تابعنا على

من يوميات دوجة و مجيدة

مجيدة دارها قطرت في المطر

نشرت

في

حل مشكلة تسرب مياه الأمطار الي السقف و 10 طرق للحماية

– ايا يهنيك الروى يا دوجة , مطيرة سمحة جاتنا

– يهنيك الخير , الحمد لله يا مجيدة والله حتى من الماجل للخلاخل تعبى اما استك وبرة والله جارا فينا

ياسين الرباعي

– لاه اللطف؟

– ماهو الباشا وقت بنى هاكة الخرخوط ورانا ربط حيطو بحيطنا وما سكرش عليهم من فوق , يا للا المطر بدات وبيتي وليت تسقط علينا في الماء بالغرابل , انا ما فقتش على الاول كنت كادسة في فريشي ونفر كان بالشيء بين اكتافي , ليدك في العاهد الله نسخايبو سيدك النوري انا رمى يدو عليا وهي باردة قتلو توة وقتو هافا , ياخي قلي راهي البيت تكسكس في الماء وهبطلك بين اكتافك , من حينك عاد ولينا نتجاراوا نلمدوا في هاكة الجلود والبساطات ولفينا الكليم وانا وخيتك ندعفر في هاكة الليل وخرج سيدك النوري كلم الباشا ومحسن رصاتلهم فوق السطح بالشكبة يدزوا في الماء هبطوا كيف الفليلسات , وهاكي قلالة تلوق اللوطة تقلي توة يتسوقط رويجلي الماء فوق راسو ومهيرية تقلو يا محسن شدخلك انت طالع الفوق ماهي دار الباشا وفك يدي من شوشتك هي وقلالة ولاولي الافنين يراهم في البين ويكسرلهم السقين والا حال وقتو الشي هافا كان موش عياه , وكانك من سيدك النوري قلي ماجلنا صغير وما فيهش منفس نمشي نفرغ بالركوة بالركوة وولاتلي الدنيا تحوس ويزي عليا وبرة يا مجيدة

– لا احنا لاباس وخيتي ملي هي بدات تبخنس واحنا تلمينا الكل في بيتي ودخلنا الكانون ومريغة التاي وكدسنا وهاكة الكناين مع كل رعدة الي هافي تطلق العيطة وتتحشى في راجلها لا حشموا لا جعرو من سيدك قادر ما اصح رقعتهم الافنين , لين كفت فتيتة الي هافا هز مرتو ومشى لبيتو كانك من كمونة دخللها شوية ماء من تحت الباب بللها الكليم ولات هي والتوفيق لمدوه ودلدلهولها من فوق الباب قلها خليه يشيح للصباح. وكانك من عتورة بيتها عالية الحق غير بس الميزاب في الحيط متاعهم لمد الماء جرتو وقطرت عليهم شوية البيت قام مصطفى طلع سرحولها وجرى الماء باش رقدوا عاد

– اوكة عاد سيدك النوري صبح يلوج في خدام مرمة يصلح هاكة السطح كيف راد علينا ربي , وانا قلت نمشي ندور تحت الطوابي نلمد فتيتة ببوش نبيتو في السميد نعملوشي فم مغلي , هاكة البنات فنكت فيهم الصباح قوموا لمدوا معايا الي هافي دكتها تحتها وسمعت وستكت , لا بعد قالو صبحوا مرفة من الماء متاع البارح على روسهم , والماء متاع غسيل الراس كل صباح ما يمرفهمش هاكة خليني ساتكة وبرة يا مجيدة يعطيهم تمسيدة الافنين

– هاكة قلنا اليوم نوقفوا على محسونة فريخية نسلموا عليها ماشية للعمرة , اما وين توة الزنقة للركبة باللبز وهي دارها مدغورة قاع الزنقة , خلي كان طيب علينا ربي نمشيوا وبرة

