– يا دوجة ياخي سيدك النوري خرج , بشية ما لحقتش عليه توة سمعت طرطارتو في الفلة

– شبيك تجري يا مجيدة توة خرج قال ماشي للمركز يحجم راسو والله شعرو خرج من تحت الكبوس وهو كل نهار يقول ربي يطيب علينا خلي نمشي نحجم ماهو كان برد يلسع حاشاك وخاف لا يتسوقط

– انا قلت نخلطشي عليه يخرجني معاه الزنقة ماشية لمحطة الكار قلت نروح نلقاشي دماق وفولارة وقليسطات بشكير ناخفهم من توة , هاكي حميدة مرت ولد سلفي شهرها دخل والمشية لازمة وخيتي خير ملي تولد ونمشي بدماقي القديم كلاتو اللبزة يحشم ولى

– موش عمناول نافسة حميدة؟ يشويها كل عام تولد ياخي والله كان مشات عملت هاكة التنفيم العايلي والا شسمو خيرلها شعلى قلبها شرذمة صغار

– راجلها لا بعد يحب الصغار وزيد ماهو ما جاهش وليد توة الساتت كرش بنات وربي ينوب عليه بالوليد خلي ترتاح المرا

– اما اولاد يعطيه كراد يكدس في الصغار يراه في النار ومنين عندو هو خدام حزام ,كان جاء عندي الا ما نتوبوا عليهم , ايه وبيناتكمشي هنوات هافا كل عام تبيف المرا خلا ديار يولي قداش ماشي تهني

– منين الهنوات؟ وقت عرست هي انا عرست للمنجي ابني لا مازلت نحبل ولا نولد حتى ربي عرف , اما اوكي هي الحق في عرس عبيشة رشقت في الوصف ووين ما تجيني تجيب في يدها حويجة هافي دبيبسة شروبو هافم حويرات عفم وقت مرف سيدك قادر , عاد قلت انا نعطيها فلافة لاف نحطهم في حجر الفانا وهنيتشي هنيت

– على الاقل هز معاك كناينك والا بنيتك وقت تمشي علاش تمشي وحدك كيف غريبة القوم

– بالله استك عليا يا دوجة راني مقهورة منهورة كانك من الكناين تقول باصقين في افام بعيفاتهم قالولك لا بعد هي ما تواصلش , كمونة وقت رمات الفانا الاول ما جاتهاش وكانك من عتورة هاكي من الاول خليقتها مشومة وما تحبش ناس وماشي وجاي وكمل وقت المنجي ابني تلاوات ساقو وعمل جبيرة ما واصلتهاش قالت ما نمشيش , ما تفاهموا كان في هافي الزوز كناين الباقي الكل نحي يدك من شوشتي ويغيروا من بعفهم وانا في وسطهم كيف الكورة انا وهاكة الاولاد يعطيهم غداد وسلسلة من عند حداد ,

– ايه وعبيشة بنتك ماهي تمشي حال معاك

– هاكي غنتها شي اخر لا يوريك سو , سيدي راجلها حاكم عليها البر هاكة ما تعفصوش شقلي وشقتلك الفتحي راجل حميدة حب عليها قبل وحانا وطنا باش ياخفها وصل يستناها كل عشية وقت تخرج تنحي كعيبات هندي من الطابية وهي رامتلو الحق غيرشي مرة سيدك قادر راه تحت الطابية واقف مع الطفلة دخل على غربتها بعرجون وطردو وحلف عليها قلها كان نعرف تقعدلي بايرة هوني ولا تاخفو يا بنت الكلب , اهو راجلها اولاد الحلال حكاولو الحكاية حلف عليها بر دار عمها وما تابعهم ما تعفصوش , اوكي المغبونة يولد من يولد ويطهر من يطهر وهي شادة دويرتها

– ربي معاك وخيتي انا نسخايب كان انا نعاني اهو فهر الهم في كل دوار , حتى انا قتلو سيدك النوري خرجني معاك الزنقة ما بين حجمت انت ناقف على محسونة ماهو ملي هزوا الحيط وهي بعدت كنا نستقربوا من كعباشة الطابية , قلي الموبيلات ما تهزش زوز وانت سمنت وتوة تنقبلي العجلة انا كدست وبرة

– بالله شحالها محسونة كان مشينالها احنا والا عوينتك ما تارا سو, اع عليها حتى هي

– هاكة علاش حبيت ناقف عليها انا ماهي قالو دخلت تغسل في راسها هي كدست على كرسي المطهرة وهو تفرك بها جات على مخروقتها وتزلعت وداختلهم غادي وجرا فيها لا بعد حاشاك مسمار من الكرسي نبتلها في المخروقة وجابولها ولد امك قمرة الفرملي نحاهولها واوكة ماشي جاي عليها يبدللها الفاصمة

