– اع عليك يا مجيدة , انا عاززبيا منك راهو , متفاهمين نمشيوا مع بعيفاتنا لحبيبة عشة نطيروا عليها السوّ في رويجلها مريف , نسمع بيك مشيت وخليتني بقة في حيط وما عدتليش

– بالله استك عليا يا دوجة وافهم الحديف قبل , ماهو قتلك نمشيوا ياخي جات هاكي المشوية جلبانة ام كمونة وحكينا قدامها على راجل عشة سيدك خليفة وكيفاش طاح على عشو وجاء على غفيمة بوزارع وشخشخها مسيكن , تشاوات على سيدك خليفة بعد الي طلعت تعرفهم من قبل وكانوا يجيوا لجنان خلتهم بحفاهم , محسوب ترباوا مع بعفهم , على كلامها لين كبروا وهوما متعاشرين ومافا لعبوا جميع على السطحة وكلاوا الڨرفالة وراء الحوش وكانت تنحي الزلوز وتكسرلو وتعطيه وهو يحطها على عود البسكلة ويدور بها في الزنقة … من حينك عاد قالت نمشي نطير عليه السو وليت وحشمت نقلهاشي ما نمشيش حال نسلم من هاكي الحريقة بنتها تقلي تحقر امي وما عندكمش قدر, يراها في الغرر , اما قلت نعود نمشي اعماك مالا مادام تفاهمنا من الخطرة الفايتة

– وهي كيف سبتها جلبانة جايتك ياخي هاكة الحنظلة راجلها خلاها تجي موش حلف على داركم؟ من نهار خليتو ولد كمونة في القعادة وسيدك قادر نسى ما خفاش الفاكية والحلوى وقلكم مالا قدر ومالا وهرة حاطين ولد بنتي كيف اليتيم وهز عزوزتو ومشى

– هاكة ماهو عندو الطلعة وبرة وشعيرة تحرقلو طاجنو اما يمشي للدار تهفتو جلبانة وينسى وما صار شي , وزيد جات لرتيبة بنتها تهزها للخياطة بعدلي عقلها خف المرا وتحب تخيط فوطة وبلوزة لعرس ابنها وهاكي الكرش تحفر بها عريانة وهي مكمشة مرمشة حتى قلتلها يا جلبانة ماهو تحتها مريول فضيلة الفوطة، قاتلي يا حسرة ما عادش يلبسوه ولات بلاش الفوطة , سكرت افيمي وسكت يتخفوا الي يعمل قربة تجي على فهرو وتقطر

– بعدلي شق روبة بنتها حتى لاوراكها الشي في عرقهم فهر يا مجيدة يعطيهم تمسيدة الافنين , ايه وهاكة الراجل شحالو سيدك خليفة؟ عزيز وغالي هاكة تشويت عليه انا

– والله في غبينة يحرك العزا , الطيحة عفيمة جاتو وعشو تفرك مسيكن يعيط عيطة في اللوطا وعيطة في السماء غير يتحرك والا يجبد المخدة من تحتو , وهاكي عشة تقالع فيه , مدلي وحطلي وهزني وقعدني … الحق فرح بنا وكبش في رقبة جلبانة بالبوس بعدلي سنين ما راوش بعفهم قلك وحكاوا اياماتهم وصغرهم وقداش درجح بها وقداش نحاوا التوت هو الفوق وهي اللوطة ينحي ويعطيها وقلك عامل حبل يدلدلهولها مع الشجرة باش تشدو مع العرف وتطلع اعماه وعياوا وهوما يحكيوا

– لا يشره هو يا مجيدة طبيعتو باهية وعندو القدر ومحاشمي الحق , انا قداش من خطرة يجي لطابيتنا ينحي الهندي والله يسيب الجماعة والكرتل ويكدس بحفايا على السطحة نشبعوا بالحديف حتى منهم خطرة شوكة يشويها يا لندارا كيفاش جات في زندي قتلوا نجيب ملقاط قلي ايجا نحيهالك قلو ملقاط وبسنانو ولسانو تبعها لين قاها ونحاها والله وسع بالو مشوار وهو يفركس فيها بلسانو , كانك من سيدك النوري اوكة مشالو هو جماعة المركز متع الديمينو , وانا اهو كنت نستنى فيك حتى مهيرية قالت نمشي ما فيها باس هي وقلالة , وهاكة الحرايق متاعك ماشينشي ؟