– انا كل شي عديتو الا فريخية تمشي للعمرة , كان تلهات بدارها ورويجلها ونقصت حومة وكلام في الناس راهي حجت وهي في مطراحها , وزيد ماشية وحدها بلاش مولى بيتها شقلي وشقتلك ماشية اعما التيجاني حمو بنتها ومرتو , ما كفاهاش طولك يا نهار وراه على الموبيلات توة تحب تمشي اعماه للعمرة , انا خليني ساتكة وبرة يا مجيدة تعرفني ما نحبش الكلام في الناس , كيف ما قلت انت كان طيب علينا ربي نمشيوا نقولوا الكلمة وربي يهني الامة

– لا عاد هي وين على قبل يتسمى تهدت ورافت وكملت عليها هاكي المرفة الكبيرة الي مرفتها , ماهي جاتني نقشت عندي بونتيات قالت ماشي تعزهم اعماها وخيطتلها جيب في القميص تخلي فيه اوراقها ودنيتها وشبعتني بدعاء الخير , قالت باعت فرداتها ومولى بيتها مخبي تقليعة عطاهالها باش تعمل العمرة , والله حتى انا قلت نعمل كيفها ونبيع فرداتي ونمشي يا دوجة

– انا لا عندي لا ما نبيع ولا ما نرهن الي عندي بعتو في عرس الباشا وفيبالنا كل شي بالوهرة عملناهولها اهي توة خرجت شوكتها علينا وفربت الرويجل تحتها واحنا بنات علينا ساس يراها تحت ساس , هات حتى قلنا تحبلشي تتهد فتيتة , شيء اهو عام في غير جاهك وما فمش حبالة , قلنا ندخلوا الربيع ونهزوها لبو جربوع يقرا عليها الحفيظ لويلة , هي قالت لا على الاول وبعد حكات مع مهيرية وقالتلها راهو يشره واعقد النية , الكلنا مشينالو حتى كمونة وعتورة قرا عليهم , كيف الي ركحت المارا وقالت باهي نمشي وربي يجيب في الصواب وبرة

– بالله وقت تمشيوا نمشي اعماكم يا دوجة نصدق حويجة ويقرالي مشوار على ركيباتي الحفيظ راهو الڨرمش وفا عندي , ليدك في العاهد الله لا بقيت نعمل حاجة حتى غمفة النوم نرقد اللوطة ما نجمش نطلع على السرير وسيدك قادر ما يرقد كان في سريرو , رصاتليشي وخيتك كل واحد في مطراح راقد , نقلو اهبط بحفايا يقلي نحب كان فرشي , الشيخ يتسبب وطاح عليه غربال

– حتى امها قالت تحب تمشي اعمانا وقلنا ناخفوا دوارة نعصبنوها هوني ونهزوها معصبنة حافرة ونعملوشي لولتين غادي حتى سيدك سعيد قال توة وصلنا ويبات غادي اعمانا ,

– مالا توة نقول لكمّونة وعتورة يمشيوا فمشي ما يقرا عليهم ويهديهم ربي ويريفوا علينا وهوما عمايل يكلبوا الافنين يغرقهم للبين ,

– ايا ادخل اكدس شبيك في الباب يا مجيدة واحنا ديما هب هب خلي نحكيوا بالوهرة

– لا خلي نمشي هاكي الدار حايسة نكملها ونجيك يا دوجة

أكمل القراءة
انقر للتعليق

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

من يوميات دوجة و مجيدة

مجيدة وراس العام

نشرت

في

أشهى أطباق ليلة رأس السنة

– ايا عامك مبروك يا مجيدة اوكة الايام ليه ليه حل عينيك وغمضهم يطيروا – برة يطير عينيك من مارا ، ياخي كان ما جاش راس العام ما نشوفكش يا دوجة ، اع عليك لا تقول نسأل على جويرتي لا نشوفها كيف مرفت وانا وصلت لمواصلها والله في غير جاهك قبلت وقلت اكهو هافي هي ماشي تكونلي ماكنة ، وهاكي رتيبة مرت مصطفى يراها توفى قبلي ولات تقلي راهو عندك قريب قوي وانت كبيرة وقليل الي مرف بها وقام …

