– يا مجيدة توة ساعة بحفاك وانت لتوة ما طبعت صورديك على القاعة ، بلي خلق محمد اكدس ختولتلي عينيا

– بالله وين نكدس وين يا دوجة هاكة الڨلص كيف راس المجنون بعدلي هاكة الكناين الي يوجعها راسها تجي لڨلصي الي تلوج على طلقة وشق والي وفاتلها دبوسة الافاح واهو حتى بوسطواتي طمعوا فيهم افنين ما لقيتهمش الفاروزي والسيكلاما ارف وكانتلهم بلاعة

– اع عليهم مازالتشي حاحة اخرى ما يهزوهاش ها الكناين وبعد نوليوا مشومين وبينا وعلينا يراهم في تركينا ، كهو عاد شدوا الديار ولاوا يحشيوا خشمهم في كل شي

– انا كرهت كدست الدار منهم السهرية والفحك والوهرة في بيوتهم مع رجالهم والتڨربيج وتشييح الريق والوجه المشوم في خليقتي يراهم بعدي الافنين ، حتى لقيت رتيبة خارجة لامها تهزلها فتيتة نعمة قلتلها تعدى للبلاد خوفلي قفيات ، لا بعد قاتلي مسكرين يسكر حلقها

– بالله وانت شعندك تقفي يامجيدة اوكة بحياة راسو سيدك قادر يكركر ويجيبلك ،

– والله كلام وفيه العيب يادوجة قلاصني تهراوا قلت تجيبليشي نفيص طزينة قلاصن ، اهو نلوج في جبتي الوردية قلت نفتقها ونخيطشي منها بونتيات وقلاصن والله سيدك قادر قلت نعملوا منها حتى افنين يبدل بيهم مادام مسكرين الحوانت ، ما لقيتهاش اللطف لندرا وين غبروها

– استك استك موش جبتك الوردية الي لبستها وقت خليتو ولد سجيعة في القعادة ، اوكي ريتها مفتقة ومنشورة على الحبل قاتلي رتيبة ماشي ترص فيها المخادد شقوفاتها تهراوا وطاحوا ريش

– يراها اطيش وياكلها الحشيش ، توة هافي مارا هافي تهز وما تقولش وانا نعيمي طار عليها ، توة قلي شنعمل تراه كان نكلمها نشوام وكان نسكت ترصيلي انا وسيدك قادر بلاش قلاصن ، اهي روبتي متع الحركة الزمنية والله جديدة مازالت اما تصفى توة نفتقها هي وبرة

، ايا انا جيتك نجيب مريغة التاي ونكدسوا بالوهرة

– بالله وين نكدس وهاكة الحرايق الي عندي في الدار ما يطمنو شي وسيدك النوري تعرفوا ما يحلالو الحديف والقعاد كان اعمايا نمشي نطيبلو فم ونبخر بيتي فمشي ما ربي يرحمنا

– ايا يهنيك الروى يا دوجة , مطيرة سمحة جاتنا

– يهنيك الخير , الحمد لله يا مجيدة والله حتى من الماجل للخلاخل تعبى اما استك وبرة والله جارا فينا

– لاه اللطف؟

– ماهو الباشا وقت بنى هاكة الخرخوط ورانا ربط حيطو بحيطنا وما سكرش عليهم من فوق , يا للا المطر بدات وبيتي وليت تسقط علينا في الماء بالغرابل , انا ما فقتش على الاول كنت كادسة في فريشي ونفر كان بالشي بين اكتافي , ليدك في العاهد الله نسخايبو سيدك النوري انا رمى يدو عليا وهي باردة قتلو توة وقتو هافا , ياخي قلي راهي البيت تكسكس في الماء وهبطلك بين اكتافك , من حينك عاد ولينا نتجاراوا نلمدوا في هاكة الجلود والبساطات ولفينا الكليم وانا وخيتك ندعفر في هاكة الليل وخرج سيدك النوري كلم الباشا ومحسن رصاتلهم فوق السطح بالشكبة يدزوا في الماء هبطوا كيف الفليلسات , وهاكي قلالة تلوق اللوطة تقلي توة يتسوقط رويجلي الماء فوق راسو ومهيرية تقلو يا محسن شدخلك انت طالع الفوق ماهي دار الباشا وفك يدي من شوشتك هي وقلالة ولاولي الافنين يراهم في البين ويكسرلهم السقين والا حال وقتو الشي هافا كان موش عياه , وكانك من سيدك النوري قلي ماجلنا صغير وما فيهش منفس نمشي نفرغ بالركوة بالركوة وولاتلي الدنيا تحوس ويزي عليا وبرة يا مجيدة