– وخيتي ينعم الله عليهم هاكم ماهم كل ساعة وعلمها , عتورة بين دارهم وهوني وتخليلي هاكة البنات , ماهم عاد يكسروا في الزلوز للعرس , من العشية للعشية تجيب صريرة معاها بالزلوز مالا تمدلي حتى كعيبة؟ ابدا , تعطي لمصطفى راجلها لا بعد قاتلي عندو الجاير ديما والزلوز ينحي الجاير , بالله منين جاه ابني الجاير كان موش منها ومن عمايلها , خليني ساتكة خير , بعدلي طول النهار هات وهي تشري للعرس وولدي منين عندو مسيكن اوكة يقشر في خليقتو وبرة ويبيع في البلاء يصدقة يعطيها شنقة , ورتيبة كمونة ما حبتش تمشي مع امها واعمايا قالت ماشي تقرف الفرش متاع ابنها وقالت يا من عاش توة نمشي خطرة اخرى وفعلا عزاها وخلاها انا ما ندخلش سلايكها , رقعة وقبيحة وما تسكتش بكلمتها يتشتش لحيمتها

– ايه وشكون لقيتو غادي وقت مشيتو مالا؟

– يا للا الدار تملى وتفرغ عليهم ما كدس عليهم حد , احنا لحقنا على نفيسة زِكْرية وهي وبنتها واحنا خارجين دخلوا مزغنية وكناينها الافنين يغرقهم للبين تلافاوني لا بعد علاش وقت مرفت امنا ما تجيش ولهوني تجي واحنا عازز بنا منك يا امي مجيدة , توة ما يعرفوش الي الركايب وفاوا والڨرمش تهرى متاعي وزيد دارهم بعيدة وخيتي علاش نمشيلهم , حتى وقت مشاوا كمونة وعتورة مع عمك سعيد عدى عليهم هزهم قتلوا هزني قلي راهم البوليسية ولاوا يشدوا ما يحبوش شكون التالي في الكميونة هزهم الافنين ووصلهم وجابهم وتعداوا بعد خفالهم الجيلاط ووصل عتورة لدارهم دخلت مشوار وحتى كمونة قعدت اعماه في الكميونة ما دخلتش باش ما يبطاوش عليه , الحق يفكوا من شبايك البلاء ولا يقطعو هاكة الراجل مع المغرب رجعهم اما خير والا يخسروا حق تاكسي؟

– وزكرية كيف سبّتها عندنا عليها دهر ماهي ملي ولات تحرك النعمة وتحل الحلو وهي تلهات وما تفهرش ولات؟

– كهو عاد جيران الطابية الي يقلك فضات روحها وجات , اما الحديف بيناتنا يا دوجة انا الزلوز الصم ما ناكلوش من يديها , السفساري بزقة بلعقة بالسحاق ودارها من قبل نعرفوها كيف راس المجنون , شمن حلو وشمن نعمة يراها تعمى؟ كول الكفتة من يدين الزفتة , والله بلاش لا نحطو في حلقي يخلف على سيدك قادر يعمل ويعاون وكل شي بالوهرة

– ربي يشدنا بالصحة ونعملوا بمكاسرنا وخيتي يامة عليه الي يجيب النساء تعملو , وزيد رجالنا ما يحلالهم كان متاعنا والله كان شتجيبلو سيدك النوري يقلي انت ومجيدة ناكل وعينيا مغمفين الزوز تشرهوا ,

– ايا شعندنا فيهم يصفاوا لا نجبدوا الخلق ولا نحكيوا بيهم ولا نركبوا فنوب ماك تعرفني كل شي الا اني نحكي بحد والا نجبد حد كل واحد يجعلو يقد همو , ايا زوز ادخل نكملوا بالوهرة واحنا بالواقفة هب هب

– لا لا خلي نمشي وغدوة العشية نجيك ناقفوا على الراجل , هاكة سيدك النوري شاهي تشيش بالكركوش نمشي نقلي ونوقفهولو على دهانو يحبوا كان هكك مدهن ومحرحر هاكة , ايا سعيدة خير ما يعمل فيا ويقلي شبيك بطيت وتوة نحكيوا بالوهرة هافا حديف هب هب ما نحبوش انا.