– وانت شكبرك اللطف محسوب تزيد عليا عامين والا هوما فلافة ، غير بس عرسنا بكري ويرحمهم بفعلهم اباتنا … ايا قلي عاد وين ماشي تعدي راس عامك السنة

ياسين الرباعي
ياسين الرباعي

– بالله وين عندي نعديه ماهو حتى ربي عرف ولا دخلة لا خرجة ، العادة ماهو محسن خويا لا يقطعو يجينا والمنجي سلفي ونعملوها ليلة واحنا بولنا شراشر بالفحك وما نخليوا ما نطيبوا ، من العشية واحنا في الكوجينة وهاكي حبيبة مرت محسن ماهي حلوفة حشى اسمها وعاطية في التصنيف ، يا شربة يا جرادق ومبسوط ، يا دجاجة نقسموها بين الشربة وطبق المصلي ، وريحة خبزة الڨطو تفوح من الصلاية … وقلية فول وحمص في السهرية لين هاكة المغابن الصغار يجيفوا علينا البيت ، والمنجي سلفي ماهو عاد فذلاكجي ويقتل بالفحك ولا يخليهم نكت على بوعزيز ولا على جحا واحنا نتغصوروا ، وما اصح رقعتو ها مارا وما يحشمش من سيدو الكبير قادر ويبدى يقول في كلام اخضر ويحكينا على قلصون امو البية كيفاش حدروا بيه الكانون وحرقوهولها وولات تدعي عليهم ، يعطيه بعزة محلاه ومحلى حديفو ، ويبداوا الصغار عاد يڨرڨروا على خبزة الڨطو وهو يقلهم الڨطو عام الجاي تاكلوه ويبداوا يتبكاوا واحنا هكة عليهم بالفحك

– وهو لين مخليه لعام الجاي اللطف علينا؟

– بالله لم عليا عسلك وانت كيف الصغار وليت ، ماهو يبصر عليهم معنتها بعد نصف الليل نمدوه ، اوكة السنة عاد كل حد في مطراحو وانا عقاب مرفة ليدك في العاهد الله يدي لراسي لا نجم نهزها ، وعيني كيف الصمصمية واوفاني يزنزنوا ، اوكم سجيعة ورتيبة قالوا توة نحفروا ويعلم الله كيفاش يجيبوه هاكة العشاء وكول الكفتة من يدين الزفتة ، وهوما بالاسم يطيبوا يطيب لحمهم ، لابعد الدجاجة وصات عليها مصطفى يجيبها حافرة ، والطيب قال توة يتعدى لبوشويشة فمة نصبة تبع خبز الڨطو رخيص ويشره ، يعني اسمع افزع ماشي يطيبوا وهوما على مغرفة شربة وقلية بطاطا للصغار برة يطلع عليهم النهار حمصوني غير صحتي خلات بيا والا نخليهم انا

– يالا يصفاوا يا مجيدة ليلة وتتعدى وتوة يتنحى المرف وعود ليلة بالوهرة وجيب سلفك وخوك سيدي محسن ، احنا ماهو كنا مبرمجين الفاتحة متع رفيعة بنت سلفي ليلة راس العام ويا للا حلفونا نجيوهم بالعشاء ياخي طلع خشم الطماع في جيب المفلس وقلك هافا ڨريب قوي السنة والناس الكل مرفة وما فمش سهرية يعطيهم تنحية ، اكهو عاد من حينك سيدك النوري قال نشدوا دارنا وماهي الا ليلة وتتعدى وتوة يجيبونا سهرية في التلفزة ، قمت وخيتك وصيتو على كرش قلت نعملهم ملوخية ، كرهنا الدجاج كل عام ناكلوه والعام الي يخرج يوصي خوه … ايا تعرفشي غدوة نجيك عاد واحكيلي بالوهرة انا هافا حديف هب هب ما نحبوش