– شلعزة انا وين ما نسال على محسونة اهي طاحت اهي ساقها تلاوات اهي تحرقت قعدت كيف بهيم الزغولة من طبة لطبة

– بالله شتعمل العزاية الشي يتسلط عليها وزيد هي ماهي عندها التفرفيش وموش مرتوبة لا في حركتها ولا في لبستها تلبس كان هاكة المشعشع وهي كيف الهتاشة رغم موش مخصوصة والله في خير خميرهم هاكة الخطرة احنا خفينا نفيص رطل نفيص رطل سردينة وهي خفات كيلو كامل في غير جاهك ورويجلها جبد موبيلات جديدة اوكم عشاوا الخطرة الفايتة , اما الذوق يجيبو ربي ودارها كيف راس المجنون طول النهار , انا كان على معلوم نمشيلها اما يهودي واعطيه حقو والله يا مجيدة نمشيلها تهزني من الوطا بالقدر لين وخيتي الكفب حرام

– لا ما فيها باس خلي خطرة اخرى ونمشيوا نعشيوا بحفاها الزوز المرا مريفة وعلى موت على حيا , انا سالتني عليها حورية مرت عمك احميدة خال راجل اختي زبيدة ريتها في الكاس قلتلها حال من راها محسونة وخيتي هزوا الحيط وما نمشيولها الا ما نعملوا الدورة

– يا حسرة على حورية بالله وين جاء حيها قول توة فلافة سنين ما ريتهاش يعطيها بعزة كيفاش ولات الدنيا كنا من الصباح للعشية مع بعقنا قبل ما تحول الدار

– والله حتى هي في غبينة تحرك العزاية وفي غلبة كراية تعاني , اخوتها قطعوها ملي مات الشايب وحبوها تسقطلهم في بايها متاع البرج وهي قالتلهم الف وعف بالله ريحة بويا غادي ولا حرم الله وارف وهوما شقلي وشقتلك هاك موش مخصوصة وراجلك موش ناقص وخلي بايك نعملوه هواء نحلوا فيه شبيبكات , من حينك قطعوها ولكدولها هاكي العزوزة امها قالولها مادامك خفيت الرزق قوم بامك , وهاكي العزوزة كل شي تحت منها وما عادش تفبط ويامة علينا وقت نكبرو وبرة يا دوجة

– اناشرطت على سيدك النوري قتلو اكتب الي تحب الا بيتي وبرجي الله لا تخلينا للكناين والانساب في داري وكان الزم نبيع فهيباتي ونجيب مرا تقوم بيا وان شاء الصحة قد العمر

– اهو حسو دخل سيدك النوري , برة يفبت غرستو خلي يخرجني الزنقة يجبر عليه ربي

– شوف الراجل والله ركبها موش الموبيلات ما تهزش زوز والعجلة تتنقب , يا مجيدة توة انا اسمن منك زعمة يراه يعمى غير يرا مرا عينية تحوال , شبيك رجعت يا مجيدة موش قلت هاكة الراجل ماشي يخرجك

– اوكي عوقتلوا في الفلة من الايسونس قال وخرج يكر فيها قال يرقعها ويرجعلي وتوة نجيك العشية نحكيوا بالوهرة هافا حديف هب هب ما نحبوش انا

– ايا جاوشي الصواني من الكوشة يا دوجة خلي نعبيوا كعبات الحلو في التنيكات ونقصموهم قبل ما يمغرب المغرب

– اهو نستنى , بعفت سيدك النوري ياقف على الكواش خير ما يحرقهم وقلي ياسر عليا الصواني اوكة يباركلو عمك سعيد قلو وقت يحفروا ناديني ندخلهم لدوجة بالكميونة وفرد مرة قال يتعدى يجيب مهيرية من الحمام خير ما تدخل على سقيها

– توة هافا عقلها كنتك اخر فربة في الحلو تمشي للحمام ؟ حل شجارالو كان غسلت راسها في المطهرة وزيد انا وين ما نسال عليها يا في الحمام يا في المطهرة وخسارة الماء فوق كل شي ياخي بالقمل هي ؟ ليدك في العاهد الله ها الكناين ماشي يطيروا على ايامهم ما نعرفش على اخفتهم كيفاش ولاوا

– ماهي عاد زعمة زعمة عملت اعمانا ورحات الڨطو وسبطتت المقروف تقلك نمشي نغسل حالتي , خليها تصفى بعدلي محسن يقلها ديما مشي للحمام , محسوب ما يتعدالهمش بلاش حمام , هي بلي تفوح زميط خلي على الاقل تفهر خليقتها