– لا احنا لاباس وخيتي ملي هي بدات تبخنس واحنا تلمينا الكل في بيتي ودخلنا الكانون ومريغة التاي وكدسنا وهاكة الكناين مع كل رعدة الي هافي تطلق العيطة وتتحشى في راجلها لا حشموا لا جعرو من سيدك قادر ما اصح رقعتهم الافنين , لين كفت فتيتة الي هافا هز مرتو ومشى لبيتو كانك من كمونة دخللها شوية ماء من تحت الباب بللها الكليم ولات هي والتوفيق لمدوه ودلدلهولها من فوق الباب قلها خليه يشيح للصباح. وكانك من عتورة بيتها عالية الحق غير بس الميزاب في الحيط متاعهم لمد الماء جرتو وقطرت عليهم شوية البيت قام مصطفى طلع سرحولها وجرى الماء باش رقدوا عاد

– اوكة عاد سيدك النوري صبح يلوج في خدام مرمة يصلح هاكة السطح كيف راد علينا ربي , وانا قلت نمشي ندور تحت الطوابي نلمد فتيتة ببوش نبيتو في السميد نعملوشي فم مغلي , هاكة البنات فنكت فيهم الصباح قوموا لمدوا معايا الي هافي دكتها تحتها وسمعت وستكت , لا بعد قالو صبحوا مرفة من الماء متاع البارح على روسهم , والماء متاع غسيل الراس كل صباح ما يمرفهمش هاكة خليني ساتكة وبرة يا مجيدة يعطيهم تمسيدة الافنين

– هاكة قلنا اليوم نوقفوا على محسونة فريخية نسلموا عليها ماشية للعمرة , اما وين توة الزنقة للركبة باللبز وهي دارها مدغورة قاع الزنقة , خلي كان طيب علينا ربي نمشيوا وبرة

– انا كل شي عديتو الا فريخية تمشي للعمرة , كان تلهات بدارها ورويجلها ونقصت حومة وكلام في الناس راهي حجت وهي في مطراحها , وزيد ماشية وحدها بلاش مولى بيتها شقلي وشقتلك ماشية اعما التيجاني حمو بنتها ومرتو , ما كفاهاش طولك يا نهار وراه على الموبيلات توة تحب تمشي اعماه للعمرة , انا خليني ساتكة وبرة يا مجيدة تعرفني ما نحبش الكلام في الناس , كيف ما قلت انت كان طيب علينا ربي نمشيوا نقولوا الكلمة وربي يهني الامة

– لا عاد هي وين على قبل يتسمى تهدت ورافت وكملت عليها هاكي المرفة الكبيرة الي مرفتها , ماهي جاتني نقشت عندي بونتيات قالت ماشي تعزهم اعماها وخيطتلها جيب في القميص تخلي فيه اوراقها ودنيتها وشبعتني بدعاء الخير , قالت باعت فرداتها ومولى بيتها مخبي تقليعة عطاهالها باش تعمل العمرة , والله حتى انا قلت نعمل كيفها ونبيع فرداتي ونمشي يا دوجة

– انا لا عندي لا ما نبيع ولا ما نرهن الي عندي بعتو في عرس الباشا وفيبالنا كل شي بالوهرة عملناهولها اهي توة خرجت شوكتها علينا وفربت الرويجل تحتها واحنا بنات علينا ساس يراها تحت ساس , هات حتى قلنا تحبلشي تتهد فتيتة , شي اهو عام في غير جاهك وما فمش حبالة , قلنا ندخلوا الربيع ونهزوها لبو جربوع يقرا عليها الحفيظ لويلة , هي قالت لا على الاول وبعد حكات مع مهيرية وقالتلها راهو يشره واعقد النية , الكلنا مشينالو حتى كمونة وعتورة قرا عليهم , كيف الي ركحت المارا وقالت باهي نمشي وربي يجيب في الصواب وبرة