أكمل القراءة

من يوميات دوجة و مجيدة

محسونة ماشية للعمرة

نشرت

في

بالصور: وصول أول رحلة عودة للحجيج إلى مطار المنستير - نيوز24

– ايا نتكلم والا نستك يا دوجة؟

– شفمة يا مجيدة حيرتني ، احكي احكي

ياسين الرباعي
ياسين الرباعي

– توة انا نقول دوجة عشرة العمر الي يقلك وما بيني وبينها كان الي حرم الله ، وانت قايمة تقيد للعمرة وما تقليش ، اع عليك محسوب كان قتلي ماني قيدت اعماك ومشينا مع بعيفاتنا ، انا ملمدة تفتوفة من حركان النعمة وقلت نبيع فرداتي ونمشي ياخي دكيتها تحتك وما قتليش

– اوه عليا يا مجيدة ، ليدك في العاهد الله ورحمة بويا عبد الله لا قيدت ولا عملت شي غيرشي الكلمة خرجت من محسونة يراها مدفونة ، ماني مشيتلها نطل عليها كيف سمعت بها ماشية ، عاد في الكلام قلتلها يطعمنا لا يحرمنا حال نمشي اعماك ، اوكي فهمت الي انا ماشية وقيدت ، يمشيها لاجية ، بالله حال كيفاش مشياني انا وفي جرتي هاكة الحرايق صغار محسن ابني والباشا وزيد سيدك النوري قلي خلي نلمدوا ونمشيوا مع بعفنا للحج

– انا جاتني محسونة وقاتلي والكلام في وجهك عز بيا منك وخفيت في خاطري ، يعطيها بعزة محسونة ديما في كفبها وزيدانها في الحديف دخلت فيا غولة يعطيها غولة ، توة هافي متع عمرة توة الكفب وشعندنا فيه اما عمايلها في كناينها وصعوبيتها كيف الحنفلة اللطف زعمة يقبل منها ربي ياخفها ربي ان شاء الله

– بالله استك عليا هي راسها لتوة ما غطاتو وطولك يا نهار محمرة ومكحلة كيف خنفوسة النساء ، في غير جاهك مشيت انا وسيدك النوري مالا حشمت والا غطات والا ندبت على قدها ؟ ابدا ياخي زادت خلاتو جنبها على الجلد وتحلفلو على التاي وانا نصل تحشمشي المارا وشي ، هي القبلة ما تعرفها كان كيف تاخف الكار وتعطي وجها لقبلة هابطة للبلاد وتقلي عمرة ، غير الي عندو زوز صوردي يقوم يمشي

– كهو وخيتي الي عندو الحنة يحني حتى ترامو ، مادام الرزق فمة والخارا ياسر خليها تمشي ، انا ليدك في العاهد نقول خليني هكة نحج وانا في بلاصتي مادامني لا نجبد الناس ولا نحكي بيهم ولا نحسبلهم

– يا حسرة عليك يا مجيدة حتى تقلي ياخي؟ مانا كيف كيف ما نتلهاوا بحد ، اوكة التيجاني ولد ربيعة طلق قالولك وجاري فيها ربيعة بهاكة الصغار بعدلي خلاتهملهم مرتو تحكلهم بيهم فمهم مالا قلت والا سميت والا حكيت؟ … يصفاوا وينفاوا

– اهاه قاتلي رتيبة كنتي وما خليتش وفني ماهو نعرفها كيف مفهوبة الشيرة هاكي وما تعرفش تجيب الحديف ، ياخي شبيهم هوما الحق تشره مريتو التيجاني شقام عليه