_ ايا حفرتشي يا دوجة خلي نمشيوا للمارا مشوار ونجيوا

_ اما مارا زادة الي نمشيولها يا مجيدة؟ ما علباليش بالحديف هافا

_ يكب سعدي امين ، شي وليت تنسى انت والا شخفتك ، توة موش تفاهمنا نمشيوا لعيادة ناقفوا عليها مشوار مولى بيتها طاح من البغلة نطيروا عليه السو

_ اهاه تفكرت توة ، بالله شكون يخليلك عقل تفكر حاجة يا مجيدة والي عندو كناين كيفي مازال يفبط على حاجة هو ، تفاهمنا من البارح الفطور بسباس ، يا للا قمنا الصباح قلت لمهيرية تمشي للسانية تجيب البسباس والتابل ، ويا كلمة الشوم يعصر في عينيها الفوم ، كيفاش كيفاش نمشي انا وما تقولش لقلالة وانت ديما تقفيني وهي لا ، وانا ليدك في العاهد الله على نيتي ، قلالة جديدة علينا وما يعرفهاش عمك صالح متاع السانية قلت يغشهاشي ويعطيهولها شايح ويابس ، يبس ريقها ان شاء الله ، ولى وسيدك النوري قص النزاع ومشى هو اوكم الافنين يفرزوا فيه وانا قلت نبدى نقليه مشيت لزير الدهان نلقى صبعي ونقبة البندير رصاتلي نقرقش فيه باش لمدت لقمتين وبلاش كريكشات ، يصفى توة محسن يجيب مريڨزات اعماه هاكة يعرف مرتو تفنى على المرڨاز يعطيها يد مهراس تهدها عفيمة راهي مهيرية يعطيهالها في العشية بركة بن عربية

_ توة نافسة وعروسة في ليلة عيد يا دوحة ، اليوم نهار بسباس هو واحنة قلنا نمشيوا للمارا ، اع عليك ، انا ديما تعملها فيا وما نترباش منك .، ايا وعي كب سفساريك واخرج وتوة يكملوا البنات ، الراجل في غلبة كراية قاتلك طاح على مخارقو جاء مفروش ، الطبيب قلهم الحوف تكسر

_ اما حوف زادة ، المهم السبالة لاباس ، يقعدوشي بلاش ماء مسيكنات

_ المخارق يسميوهم حوف الطبة يا دوجة يراك ممروجة وانت ما تفهم شي ، ايا خرجتشي ونقصت عليا من التدهيك متاعك

_ يا مارا بالله ايجاني لهوني قلي ، من وقتاش عيادة كادسة تجينا والا تارانا ، انا حبلة بحبيبة جارا فيا بهاكة الشي الي علبالك ، وراتني قداش من خطرة في المركز وتحرم تقلي ما عندك سو ، وحتى في الولادة جات تريكزة بالواقفة ومشات ، حتى قلت نمشي مكابرة في سيدك رابح راجلها اوكة تفرك الراجل كنا نستحقوه الحق في قفية بالبغلة ، ما يقصرش وياخف بالخاطر كان ، خطرة وصلني لدار سيدي محمد على الكريطة والله فرشلي جلد بجنبو وفنية كاملة فحك ومحلى كلامو حتى من بلوزتو نحاها وغطالنا روسنا من الشمس ، اوكة كلاها في الحوف ورقد مسيكن

_ وانا كان موش سيدك رابح نمشيلها عيادة ؟ اما الرويجل يشره الحق ، كمونة وعتورة ما يلقاوش سعيد يقولوا با رابح ، ليدك في العاهد الله ينحي ما في يدو ويجيهم يجري بالكريطة ، وبيناتنا مرتو كانت تتنوغل وما تحبوش يوصل حد والله بالسرقة خطرات يجي يقول ما تقولوش لعيادة خير ما تغبرها اعمايا ها الليلة

