اصعب مهمة يعطيوهالك في العرس هو انك تجيب الصناعة وترجعها , يقولولك اوكي في السلطنية زنقة ندرا شنو وامشي عاد وابدى اسال على الزنقة ورتيبة الصناعة …

بعد عناء من زنقة لزنقة توصل وتدق الباب تخرجلك امك رتيبة وتقلك توة جايني وانا نقلي في عشايا ايا تعرفشي باش ما نبطاوش برة جيبلي رطيل بصل وقرنات فلفل وحكة طماطم ونمشيوا , تمشي تجيب القضية وتستناها وتقلك يسالشي نتعداوا في عرافنا لبنتي نجيبوها تكمل تطيب هي عشاء بوها واخواتها , بنتك وين يا للا رتيبة ؟ اهي هوني في قرمدة , نمشيوا لبنتها ونرجعوها للدار وبعد تقلي ايا استنى عاد نبدل سفساريا ونهز الماعون الطار والبندير والدربوكة , تدخل وتخرج معاها صر الماعون وتركب دوب ما نشدوا الثنية تقلك يشويني كيف مفهوبة الشيرة وليت اوكة خرجت بشلاكتي عوف نلبس دماقي برة يفبت غرستك نرجعو نلبس الدماق ,

برة ترجع , وقتها تقلك ايا شد فنيت قابس نهزوا لطيفة وبنتها الي يخدموا اعمايا , شدينا فنيت قابس , ايا هذم وين يا امي رتيبة ؟ فعلا عزاهم البلايص تبدلت عليا وقيلا في حي المعز برة ادخل توة نولي نعرف وين , ايا ما نطولوهاش توصل للطيفة وبنتها وتلقاهم مازالوا يكملوا في طلية صابون , ايا نكملوا ونمشيوا يا رتيبة وادخل بحفانا ودخل هاكة السبتري الي اعماك توة نعملولوا كاس تاي , ما نحبش تاي اخرجوا برك …

ايا يخرجوا ونوصلو لدار العروسة في ثنية العين , يبدى عاد الزغاريد اسمع افزع الصناعة جات ويبدى التشفشيق والله كريم والرشقان … ايا اهم كملوا رتحنا , يجيك بو العروسة يقلك برة لا يقطعك وصلهم ماك تعرف منين جبتهم , ايا تركب رتيبة ولطيفة وبنتها وتقلك نوصلوها هي قبل راجلها حنظلة لطيفة وما يحبهاش توخر , تقوم لطيفة تقلها ايا هات الجورني يا رتيبة اوكة خيرات الرشوق اليومة , تقلها لا خيرات لا تسمع الكفب وخيتي عاملين 10 لاف من وحدة لوحدة ترشق بيهم وعلى العشرة دينار عندنا ماك تعرف حتى ام العروس قالت عطات 50 وانا يراهم بعدي , اهي 10 ليلك و10 لبنيتك وربي يهني الامة يا لطيفة ,

تقوم لطيفة وجها يطوال وتقلها ما يزيش قد جياني وسفساريا لحسة بلصقة بالحنة وبنتي يديها طاحو بالطار اما شماشي يعمل الميت قدام غاسلو هاتهم وبرة ويجبر علينا ربي , ايا عيش وليدي اوقف ناخف الخبز للعشاء وفرد مرة خوفنا قازوزة يباركلك , ايا تراكي وتقضيلها وتقلك والله لا عندي صرف كان واتات خطرة اخرى تعدى نعطيهملك هاك عرفت الدار ,

ايا توصلهم وتشد الثنية للسلطنية والمغرب غرب وبدا الظلام , يا امي رتيبة ايا قلي منين ندخل لدارك ؟ تقلك وليدي فعلى بوه الدنيا فلام وانا النفر جمالي اوكة في راس الزنقة دجّاج عندنا وانت زيد شوف , توة شماشي تشوف وفمة دجاج يقعد للمغرب هو؟ , باهي عندكشي نومرو ولدك والا حد نطلبو , تقلك كونشي المنجي جارنا نومروه في السطوش خاف شوفو ,