– وخيتي قالوا فنيانة ياسر وتحب اللبسة والوهرة والخرجة ويدها لراسها ما تهزهاش والحديف بيناتنا حتى فرشها ما تفرشوش تقوم وتخلي هكك ، اوكة جرتو صبر صبر وبعد طلقها ، وصغارها ماهم حرايق وماشي يطيحوا لقشة من السقف قامت خلاتهملهم واوكي ربيعة في غبينة تحرك قايمة بالراحل وصغارو ، خليها توة تستاهل محسوب كان خلاتها وسكرت فمها شكان عليه قرقرت على التيجاني لين جات براسها

– هكة راد الله عليها وبرة وانا نقول شعزاها هزت ساقها علينا وهي لاهية بهاكة الفروخ حاكينلها فمها

– انت ماك تعرفني لا نسال ولا نحب نحكي بحد الوقت هافا كل واحد يجعلو يقوم بهمو ، بنت سلفي فريدة ماهي جارت دار بوها ، هي الي جابتلي الحديف الكل

– حقة وهاكي بنت سلفك جابتشي صغار العزاية توة عام معرسة ومازالت بلاش ، قلها ما تسكتش وتمشي لبو جربوع والا بوعكازين فمشي ما يجي وجها للضو

– بالله شبيك وليت تنسى يا مارا ، موش قتلك وقتها حبلت وجارا فيها؟ وحمها صعيب بالقشعان جاها في غير جاهك وامها بحفاها كلاتو صافي في هاكة الوحم مع حماتها حكاكة وفقوسة مرة ودازة تقلها هافا دراش وعياه انا جبت افناش وكلمت واك ما قلتهاش وانت عبود لتوة ما ريناه مررتلنا عيشتنا برة يمرر عيشتها من عزوزة

– بناتنا فهب معير غير الزهر يجيبو ربي يا دوجة ، ايا خلي نمشي هاكى سيدك قادر جابلي بسباس من السانية وقال لخوه ومرتو يجيوا بحفانا وهاكة البنات ماهم يتخادموا يعطيهم خدمي حال لين ها الخدمة ، توة نجيك بالوهرة والله محلاها كديسة بحفاك لا نجبدوا حد ولا نحكيوا بحد والله نحجوا واحنا في بلاصتنا بطبيعتنا هافي وما حاشتناش بعمرة مع محسونة يراها في مردومة مدفونة

أكمل القراءة

من يوميات دوجة و مجيدة

دوجة ما تقدرش

نشرت

في

– توة كان جيت انا والا عوينتك ما تارا سو يا مجيدة , اع عليك نمرف الي يقلك ونوصل لمواصلها وما تسالش عليا

ياسين الرباعي
ياسين الرباعي

– ليدك في العاهد الله الكلنا مرفة , انا وسيدك قادر وهاكة الصغار ويزي عليا وبرة لا خرجت ولا دخلت غير بس اليوم قمت نملح في كعبات زيتون جابهم سيدك قادر توة فلافة ايام وهوما يتصنتوا فيك مالا قالت كمونة والا عتورة نقوم نملحهم يملح جلدهم الافنين؟ الي هافي شادة بيتها وصغارها وكادسة قال شنو برد علينا نشقوا وسط الدار يراهم في النار , وانا وسيدك قادر نهزوا في راسنا وحدنا منهم ليلة يدي لراسي ما نهزهاش طمعت فيه مسيكن عملي فم سخون ودخلهولي ودلكلي بين اكتافي بفتيتة فليو الحق سخنت يباركلو , وانت شبيك لاباس يا دوجة والله لا سمعت بيك مريفة انا قلت هاكة برد عليها وما خرجتش