_ طبيعتها مشومة يشوم فعلها تقول شعمنالها ، حتى بناتها كيفها يا لندرا كيفاش خطرات يجيوا لمحسن والا الباشا يقولولهم الصباح تعداونا هبطونا اعماكم بالموبيلات ، وليداتي ماك تعرفهم حشامين وما يقولوش لا والله ع الصباح يتعداولهم ويهبطوهم وقداش من خطرة يطلعوهم زادة ، هافا ما تاراش بيه عيادة بناتها مرحين وراء اولادنا راتنا كان وقت نستحقو رابح بالكريطة يعطيها تشلحيطة

_ تصفى وتنفى احنا ماشين للراجل وفرد مرة نتعداوا لفريخية نهزوها اعمانا قالت نمشي اعماكم ولو انها ما تستاهلش طول النهار سفساريها على راسها وهي تحوم لا مرة قالت امشيوا اعمايا تستحقنا كان في حركة نعمة والا غسيل فرش اكفر منو عوينتك ما تارا سو ، اخر مرة في حركان العولة متاعها وفتلان الكسكسو جات وتستاذن فيا يا مجيدة يا مجيدة وانا ما نطمان كان بيك في الكسكسو والمحمص كان انت ، في تڨرڨيبك فيه يشره ، في ما تبلهولي وتخليه شابع بماه كان انت ، وانا نعرفها تترهدن عليا اما قلت ميسالش نمشي خاطر اولادها ومولى بيتها ما فرونيش الحق وجه الليل بيهم ،ومشيت وعملت وهاكة الراجل يدور دورة ويدعي بالخير ويقلي يا مجيدة ما توهر الجفنة كان انت وعميلك ارطب وواقف على سقاه ، وكملنا با للا وقاتلي ماشية غدوة لمعلى متاع القماش جاب قصايص سماح قلتلها تعدالي نمشي اعماك ، نسمع بها مشات وما قالتش ، عز بيا الحق منها ، كيف عدتلها علاش قالت لا بعد قلها ما تجيونيش الافنين فرد وقت ايجاوا بالوحدة بالوحدة باش نجم نتلهى بيكم وما يتعباش عليا الحانوت ، يعجبكشي ها الحديف؟

_ موش قتلك تمشي وما تاراناش تقول نعملولها العار ينبت فيها مسمار ، حتى بنتها وكناينها ما تقلهمش ، بعدلي الخطرة الاخرى مشات تبيع في فتيتة زبيب شيحتهم هزت بنتها اعماها ، مولى الحانوت قلها يا محسونة لين تهبط انت كل مرة بالشريح والزبيب ، اكدس ارتاح واهي بنيتك تجيني ، مالا سمعت الكلام ؟ دكتها تحت منها الكلمة وديما تهبط هي يعطيها شية ما اصحها شتحب حومة يراها مكومة

_ باهي توة نبينا ونصليوا عليه ، دبر عليا يا مارا نهز كمونة وعتورة يراوا الراجل والا لا ؟ عيادة ملي كانت معملة عليهم لاولادها وخفيتهم انا وهي تشاوات وما تحملهمش ولات شنو شنو ما رفاوش باولادي وخفاوا اولاد مجيدة ، وهو موش مقصر اعماهم كيف ما حدفتك ، ما فيها باس يمشيوا وحابين يمشيوا هوما قلهم اترهنوا يمشيهم لاجي ويجيهم بو قشاش في الجواجي ، انا كان نعرفهم ماشي يطلعوا هكة حال هزيتهم بيدي لاولاد عيادة غير هكة راد الله عليا الزهر متاع العباد ما عندناش يا دوجة

_ انا كيفك نقلهم امشيوا يجبدولها عينيها باش ما عادش تتفوحش علينا تقول رماها علينا الباي ، اوكة تفوحشت وفي الاخر اولادك بركوا في قصدرية الكمامنة والعتاترة ، والحس مناكبك وقتها قدامها