ايا تراكي وتحل السطوس وتلقى مخزن غادي يا لوبان يا محرمة يا سواك يا بلوطة ملحومة بالوشق يا دوارو وعشرينات …. وتطلع ورقة فيها نومرو المنجي وتطلبو يقلك انا في القهوة نلعب في الرامي كان تحب ايجا استناني نكمل وندخلوا مع بعضنا , وتعدى للقهوة وتستنى المنجي ويركب وتدخلوا وتوصل رتيبة ودام الفرح وربي يكمل ويهني ان شاء الله

– بالله كيف تخرج الزبلة نحيلي كعيبتين قارص في يدك

-لين القارص موش قلت العشاء كسكسو؟

– دبر في بويا انت لين ، لازم تحشي خشمك في كل شي ماهي نحي كعبتين وجيبهم وبرة

– لا يعطينا ما يغلبنا ، باهي وتحبشي حاجة اخرى مادامني متعدي للقهوة

– و اشخص كان يسكروهم ها القهاوي خلي تترهن بحذانا في الدار ، انا سمعت بتسكير القهاوي قلت نحضر روحي وقيلا اهي فرحة وما تمتش المحروم محروم

– شعندك ما تحضر ماهو حاضرين من قبل والبن والسكر عندنا في الدار

– بن وسكر ؟؟؟ يراني نبحر خليك ترتاح

– امين

– شتمتم وتقول انت؟

– شيء قتلك اللطف عليك ، ايا موش لازم الخبز مادام كسكسو هواشي توة نعمل قهوة ونجي

– لا قهوة لا لهوة خرج الزبلة وايجا نحب نمشي لامي ناراها عملتلي كعبات حمصية يباركلها موش كيف شعندنا فيها نسمع بالمقروض الاسمر سمعان ذقتو عند اختك قالت امك عملتلها

– قاتلي هي تعدى هز بلاطة بالمقروض غير انا ما مشيتش راهو

– بالله يزي وانتي ديما تغطي عليهم ، شعندنا فيه بالشفاء ، ايا اعطيني عشرين نلف نلقاشي نفيسة اختي غادي نعطيهملها تحبهم عليا خذاتلي حجاب وبوسطو والله توة قداش وانا حشمانة منها

– بالله ناقصة دبش انتي ،حال لين الخسارة حتى تلبس الي عندك

– تعرفشي كيف الي يحكي في حلمو لراجل امو ، توة تعرف شعندي وشما عنديش انت ، هاكة كان جيت لاهي بيا اما خليني ساكتة خير ، حتى تقد الفيس بوك والتلقليق مع النساء ، اسمع موش لقيتني ساكتة معنتها راضية راني والا راقدة على اوذاني واهو نقلك ما عادش يساعدني راهو

– تعرفشي اهم خمسين نلف خلص نفيسة وشوف شناقصك اخر تاخذهولك وايا اخرج امك تستنى تلقاها والمقروض الاسمر غدوة نجيبلك حكة شامية من عند امي وهذي حارة قارص الي وصيتني عليهم ….

وانا نشوف في اعراس توة وكيفاش ساعات حتى الخو يمشي لخوه كان للصالة ودار العرس الحس بايت فيها … رجعت بالذاكرة لاعراس حضرتهم وانا صغير وخاصة الاقراب منهم …

تفكرت كيفاش من قبل العرس بنصف شهر واحنا متلمدين ويبدى حلان الحلو من صمطان الزلوز لتقشيرو لرحيانو وكل نهار يتحلوا صواني واحنا داخلين خارجين للكوشة وكان الحلو فاوح وبوهرتو يعني كعبة البقلاوة والا الملبس تقول ربع خبزة وريحتو تجيبك منين وخاصة الملبس وقت يتكسى ويترمى تحت الجفنة بالكانون وطبعا ما يحلى الملبس كان مسروق وكنا نعين عساس في باب البيت وباقي الصغار تحشي يدها تحت الجفنة وتمد الملبس … وفي وسط ها المعمعة الكل كان الي يدخل وفي يدو قضية تابعة العرس يزغردوا عليه …