– جرا فيا يا مجيدة , ماني راد الله غسلت راسي , نحيت دبيشاتي ودخلت للمطهرة وقلت لمهيرية تخلي تبيدلتي على السخان فوق الكانون باش نلقاها دافية خير ما نتسوقط , برة انا عملت الفم الاول والبابور سكت يسكت حسو , نعيط لمهيرية وقلالة جيبوا ابرة البابور , يا بنات وينكم ؟ لا ريحتهم الافنين , وليت وتلفيت في فوطة وخرجت نلوج في ابرة البابور وحسيت اجنابي تعباوا بالهواء وما سرحتو وكملت غسلت راسي الا ما كل غديرة شربت ماها وزيد كملت خرجت نلقى التبديلة متاعي كيف ما خليتها انا على البساط لا سخنتها ولا كبان سعدها مهيرية رصاتلي وخيتك لبستها هكك حتى البونتي قيتو يرعد اللطف , ما جاء المغرب الا وما اوفاني تسكروا وعينيا فببوا ولاوا كيف الصمصمية والكضكاضة في لحمي …. تلفيت في طرفي الاشخم وكدست حتى جاء سيدك النوري لقاني هكك مشى نادى لهاكة الكناين من بيتهم هوما ومحسن والباشا , وانا ما فارة بشي وخيتك وقاموا طرحوني في السرير وغطاوني وكدست جمعة هكك لا ماكلة لا شراب وما كدس عليا حد الجيران الكل جاوا , ليدك في العاهد الله انا قلت هافي الي كانتلي والموت ريتها , لين سمع عمك سعيد يباركلو دخلي عشية ومسدني بالفليو لين عرقت بالوهرة وجات حبيبة بنتي بدلتلي دبيشاتي وسيدك النوري جابلي كعيبة نعاس عملوهالي مريقة باش حليت عيني ورجعت فيا الروح , والله مسيكن سيدك النوري تفجع عليا يبات تحت راسي كل ليلة يقرا عليا لين تاخفو عينو ومنهم عشوية عمك سعيد يشدو ولا يهدو شادد جنبي يدلكلي في عفيماتي باش نسخن محلاه ومرطب يويداتو يشره وياخف بالخاطر وهو يا دوجة يا دوجة

– لا يشره هاكة الراجل شخلى كمونة وين تمرف تقول جيبوهولي والله هو يدخل وهي تقول كانت تكفب , توة هافا الكل يصيرلك وما نسمعش يا دوجة ؟ حتى التوفيق في المركز كل عشية هو ومحسن ابنك وما قلوش والا ماهو راني جيتك عملتلك حتى فم جاري كليتو , ايا الحمد لله ما عندك سو , انا الشتاء هافا ما نحبوش يا دوجة كان المرف فيه وكل شي يخرج حتى السهرية كل واحد في بيتو لا من يصهد عليك ويبات الحس , هاكة التوفيق يقلي يااا ما نطمع بالله نتحشى في الفرش وما عيني في شي نولي , مصطفى ابرك ساعات نفيق بيه خرج للميحاف والمطهرة يشفلق اما التوفيق يجي الشتاء يشد بيتو ويكدس ….. منهم ليلة عملنا طبيخة وكلينا في بيتي هوني وتمد على البساط وتكلكف في برنوسو وخفاتو عينو , كمونة تقيم فيه برة لبيتك وهو يقلها ماشي نبات هون راني واكل الرزين وسخنت وما نجمش نقوم , فنكت فيه وبعد خلاتو ومشات ووجها قد الطبل , حال شجارالو كان خاتو يبات بحفا امو ؟ تقول شماشي نعملولو اللطف , ليدك في العاهد الله لحست مناكبي ليلتها كيف خلاها بقة في حيط وكدس عندي في بيتي لا يقطعلو وهرة عزيز هاكة التوفيق موش كيف مصطفى هي قامت وهو شد جرتها شقلي وشقتلك ما نبات كان في فرشي , يعجبكشي ها الحديف؟

– لا احنا نتلما الحق يا مجيدة ونسهروا بالوهرة وندخلوا مريغة التاي وهاكي قلالة الحق كل ليلة تعملنا حويجة , مرة قلية فول ومرة قلية حمص كل ليلة وكيفاش … حتى لعدة يديك وبعد كل واحد يشد بيتو , سيدك النوري يحب وحدو في البيت يقلك نكح براحتي ونبص براحتي وما نقلق حد اوكة انا ستانست بيه يصفى وزيد يكمل الليل يبعول في هاكة الراديون المغبون