_ هي على كلام سيدك قادر تشره ولات قال ، ماهو وقف عليها ودخل للراجل طير عليه السو قال ما خلات ما جابتلو وما وكلتو وحلفت عليه بالعشاء غيرشي هو حشم لقا المرا وحدها هي وبناتها والراجل مدروك الداخل ، قلي هاكة البنات لقاهم غاسلين روسهم وهي وحدها في الوسطية كدس مشوار وجاء ويشكر ويمدح فيها . محلى طبيعتها وما ارطبها وما ارطب لسانها . ليدك في العاهد الله دهشني قلت هافا الحديف منين جاها عيادة

كهو عاد تقلك لمتا بيها هكة والراجل تفرك وما يسد عليا كان جويراتي وفاقت على روحها . الحمد لله احنا مافابنا كل حبيب بخير

_ ايا كبيتشي ها السفساري وخرجت يا دوجة انا نبرمج اعماك ونندم ، نعرفك محلولة حساء ، نمشيوا تريكزة ونرجعوا نحكيوا بالوهرة ونعملوا عالة تاي انا تعرفني الحديف هب هب ما نحبوش ..

_ ايا عسالامة يا مجيدة طابشي؟

_ والي جاء جابشي يشويك ما اطول عمرك توة تفكرتك وشاربي كلا من الصباح انا وقت سلامي ياكل لازم شكون يجيني ، ايا اكدس اكدس خوف بلاصة سعدية رقيقة توة مشات

_ اووه بشية تشويها والله عينيا عماوا بوحشها رقيقة علاش ما كدستش العشية مازالت وين عادها

– والي في جرتو حنضلة كيف راجلها تنجم تكدس هي ، في غير جاهك دوب ما حطت صورديها وصبيتلها كاس تاي وهو عيطلها من الطابية قلها طلعتلك دوارة ايجا اغسلها ، قتلها هاكة الراجل بالشهاوي وبالصعوبية لا تخرج لا تدخل المغبونة وحزار مشوم يشوم فعلو حتى عرس بنت اخت سلفتها ما حطهاش تحفر خاطر عوف يجيبوا بندارات جابوا عوادة لا بعد خاف عليها من مولى العوادة لا يحارصلها ، غابنها يراه مغبون ، مرة دخل للزنقة يلقاها واقفة معانا على قصدار الصواني خف عقلها وخرجت الجفنة تقصدرها ويا وقفة الشوم كيفاش كيفاش تاقف مع راجل في الزنقة وبعفها لدار خوها لا كابر اولادو ولا بناتو الي في وجه ماخفة ، وماقتهم هاكة البنات مسيكنات شكون يكهب عليهم وبوهم هكك الفبان الفكر ما يركزش عليه

_ والله يسخفوا هاكة البنات يجيوا بحفا عبيشة وكنتي مهيرية بالسرقة وناقصين مسيكنات بعدلي ما يروحوش للبلاد والله الواحد موش باهي يحكي اوكم مرة قليسطات ومرة بوسطوات حتى قليصنات يفرحوا بيهم مسيكنات ، تريكزة بالواقفة ويمشيوا

_ يعطيه عما يعميه انا ما نحبوش الحق الي يراه هكك وهو عينو حرشة وين يراني يهزني من فوق اللوطة وياكلني بعينيه فقصة في عينيه حاشاك مرة لقاني في الزنقة وحلف يخرجني وراه على الموبيلات حشمت الكق يقلكشي المرا شبيها وركبت وراه هو ريحتو تعشق الحق ودبيشاتو يللشو ومحلاه ومحلا كلامو والله لا فقت بالزنقة وراه غيرشي هو طالع لفهرة والا راهو هبطني معاه ، انا هبطت وخيتك وسفسارية كبش في العجلة وطوقي عريان والله عينيه لا هبطو من عليا لين حشمني وليت وخيتك نلف في هاكة السفساري كيف المجنونة وهو قلي بالله طل على رقيقة عندنا في الدار يا مجيدة راهو عندنا القلب الي يحبك ، ايا شفت شيخرج منو وهو مع مرتو وبناتو ماشي يقتلهم