– بالله وقت تمشيوا نمشي اعماكم يا دوجة نصدق حويجة ويقرالي مشوار على ركيباتي الحفيظ راهو القرمش وفا عندي , ليدك في العاهد الله لا بقيت نعمل حاجة حتى غمفة النوم نرقد اللوطة ما نجمش نطلع على السرير وسيدك قادر ما يرقد كان في سريرو , رصاتليشي وخيتك كل واحد في مطراح راقد , نقلو اهبط بحفايا يقلي نحب كان فرشي , الشيخ يتسبب وطاح عليه غربال

– حتى امها قالت تحب تمشي اعمانا وقلنا ناخفوا دوارة نعصبنوها هوني ونهزوها معصبنة حافرة ونعملوشي لولتين غادي حتى سيدك سعيد قال توة وصلنا ويبات غادي اعمانا ,

– مالا توة نقول لكمونة وعتورة يمشيوا فمشي ما يقرا عليهم ويهديهم ربي ويريفوا علينا وهوما عمايل يكلبوا الافنين يغرقهم للبين ,

– ايا ادخل اكدس شبيك في الباب يا مجيدة واحنا ديما هب هب خلي نحكيوا بالوهرة

– لا خلي نمشي هاكي الدار حايسة نكملها ونجيك يا دوجة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

*ينشر في موعد استثنائي

– اووه يا مجيدة ساعة ملطوخة قدام باب الحوش ويديا طاحوا وانا ندق في الباب شلعزة وين غاطسة

– بالله يزي عليا وبرة يا دوجة , ليدك في العاهد الله لا سمعتك , مفرشة جلد في الدويرة ونقي في فتيتة قمح قلت نعمل بسيسة وسيدك قادر ماهو بشيمتو مدفونة في هاكة المغبون الراديون حاططهولي على الطياح ما خلاني نسمع شي

– وششه والله فكرتني في البسيسة قريب توفالنا وسيدك النوري كل صباح ما يخرج الا ما ياكل كعبات عليق بالبسيسة توة نعيدلو ياخفنا الحمص والفول ونجي نعملها بحفاك

– وخيتي ايجا مرحبا اما راني عويناتي وفاوا لا نجم نقي ولا نغربل كيف راد عليا ربي , حتى طريف القمح وليت ندعدس بعويناتي قام سيدك قادر نقاهولي والله خرجهولي يشره يباركلو

– كان للسعد ماهو حال هكة الكناين يعملوا اعماك يا مجيدة والا هاكة مكبوبين السعد الي عندي غير هكة راد الله علينا

– بالله استك عليا انت , حتى يقدوا غسيل روسهم وحومتهم طولك يا نهار الي هافي تحفر روحها وتهز صغارها وتقول يا دار بويا تقول شعماتلهم والا في وجهنا كروع يعطيهالهم بين الفلوع ويرشق في عينهم مطلوع , وما قهروني كان هاكة الاولاد متاعي في جرتهم لا يقولولهم اكدسوا اعملوا حويجة مع امي ولا شدوا بيتكم …. ومن العشية للعشية الي هافي تكر شلاكتها وتجي تلهدني ببوستين وتقلي امي تسلم عليك يا امي مجيدة وتشد بيتها , لين يسلموا عليا بالكشي توحشت خليقتهم انا , وحش الصيف قاطع ما حاشتيش بوحشهم

– الكل كيف كيف تقول بازقين في افام بعفهم يعطي ما يهدهم , حقة يا مارا ياخي ما تقليش دربالة مرت خوك خليفة شكان بها سمعت بها مريفة في حالة

– ليدك في العاهد الله حالتها تبكي الحجر يا دوجة , في غير جاهك رقدت وقامت تلقى فهرها يابس لوحة لا تتحرك لا تتورك , لا بعد رقدت في القاعة على جلد منو للحصيرة وجرتها على عين قفاها ليلة كاملة صبحت في غلبت كراية تحرك , حتى سيدي خليفة بحفاها بايت بخلوا يمشيوا للسرير اما لاباس الحق صبح , اوكة عاد ما خلاوا باش بلحطولها بناتها لا خلاوه فليّو ولا خلاوه زيت زيتونة وشي , لين جاني لهوني سيدي خليفة وقلي كلملي عمك الصادق يهزهولها يدلكها ويمسدها , الحق ملي مشالها تفهنت شوية يجعل يويداتو ما تعرف على نار هاكة الراجل