– يا دوجة انا للتوة موش عارفة لين جايبتنا سحنونة تحل اعمانا الحلو , راهي فركتلي لحمي وهي هافا ما يصيرش هكة , احنا الڨطو نڨرڨبوه يجي هشوش وخفيف , قالبك متاع المقروف يا مجيدة مشوم , برة يشوم فعلها الفرخ يزقق بوه ولينا , وكل شي عديتو الا انها قامت سنجات ولدها وجات طول كدست على الميدة تسبط في المقروف , جاب ربي ريتها وفكيتو من يدها , الي راد الله كان يسمع سيدك قادر لا يحطو في حلقو زڨلام ومشوم في ماكلتو ماك تعرفو , حتى خطرات تجيبنا صحين تفوقنا ماكلتها يقلي هز عليا متاع سحنونة لا نفوقو ولا نقربلو , تقوم انت تجيبها لحلان الحلو يا دوجة ؟

– هاكة عمايل سيدك النوري يا للا , شافها عند عمك سعيد وهو ياخف في قفية الحلو عاد قاتلة اشه ياخي ماشي تعملوا كعبات مقروف وڨطو , قلها ايه وايجا مع دوجة نعرف حلانك يشره , وهي ما كانتش من العاكسين كركرت شلاكتها وجات نقومشي نطردها يا مجيدة برة يعطيها تمسيدة , اوكة جاب ربي ما حطيناها تعمل شي وتلهات بصغيرها وبمريغة التاي ويصفى توة نعبيلها داڨرة كيف يجي الحلو ورات العين طاب الخاطر , اما الحق نيفرة شالتنا من الغريق , مرتوبة هاكي المرا ونفيفة وتشره , حتى القصان خليتها تقص هي الكعبات جابتهم على فرد كعبة والله نخلي فيهم في الصواني تقول نخلي في الفرفار والا فرتار والا شسمو الكعبة للكعبة , قاتلك حفظت على حماتها دباشة وفاتتها شخلى حموها يقلها يا نيفرة ما يحلالي شي الا ما تحطهولي بيدك , وهوما هكة هكة بيها دباشة وراجلها

– لا تشره هاكي المرا الحق اوكي جات واستعنات وعملت اعمانا , موش كيف هاكة الزوز حطايم الي عندي وحدة صبحت مريفة قالت , ما فهمتش منين جاها المرف وهي البارح نسمع فيها مع المنجي للصباح لندرى فاش يحكيوا , وكمونة الي دفنلها بشيمتها في البالة طول النهار تشري في القلاصن والبونتيات لامها والقلاسط للتوفيق , قامت على الصباح وقالت يا بالة يراها كي الزبالة وما تلقاش سبالة , وها , يعطيك ربي بعد كل وحدة بعين اصح مناش تعبي داڨرة وتقول نفوق امي الحلو تقول عملوه بمكاسرهم , ايا فك عليا منهم انا نتفكرهم ونولي نرعش بكلي

, … توة نبينا ونصليوا عليه يا دوجة , هاكي الحوسة بعد شعملت فيها انا والله غير بس مشيت نحفر فطور سيدك قادر وخليتك وحدك

– شعندي نعمل يا مجيدة , مهيرية ماهي مسشات للحمام ورصاتلي انا وقلالة مرت الباشا , هي دورتها رزينة وحركتها متاع تشفتير اما خير من بلاش تنحى الكافر وكدس المسلم وكملت هب هب كيف مفهوبة الشيرة وقالت عندها شوية حنة ماشي تعمل سقيها ويديها واوكي في بيتها مشتحة سقيها على المخدة كيف مطهر العرب , قلتلها بنيتي تشيح والا تقعد حنتك يجيوا الصواني ما عليك كان تقوم تقص اعمايا وتعبي القزادر , قلت باهي وينعم الله عليها كان ما شومتش السلكة في المطهرة وغسيل الراس وهاكي الحنة

– هكة راد الله علينا يا دوجة , نافسة وعروسة في ليلة عيد , توة يجي سعيد بالصواني ونقصوا وحدنا يقص عنقهم لا يسدوا لا يردوا ها البنات تقول رماهم علينا الباي

– حتى تارا عاد سعيد وقتاش تخرج هاكي المغبونة من الحمام , ديما وين ما يجيبها نقلها شبيك لتو يقلي يا دوجة راهي بطات الداخل وقالت الحمام معبي

, والله يجعل منو هاكة الراجل يسلم في حانوتو ويمشيلها بالفمة ويوسع بالو

– مالا تعرفشي كيفاش , انا حليت القزادر يتشمسوا نمشي نمسحهم خير ما يقوطعنا الحلو ونجيبهم ونجيك , وفرشنا في الوسطية نقصوا الكعبات موش كيف الصباح فرشتنا في السقيفة والي يدخل يفحج على الصواني وبلايط العجين