– يكب والله سعدو وهو مازال يخرج عليه هافا ومع شكون مع مجيدة يعطيه والله تمسيدة

_ بالله ما تدعيش عليه يا دوجة موش باهي خليه بلاه يجي على غير يدينا ، انا حكيتلك كان انت كان يسمع سيدك قادر يحلف عليه لا نمشيولهم لا يجيونا على الاقل هكة انا ساعات نمشي نطل على سعدية رقيقة

_ بالله سمعتشي بفريخية قلك جاء شكون يخطب فيها وقبلت وخفاتو ، بعد ما مات راجلها وقالت لا نحب لا رجال لا حبال بعد المرحوم اوكي قايمة تاخف في راجل يا عار ويا هوة انا والله نراه عياه هافا الي فمة ريناه عوف تتلهى بصغار ابنها قايمة تعرس

_ بالله يزي عليا قلو خفات فريخية ؛ وبرة مازالت صغيرة محسوب انداد انا وياها اما يشرق هو قدام اولادها وكناينها ، لا هافا عقار كبير يراها في بير ، وشكون خفات الله يبارك؟

– حمو قلالة بنت سيدك سعيد ماهو عزوزتو ماتت وقعد وحدو المغبون من دار لدار والبنات تعبوا والكناين قالوا ما نهزوش ياسر علينا ، اكهو عاد قالو ناخفولو مرا جات الرمية على فريخية وهي ما كانتش من العاكسين يعطيها فربة بسكين على ها العملة الي عملتها ، هو الرزق خيرات وفي خير خميرو اما الي تلوج عليه هي ما فاهرلي الراجل قداش من سنة هجال وكبر في العمر يجعلو يطلع درجة السرير حتى يعرس

_ اوكم يلقاوا سعودهم يا دوجة يصفى يطلع السرير والا يكدس نهار الي يمد سقيه وتجيها ورفة تربح كان هي بعدلي الفمن تورف

_ لا تورف لا تلتخ. القلالة تعرفهم يعطيوا رزقهم انت؟ تلقاه كتب لاولادو كل شي اسألني انا على القلالة عندنا العرف من مرت خويا الطاهر ماهي قلالة وارفة على بوها حوازة وكل عام تجيب الخير والخمير من زلاوز وغلة وليدك في العاهد الله ورحمة بويااا عبد الله كيف تبدلنا كعبة زلوز صم لا ريناها منها حاطة خوها متكلف بكل شي ويجيبلها صر الفلوس طول تمشي تخليهم في البوسطة هاكة سيدي الطاهر مقهور منها وساتك على داه منها

– بالله حتى سي الطاهر شخلاه بها لا قال زينها مقطع الدنيا وجها كيف الكرع وموش مرتوبة وزيد الحفاقة فوق الكل

_ ها الكلام الكل قالتهولو امي يرحمها وهو قلك هي ولا هي وحنا وطنا فيها تقول شعملتلو وفي الاخر مكتوب وخيتي

_ شعندنا فيهم بالله شدخلنا في الخلق غيرشي الحديف جبد بعفو ، فك علينا منهم يصفاوا وينفاوا قدينا همنا احنا ، ايا انت جيت جيت وجيتك عزيزة هاكة سيدك قادر شاهي افيم كسكسي بالكركوش اخرج معايا للدويرة قطعلي شوية خفرة خلي نحرق هاكة الكريكشات وتوة نجيبو مولى بيتك ونتعشاوا مع بعيفاتنا

_ خصتني كان نقعد يا مجيدة خليت الحمص يتنفخ ومهيرية تسمط في الملخة ماشي نعمل طنجرة بالملخة ماهي تتوحم مهيرية وشاهيتها وما نكفبش عليك قصولو يدو جات سمحة للطنبور مكنتها فيها تشوشطها باش تشم الريحة ويتنحا عليا ها الوحم المحنون ، خلي ربي يشنقني كرهت وحمها اهو شاهية حلقوم اهو شاهية تحني وتحرقس اهو شاهية متاع هاكة المغبون اليهودي

