلقت يا مجيدة وخيتي

– استك عليا وبرة ماهو خف عقلي ولقيت رتيبة كمونة كنتي ماشية قلتلها نمشي معاك وهزت هاكة مكبوب السعد خوها الصغير امها قالتلها هزوا معاك راهو ولى كيف السحاق وغسيل المطهرة ما ينظفش بالباهي

– ايه ومن بعد ؟

– حفرت صري وهزيت كعيبتين ليم وبلحست كعيبتين عجة بالسكر وخليتهم قي سريفتا ومشينا , اهي المغبونة خوها كبر يقرى في الساتت راهو قامت قرطتلو راسو بفولارة ولبستو روبة زعمة زعمة طفلة معانا , احنا وصلنا ومولات الحمام شكت فيه وقالت الف وغف بالله لا يدخلها الطفل ولى يعرف وما يصيرش منو يدخل , ايا كلمتها انا وخفات بخاطري قلنالها توة نغسلولو راسو هو الاول ونخرجوه يستنانا على السطحة ويباركلها قالت باهي , ايا دخلنا وخفات هي خوها تفركلوا في لحمو وقاتلو برة شلل في المطهرة واخرج البرة , الطفل بلاء ازرق راهو ولى يحل في المطاهر على النساء ويتفرج ويهرب من مطهرة لمطهرة وهاكة النساء يتعايطو نقوم انا نجري في جرتو قلت نخرّجو ونخرج كيف راد علينا ربي طف ونعفر في كرتل ماء ونبرك على قبقاب بمخروقتي ونطلق العيطة طلعت عفيمة بو زارع تكسرت والا شاخفتها ولاوا وهزوني كدس وانا عيطة في السماء وعيطة في الوطا تقول مرا تطلق ورصاتلي في الحادف ليلتها وهاكة التوفيق ابني يقالع بيا والطبيب عطاني حريبشات وقلي ما تقعدش على زهمك على الاقل جميعتين ووليت نرقد على كرشي كيف القلاية وجاري فيا وخيتك وتوة الحق لاباس نكدس بالوهرة وليت

– هافا وقتاش وشبيا ما سمعتش اللطف

– سيدك قادر قلي ما تقول لحد توة الي يسمع يجي ويتحل علينا باب مصروف وخسارة وزيد الي يجي شكون يقوم بيه رصاتلي وخيتك ساتكة بدايا والي يجي حتى يطل نهز روحي وناقف شقلي وشقتلك ما فمة شي

– ايا الحمد لله ما عندك سو , مادامك افهنت توة تمشي معانا للحمام اوكة الجماعة الكل ماشين وشرينا الدربوكة والطفل توة فلافة ايام وهو يتنفخ مع شوش الورد وحبيبة قالت ما نهز ولدي كان في كروسة وبموزيكة الباي يجعل منو مولى بيتها مشى كرا الكروسة والفرقة رغم امو قاتلو لا ولين الخسارة اول مرة ما يسمعش كلامها يا لندرى كيفاش جاتو , اوكي تشنفر وادنفر كادسة , انا قلت لحبيبة انت قلها على كل شي نحي اللوم من عليك والمكابرة فيها بركة وهي تصفى تجي والا تقعد

– هافا طهور بالوهرة والكار قاعد يعطيه الصحة اما ياسر عليهم مسيكن منين عندو راجلها

– هاكي الشوية وين مع امو خاطرو شرى موبيلات بالكنابل وباعها بالحافر والفلوس للطهور وامو سمعت وكانت تعقل اوكي عاطيتو قلة السماح ويزي عليا وبرة , الراجل يحب يفرح بولدو عندو الحق وهافي رفاية الوالدين من شيرة اخرى , ولى ومشى كلم خالو امو تقلو يا سيدي وما تلويوش العصا في يدو قام جاها وقلها تفرح مع ابنك ويزي من عياهك ولات وكابرت خوها