– باهي يا مجيدة المهم ما تبطاش , خلي نشعلوا المجمارة ونعملوا كاس تاي ونكدسوا بالوهرة وحدنا ونحكيوا واحنا ديما كيف مفاهيب الشيرة اللطف نجكيوش كليمتين على بعفهم

– ايا تصوم بصحة البدن يا مجيدة ، اهو ما يدوم شي الايام حل عينيك وغمضهم يطيروا

– اوكم طايرين خلقي عينيا والنظر ولى جمالي ، ليدك في العاهد الله ما عاد ندل شي بعدلي الطبيب قلي عندك الماء في عينك في غير جاهك ، شعدنا فيه ايا مرحبا ورمضانك مبروك

– لا من ناحية مبروك اوكة مبروك من اولو ، بعدلي سيدك النوري صبح يتشهى من نهار القرش وجابلي ذيل قلك يحبو بالملفوف يقرش عليه ، وقصلو يدو جات سمحة للطنبور عاد ، ماهي كنتي نفيسة مرت الباشا ابني تتوحم وطولك يا نهار وهاكة الطفل يكركر وهي تتشهى عليه ، قمت مكنتها في تشوشيط الذيل فمشي ما يتنحى الوحم

– يامة علينا يا دوجة نحبلوا ونولدو ولا من يسمع بينا موش كيف بنات توة حبالتهم بعشرة شنعات كيف هاكة المغابن الي عندي ، اوكة عاد فيبلنا نرمفنوا مع بعفاتنا واولادي دايرين بيا قامت الي هافي قالت نشد داري شقلي وشقتلك الصغار يقراوا ، وهو لا يقراوا لا شي عملوها سبة ، ماهو من رمفان عمناول وهوما فك يدي من شوشتك لا يزي يجيوا قبل المغرب بفتيتة ولا يزي يكملوها ليلة قدام التلفزة وهاكة الماعون الا ما نقوملوا انا وهو ملوح فوق الصينية بدهانو

– هافم عملوا كيف الحريقة الي عندي تعديه نهار كامل راقدة وتدخل عليا للكوجينة مع الافان وتقلي يا امي مجيدة شنعملك ، قلتلها شعندك تعملي توة كونشي تقيم الاذان خلي نشقوا فطرنا

– يصفاوا محسوب نستناوا في عميلهم احنا وزيد نعرف سيدك قادر وسيدي النوري ما يحلالهم كان تطيبنا ولا تملغيزهم هوما ، ايا قلي عاد وقتاش نمشيوا لمنانة مرت الحبيب قلك ماشية للعمرة العاقبة ليلك

– لا خليني هكة بلاش عمرة لا نحكي بحد ولا نجبد حد موش كيفها ما يسلم منها حد ، وخيتي هاكي لين ماشية وهي لسانها يدور برقبتها ، ليدك في العاهد الله كان تستكفى بروحها منانة تحج وهي في مطراحها ، انا كان نمشي راهو على خاطر الحبيب مولى بيتها يشره هاكة الراجل غير مكتوب يعطيها بعزة الدنيا ، اما قلي ياخي منين جاوها فلوس العمرة موش العام افناش وهي تجوح علينا وحتى الزليزوات ما جابوش السنة قالت

– يا للا لا قاتلك ملمدة تفتوفة من قبل وباعت فرداتها والحبيب ماهو كتب هاكة الخرخوط القبلاوي لابنو وشرط عليه ما يكتبلو الا ما يقصلوا للعمرة وهي عاد حرنت تمشي اعماه ، فيبالو يبرد خليقتو منها في بيت ربي اوكي زادت لصقت فيه وكان ما ربي يتقبل وبرة

– الليلة ماهو الصلى ع النبي وموش مبرمجين ، غدوة الليل يدخل سيدك قادر من الجامع نمشيولها يمشيها لاجية من مارا ، ايا قلي عاد شحفرت لشقان الفطر الليلة؟

– اوكي عاد مرت الباشا قامت لا يوريك سو قالت هي ماشي تطيب الليلة ولاندرا كيفاش تجيبو بعدلي جات لامها تطيبها موش فاوح غير حشمت نبخصها ونقلها ما تطيبش ، اما انا نمشي نفرد العصيدة من توة وفي السحور نسخنها ماك تعرف سيدد النوري فلافين ليلة يفركلي يديا وانا نعصد ، اسمع انا تعرفني هافا حديف هب هب ما نحبوش ، خلي نشق الفطر وتتحل العينين ونجي نعمل كاس تاي بالوهرة بحفاك …