_ الريح البرة اللطف شوصلها لليهود زادة

– هاكة الفيلفاي والا الريفاي والا شسمو من عند اليهودي ومحسن ابني يكركر ويجيب لين جابتها لروحها في ها الملخة خلي تشوشط وتشم ونرتاحوا الناس الكل يراها في الذل

– وهي شقام عليها تحبل بعد فلافة صغار عجبها الشي ياخي وهاكة البلاوات الي عندها الي قريب ينقبوا السماء براسهم امس ولدها الصغير لقيتو في المطمورة يشد في الارينبات وبهفللهم شوايرهم الا ما طلعتو انا وفربتو على ترامو وبعفتو لامو

_ شفت وخيتي شفت راهم بلاوات قلو شهزك للمطمورة يرا عين امو مقعورة مسيبتهم على الجيران وبس نتكلم تفوح فيا وتقلي صغار خليهم يلعبوا نقلها راهو جيران العمر بهفلوا بحالهم تقلي الي ما عجبوش يخرج ، يخرج مصرانها من مرا كان صحة الرقعة ويعطيك ربي يجي محسن ابني تقلب الحديف عليا وولي يلومني انا ، شفت وخيتك شنعدي يا مجيدة يعطيهالها بين العينين بركة بوعكازين

_ لا عاد يجعل منها رتيبة كمونة كنتي كل ما تنكر الشريعة فيها الا انها تصحح عينها فيا لين عاد يهودي واعطيه حقو تعمل عمايلها من تحت لتحت تقرص ويدها تحتها حتى قيماتها كبار على راجلها تصفى وتنفا هي وياه سيدك قادر حاكم عليا ما ندخلش وفيمي ساكت اوكة نصل وبرة والتوفيق ابني شاربها عسل يراها بالقمل

_ الي تشكيلو يشكيلك يزي عليا وبرة الواحد يشوف هم الناس يقول سعدي بهمي تقول شعمنالهم موش هافي الي عطاتك اللوبان والسواك وقت مشيتو خفيتوها وسيدك قادر نادالك للبيت

_ حتى هي من ليلتها عوينتك ما ترا سو الي عطاه على النوم سيدك قادر يا لندرا شخفتو لو موش نعرفو نقول راهو عود عرس ، توة بالله شجبدك في الموفوع يا دوجة؟

_ الهم في كل دوار وخيتي تقول هو وسيدكة النوري قاريين فرد مدب ، يالا شعندنا فيهم سعداتها فريخية وبرة ماشي تغرم زمانها

_ بالله استك عليا قلو تغرم ، ايا شقلت في العشاء وخليوا الهرقمة لغدوة والله يفرح سيدك قادر وقت يسمع بيكم

– انا بالحق قريب نقول واك على فم كسكسي بالكركوش ملي القطاطس لعبولي في تاناكت القديد وانا قعدت بلاش اما خليني نمشي لا يقطعك اما غدوة خليلي فم نجمروه لشقان الريق دبر راسك اغرفلي باقية من الليلة وخليها تحت المكب

_ هاكة الي بيك وخيتي والله نعبيلك البلاطة المطلي الي خفيتها جديدة راك عزيزة يا دوجة

_ يحيك ويبعد الشر من عليك ، ايا خليني نمشي عاد شمازال المغرب قريب يفن وهاكي المرا مهيرية تستنى يعطيها تنحية بركة السيدة منوبية كلات على قلبي غير الي تبلا يصبر ، برة بقيتك بخير بعطيه بعزة الوقت شيجري ما حكينا شي اللطف وما شبعتش بيك

_ محلاها كديسة معاك يا دوجة انا ليدك في العاهد الله ما نمشيش للجيران كان اللازم في اللازم وعلى معلوم وخيتي لا نحب حديف في الناس ولا تلقليق وهوما ينفخوا الراس اللطف ، ايا ماتنساش شقان الريق غدوة ونحكيوا بالوهرة هافا حديف هب هب ما نحبوش وكان عندك رويسات بجل جيب معاك البجل متاعنا شواونا عليه الدجاج والارانب تقول جاتهم العاهة اللطف مطيمراتنا