– ايا ان شاء الله فرحتو يقصف قدو قاملو الزهر , غير حشمتني وتعرف قدرك وقدر حبيبة والا كنت حالفة ما نمشيش , باهي توة نشاور سيدك قادر ونتعدالكم الصباح نمشي معاكم والله حتى انا خمجت هاكة الجمعتين ما غسلتش راسي بعد الي ما نجمش نكدس في غير جاهك على كرسي المطهرة , وفرد مرة نطلق شعيراتي ونظف لحيمتي وتوة نهز الملقاط اعملي حواجبي غادي فرد مرة فمشي ما سيدك قادر يترهن في الدار وهو ولالي طول النهار البرة وفي الليل ياكل الفم ويتمغط تقول ما عندوش مرا

– والله الكلهم هكك يشويهم ها الرجال لو كان يمشيوا لعرس تبدى عينيهم تتشاعل اللطف تقول احنا موش نساء معاهم واحنا الي يقلك القشرة البيفة والوجه ماشي ينطر الدم بالصفاوة هاكة راد الله علينا يا مجيدة ايا خلي نقوم نمشي توة في الحمام نحكيوا بالوهرة هافي جية مستعجلة راهي خليت الراس يفور وجيتك قلت نهزوه معانا للحمام غدوة ومعاه جريدقات توة نمشي نعملهم والله ينصر من صبح كيف نرجعوا للدار نفطروا وبرة

– يزي فيه البركة مالا لين ياخي ماشين ناكلوا احنا اللطف

– ايا سعيدة وياخف بخاطرك ولا يقطعك علينا

أكمل القراءة

من يوميات دوجة و مجيدة

مجيدة تخمّل في ڨلصها

نشرت

في

– يا مجيدة توة ساعة بحفاك وانت لتوة ما طبعت صورديك على القاعة ، بلي خلق محمد اكدس ختولتلي عينيا

– بالله وين نكدس وين يا دوجة هاكة القلص كيف راس المجنون بعدلي هاكة الكناين الي يوجعها راسها تجي لڨلصي الي تلوج على طلقة وشق والي وفاتلها دبوسة الافاح واهو حتى بوسطواتي طمعوا فيهم افنين ما لقيتهمش الفاروزي والسيكلاما ارف وكانتلهم بلاعة

ياسين الرباعي
ياسين الرباعي

– اع عليهم مازالتشي حاحة اخرى ما يهزوهاش ها الكناين وبعد نوليوا مشومين وبينا وعلينا يراهم في تركينة ، كهو عاد شدوا الديار ولاوا يحشيوا خشمهم في كل شي

– انا كرهت كدست الدار منهم السهرية والفحك والوهرة في بيوتهم مع رجالهم والتڨربيج وتشييح الريق والوجه المشوم في خليقتي يراهم بعدي الافنين ، حتى لقيت رتيبة خارجة لامها تهزلها فتيتة نعمة قلتلها تعدى للبلاد خوفلي قفيات ، لا بعد قاتلي مسكرين يسكر حلقها

– بالله وانت شعندك تقفي يامجيدة اوكة بحياة راسو سيدك قادر يكركر ويجيبلك ،

– والله كلام وفيه العيب يادوجة قلاصني تهراوا قلت تجيبليشي نفيص طزينة قلاصن ، اهو نلوج في جبتي الوردية قلت نفتقها ونخيطشي منها بونتيات وقلاصن والله سيدك قادر قلت نعملوا منها حتى افنين يبدل بيهم مادام مسكرين الحوانت ، ما لقيتهاش اللطف لندرا وين غبروها

– استك استك موش جبتك الوردية الي لبستها وقت خليتو ولد سجيعة في القعادة ، اوكي ريتها مفتقة ومنشورة على الحبل قاتلي رتيبة ماشي ترص فيها المخادد شقوفاتها تهراوا وطاحوا ريش