– بالله قلي يا مرا , هاكي مزغنية عرستشي لابنها قالوا في الشتاء العرس؟

– وشكون راها وخيتي , هافا الي يعرس في الشتاء معنتها ما يحبش الناس يجيوه , عرسك يا مشوم في الليالي والا في الحسوم , طقس ما يتاكل منو حتى صبع ويقوموا يعرسوا ؟ اما فاهرلي ماشي يخرجوا الليالي ويعرسوا , بو العروسة ماهو كبير ومريف يقلكشي تدفى الدنيا فتيتة , وزيد عندها اختها كانت نافسة ومزغنية ما حبتش هي راهو التوخير غير داروا فيها بناتها ماهي غبرتها مع دار العروسة من ايام الماخفة وقت شرطوا عليه العرس كان ما يكمل يحفر دارو وما حبوش بنتهم تسكن عندها , يعرفوها ما تتعاشرش وصعيبة , اوكة قلك نظف بيت وميحاف يسكن فيهم وبعد يكمل والفم ماهم ياكلوه مع بعفهم في البرج ,

– يا عياه ويا هو , توة شحرق شعيرها هي ابنها يسكن وحدو؟ ليدك في العاهد الله اريحلها محسوب عجبك كناينا بحفانا ؟ شرينا منهم كان صحة العين والراس الكبير يرا قنباعتهم تطير , انا كان نلقى كيفاش يكتبلهم من فهرة ويبنيوا الاولاد خليهم قفا الدار قلت لسيدك قادر ما تعطيهمش من قبلة قدام خليقتي وين نحل الباب ناراهم

– اوكة انا الباشا بنا هاكة الخرحوط قفايا والله متعة وبالقدر انا وقلالة تجي تحرك الحركة وترجع لدويرتها ومهيرية شادة خليقتي طولك يا نهار وزيد حركتها موش مرتوبة وعندها التفرفيش , كيف امها اللطف كان التجودير عوف نحفظ منا المسايسة والرتابة , شي مسيكنة , هي تحرك وانا في جرتها نعود عليها الحركة يعطيها فركة

– هكة راد الله علينا وبرة , اوكة اليوم جاب مرقة سيدك قادر فيها حنشتين يشرهو حييين ورطب بلعابهم , قلت للبنات قشروا المرقة توة نقوم نقليها , الي تشوف الحنش تقلي لا نقشرها لا نشدها هافا حي ونخاف منو , يعجبكشي ها الحديف ولاوا يخافو من الحنش بنات توة , اهو وخيتك قمت انا بمكاسري نفرك فيهم بالملح , لا ويعطيك ربي وقت يطيبو ما تلقاش معاهم يدين , يزي عليا وبرة يا دوجة وكمل جابلي هاكة الزيتون انا قايمتلو زادة , وانا عقاب مرفة بالسيف نتحرك مالا قالت وحدة منهم برة يا امي مجيدة ارتاح ؟ توب لله يجعلهم يقدوا تشعيل الكانون والتفحيج على البخور , حكة البخور وفاوها متاعي , ربي يسامحني والله بالسيف خبيت لقشة وشق قلت نفحج عليها انا بعد المرقة والا راهم هزوها يعطي ما يهزهم

– ايا خلي نمشي يا مجيدة هاكي الدار خليتها تحوس , مالا عاد جمعة في غير جاهك وانا مريفة وبلي يعملوا هاكة البنات وشي ينففو من فوق لفوق والخمج مرشوق , ما فهمتش شكانوا يعملوا عند اماتهم وكيفاش علموهم الحركة , خليني ساتكة خير انا ماك تعرفني ما نتكلمش ناكلها في فعدي ونستك

– هافي موش جية راهي يا دوجة , نحبك تجيني عشوية بالوهرة والله عينيا عماو بوحشك وبحديفك

أكمل القراءة

صن نار