– يا لطيف هافا الكل يجرى فيها دربالة وما نسمعش , اع عليك علاش ما تقليش راني مشيت طيرت عليها السو , يالا توة نعدي عليها وقت نمشي لحبيبة بنتي ماهي جويرتها تتسمى , اخر مرة ريتها في الخميس متع فخفاخة يرحمها , انت ما مشيتش عاد تعزي يا مجيدة سالوا عليك بناتها

– ماهو نهارتها خلينا كازي والا فيازي والا شسمو ولد كمونة في القعادة , والله قهروني بالاسامي المقلبة قد ما قلتلهم سميوا حاجة نجم نقولها وشيْ خلاتني بقة في حيط وسماتو كيف ما حبت هي يعطيها كية

– ههههه يشويك يا مجيدة قتلتني بالفحك , نيازي اسمو نيازي انا ما حفظتو الا ما مهيرية ليلة وهي تقلي عليه

– ايه وشكون عاد جاء للخميس يا دوجة؟

– ما كدس حد عليها وخيتي الدار تملى وتفرغ , عزيزة كانت لا تفر لا تافي والله تشاواوا عليها الناس الكل الا هاكة الشايب متاعها شادد كرسي في باب الحوش وعينيه على البنات الداخلة والخارجة ويسال هافي شكون وهافي بنت شكون , اول خميس وهو يخطب يعجبكشي ها الحديف تقول كان يستنى فيها تقبل , بناتو يقولوا يا بويا موش وقتو توة اكدس مع الرجال , وهو يقلهم ماهي فرصة ياخي بعد عندي سقين باش ندور في الزنق ونلوج ؟ توة هافا راجل هافا لا يحشم لا يكابر يعمي عينو ان شاء الله

– هو بيناتنا لازمو مارا يا دوجة بالله هاكة البنات كل وحدة تشد دارها بعد واولادوا الي هافا يجعلوا يقوم بمرتو وصغارو وهو شكون بيه ؟ هافا حلال ربي العالمين هي عرفت مطراحها وربي يرحمها وهو ما ايلو الا بمارا راهو , انا والله فكرتلو في شافية دباشة اخت راجل عبيشة بنتي ماهي تصبات عاد وما خفاتش وزيد ترتاح منها عبيشة راهي حريقة وقبيحة كلمتها تقولها وما كفبوش كيف قالوا اخت الراجل كيف العقرب في الطاجن , حاكة افيم عبيشة بنتي مسيكنة

– وخيتي اوكة يلوج هو وعويناتو تتشاعل كان هافا توة نبعفلو مع حبيبة بنتي تقلو على شافية هافي , اما هو يجبها صغيرة وبيفاء ومزيانة يحب يغرم شبابو الراجل , الفلوس ماهم بالبالة وهو والله شادد رويحنو عاد لين ومن صلو مزيان قشرتو بيفة حمراء ماشي تنطر الدم وكمل بناتو عينهم محلولة لامهم يرحمها , توة يرفاولك بلي يجي لبوهم

– احنا نقولولهم عليها ويراها ويدبروا روسهم بعد انا تعرفني في الماخفة لا نحب ندخل لا نولي مشومة بعد , يصفاوا على بعفهم الكل

– توة نبينا ونصليوا عليه يا مجيدة , انا جيتك نحبك تجي تعملي فتيتة برغل سيدك النوري قلي برغل مجيدة وحدو وما تعملهولي كام هي , ايا وقتاش تجيني باش نقلو يقفينا

– وخيتي وانا مازلت نجمها حركة النعمة ؟ حد التغلية نغليهولو اما الحكان خاطيني راهو

– لا حتى هو قلي انتم احركوه وغليوه وانشروه وانا نحكهولكم يباركلو في صحيحتو , اوكة البنات زادة بين يدينا وكان هافا اعمل حتى نفيص ويبة ليلك نعرف سيدك قادر يحبو

– باهي مالا اقفي قفياتك وقلو ياخفنا ويبة اعماكم ونعملوه حتى احنا عقب برغلنا

– ايا يباركلك يا مجيدة ويشدك لا يهدك خلي نمشي والله خليت الدار حايسة توة نحكيوا بالوهرة عاد وقت نحركوا النعمة