– يراها اطيش وياكلها الحشيش ، توة هافي مارا هافي تهز وما تقولش وانا نعيمي طار عليها ، توة قلي شنعمل تراه كان نكلمها نشوام وكان نسكت ترصيلي انا وسيدك قادر بلاش قلاصن ، اهي روبتي متع الحركة الزمنية والله جديدة مازالت اما تصفى توة نفتقها هي وبرة ، ايا انا جيتك نجيب مريغة التاي ونكدسوا بالوهرة

– بالله وين نكدس وهاكة الحرايق الي عندي في الدار ما يطمنو شي وسيدك النوري تعرفوا ما يحلالو الحديف والقعاد كان اعمايا نمشي نطيبلو فم ونبخر بيتي فمشي ما ربي يرحمنا

أكمل القراءة

من يوميات دوجة و مجيدة

دوجة ومجيدة مشاوا يعشيوا

نشرت

في

ياسين الرباعي:

– ايا ادخل يا دوجة ادخل الواحد ما يشهد لربي كان في دارو زايد , انا كان موش مشية لازمة والا شهزني حال غيرشي وليدها جاء من العسكر والا يتمشالها كريشانة اللطف

– انا كيفك نصل يا مجيدة , توة ما تحركش دويرتها وتفرش كليم عليه القيمة وجليدات سماح , خلاتنا هكك على كليم بصقة بلعقة والجلود منصولين حتى سفسارية تعبى بالرابوش والفلفولة , وهي , تعرف دارها مقصودة والخاطر ماشي جاي

– توة احنا نتعداوا يصفى جيران الي يقلك وما بيناتناش , اما قدام جماعتها وجماعة رويجلها هكك ؟ اع عليها من مرا , انت ريتشي هاكي المرا الي كادسة ومادة سقيها وجنبها صبيبية , هاكي فوراتية عرفتهاشي سلفة معالجة مرت عمك سعيد؟

– يا تبارك الله هاكي بنيتها ولات صبية ما شاء الله وكيف سبتهم في كريشانة جاوا ؟

– ماهي كريشانة قالت لعمك سعيد خليوهم يجيوا تحب نارا الطفلة لولدها وباش يراها هو زادة , اوكم فاهرلي عجبتهم وماشي يتكلموا عليها

– هي البنية تفهر حليلتها طبقة وجها سمحة وكل ما فيها فريف وبيفة واطرافها سماح , اما موش متاع كريشانة راهي اهو نقلك , فوراتية عينها واسعة ووالعة برويحتها , انا وقت ريت الطفلة خفيت فيها عجب , مظرفة حواجبها الطفلة يا شيتي , تقول معرسة , ولبستها قصيرة , لا ما يصيرش هكة اللطف علينا وين تنجم الشي هافا كريشانة

– وانت مازلت تعرف المعرسة من الصبية توة يا دوجة ؟ بالله يزي عليا ماشي يطيروا بنات توة اللطف , ليدك في العاهد الله ليلة ملاك كمونة هزها وجليها تقول ليلة الحفلة وانا نصل ونعاود , حتى من المرا الي تنقي جابوها في الملاك وكلبوا على ايامهم هي وبنات عمها وخلتها , نجي نتكلم عبيشة تقرصني في فخذي لين زرقتهولي تقلي شعندك فيهم البنات الكل يعملوا ,

– يعمل يدهم في عنقهم ان شاء الله توة باهي هافا هكة , لا ياخي ما ربيناش البنات وعرسنالهم بالوهرة وكيف يبدالهم قلم شفة ما حطوهش كان ليلة العرس , والله حبيبة بنتي وعبيشة بنتك فنوات ولا من جابهم