هذي دخلت بقصة للعرس ري ري ري وهذا جاب صباط لعرس ري ري ري وكل ليلة تتمد الدربوكة وتبدى الزهويات على السطحة او في وسط الدار وهاكة الغنايات السماح نلمو نلمو نحبو ونكره امو ، لليري يا منة ، نوار اللوز يا مفتح ، يامة سامحيني طيحت الڨلة ، وصبوا الرشراش وناري على الزينة يمة … وقبل العرس بجمعة تتذبح البڨرة او العاصي ويتخبى اللحم ما يظهر كان نهار العشاء الكبير الي فيه صحن برميار سلاطة مشوية وسلاطة خضراء ومطبق طاجين وصحن دوزيام فيه مصلي بطاطا وصحن تروزيام فيه كمونية … والديسار دلاع بارد مازال كيف طلع من البير وبعد تمشي لليان تصوبن يديك وواحد من الصغار يصفيلك …

لكن قبل العشاء وفتكم بالهدرة جمعة كاملة الفطور والعشاء وشقان الريق مشتقات البڨاري هوما الي يطيبوا من كرش وكروع وملخة وذيل ولحم الراس … معنتها لو صغار توة حضروا قبل راهم ماتوا بالشر لانو الماكلات هذم يتباوعوا منهم. … عاد قبل العرس باربعة خمسة ايام بعد ما يتعبى الدبش في الكانستورات ويتڨربط ويتزين تجي الكميونة والكراهب لهزان الدبش وطبعا الكميونة فيها المزاودي والشطاحة ويقولونا ردوا بالكم تتكاوا على هاكة الجراري والمسند ويبدى كنسترو روز فيه السبابط والشلايك يظهر منهم كان التالون والقعر معبي بالطفل وشوش الورد ودبوسة شمبوان فيزونات ويوصل الدبش ويهبط المزاودي على السطحة وتربخ وقتها لين النساء يكملوا ترصيف الدبش وكانت ديما تبطينا هاكي الي تتلهى تريڨل القلاصن والبوسطوات ما نعرفش علاش توخر ، اخر ضربة يشدو وليد صغير يڨرڨبوه على الفرش قال شنو باش تبكر بوليد العروسة ،

ومن غدوة عاد الحمام ويمشيوا النساء والبنات على سقيهم زنقة كاملة وهوما يدربكوا وتربخ الدربوكة في الحمام وساعات تقوم عركة بين اخت العروس واخت العروسة تقلها الي جبتوهم خلصوا عليهم انتم قداش منو خويا والاخرى تقلها ما يهمناش هاكم تابعين العروسة هو يخلص …

ويجي نهار النزول عاد والي يكون ديما في الجنان ونبداوا من الصباح نصبطوا ونبخوا في الجنان من باب الحوش واحنا ماشين ونحفروا بلايص المادري ونعلقوا فيهم التيبات والبوق الالمنيوم ونحلوا هاكة الكراسي الي يتطواوا وقدام منصة البندارة نفرشوا باش خاطر الغبرة متاع الشطيح وتجي سعاد البندارة والا ببويا والا مرت عبعوب كل ناس شكون يجيبوا ويبدى النزول والشطيح بالفلوس الصبية بـ 50 والمعرسة بـ 100 والاولاد والرجال يشطحوا وحدهم تحت زلوزة المهم ما يقربوش للنساء …وتتجلى العروسة ليلتها ويقعدوا عاد كان القراب والعروس واختو وخوه ويطيب التشيش بالقرنيط وتتجبد الدريوكة ويبدى جو جديد للصباح …

ونهار العرس هاكة في الصالة عاد يا صالة مروان يا العموص يا بوزيد ويمكنونا الصغار في بيت الحلو نستفوا البلاتوات وزوز ڨدعان يفرقوا الحلو وزوز اخرين بڨاجو الڨازوز يدوروا واحنا نحلوا في الشقوفات والڨازوز كان كريش والمسدي والمدب حاجة ليكس يعني والنساء وقتها كل وحدة في يدها هاكي المروحة الشنوة تمروح. والمصور يضرب في الفلاش في الفارغ والناس عاملة جو ويختم العرس بهاكي التصويرة المعروفة متاع العروسة قاعدة على تابوراي وراسها مشنق الفوق والعروس واقف بجنبها يكحل عليها من فوق ودام الفرح وتتغنى يا سيد الاسياد يا حبيبي بورڨيبة الغالي …