– فكرتني في عبيشة يا دوجة , راهي في غبينة تحرك بنيتي من اخت راجلها الي حاطتها في المنقار , في علاش ما تهبطش لامي , في نقص الدخلة والخرجة وانت تحوم , بالله عبيشة مسيكنة وين كادسة تمشي خلاف تجيني لهوني والا خطرات تهبط للبلاد , والا الفتحي رويجلها يهزها للسينما ساعات موش حتى ديمة , والا مشيان الحمام والمركز تقفي القفية وتدخل , ما كفبوش كيف قالوا اخت الراجل كيف العقرب في الطاجن , ياراها في طاجن حامي هاكي المرا قريب تقتلي بنتي , بعد الي راجلها الفوّ لا، حاكم عليها تولي تغير من عبيشة وتسيب عياها عليها , ولاّشي الفتحي بين اختو ومرتو وقدر كان على عبيشة قلها نقص فتيتة واتلهى بامي حتى يبرد الجرح , اوكي المغبونة توة فلافة ايام ما جاتنيش برة يمشيها لاجية اختو

– جاب ربي حبيبة بنتي ما عندهاش اخت راجل رتحنا , اما حماتها حكاكة يراها في براكة , اوكي تعدي مسيكنة وبرة وكل مرة وكيفاش , حتى كيف تجيني لهوني يا يجيبها رويجلها يا حاكمة عليها يتعدالها عمك سعيد ماهو في زنقتهم يسكن , هو جاي لحانوتو ويعدي عليها يجيبهالي برة يفكو من شبايك البلاء يجيبها الصباح والعشية وقت يسكر يرجعها , هاكة علاش تحب تجي كان اعماه هي تقلي نشبع بيك وزيد على الكميونة خيرلي من الموبيلات وراء الفتحي

– والله حتى البنات هكك كمونة وعتورة وين ما يجيوا ماشين لامهم يا عم سعيد وصلنا ويحشموه مسيكن وهو فيمو ساكت يقلهم كيف بناتي مالا نهزكم انتم قولولي بس وانا نجيكم , ايا يصفاوا الكل في الكل يا دوجة , قلي وقتاش تجيني نسليوا هاكة اللحمات , ماهو سيدك قادر شارا نعجة فيبالو يخليها وعلوشنا كل عام منها ياخي طلعت داركة وشارفة وقاطعة الغسلة , قام فبحها وقلي نعملوها قديد , اوكة عاد فوحتو ونشرتو اللحم وقلت تجيني دوجة ونسليوهم اللحمات

– انت قلي ونجيك يا مجيدة اما قلي قبل بنهار باش نبيت العجين متاع الجرادق حافر من الليل ,

– حتى انا قلتلهم البنات والاولاد وسيدك قادر نهارتها نفطروا مسلي بالجرادق وجيب سيدك النوري اعماك عاد وكناينك الافنين

– وهوما ياكلولك المسلي هاكة الكناين , اطلب اللطف , ليدك في العاهد الله وقت نحرق لحمات العيد خليقتهم لا ناراها , الي هافي افيت افيت وما يحطوهش في فمهم اللطف , وانا ماك تعرف قديدي عاد يا مجيدة واله في الفم كيف اللوبانة ارطب حرير وفاوح وهوما حارمهم ربي , يصفاوا الافنين المهم اولادي ياكلوه وهوما لا لحسوا يخسروا هوما

– لا عتورة وكمونة الريحة ما يحبوهاش لابعد اما وقت يحفر يوليلهم فاوه , ريتشي تملقيط البنات كيفاش , الكريكشة الحق ما يدوروش بها اما المرقاز بالزوز يدين ياكلوه , صحة وبالشفاء اما البلادة ما نحبهاش انا غيرشي نسكت خاطر الاولاد وسيدك قادر يقلي شعندك فيهم يرزيني فيهم , توة هكة من الباب يا دوجة ادخل ونحي سفساريك خلي نكدسوا ونحكيوا شلعزة

– لا خلي نمشي عاد شمازال يا مجيدة المغرب غرب , ماهو فيبالك بيا مستعجلة وفي جرتي عشايا , انا الليلة نبيت العجين ونجيك نحمش الجرادق عندك كان هافا وتوة نكدسوا بالوهرة

أكمل القراءة

صن نار