– ايا جاوشي الصواني من الكوشة يا دوجة خلي نعبيوا كعبات الحلو في التنيكات ونقصموهم قبل ما يمغرب المغرب

– اهو نستنى , بعفت سيدك النوري ياقف على الكواش خير ما يحرقهم وقلي ياسر عليا الصواني اوكة يباركلو عمك سعيد قلو وقت يحفروا ناديني ندخلهم لدوجة بالكميونة وفرد مرة قال يتعدى يجيب مهيرية من الحمام خير ما تدخل على سقيها

– توة هافا عقلها كنتك اخر فربة في الحلو تمشي للحمام ؟ حل شجارالو كان غسلت راسها في المطهرة وزيد انا وين ما نسال عليها يا في الحمام يا في المطهرة وخسارة الماء فوق كل شي ياخي بالقمل هي ؟ ليدك في العاهد الله ها الكناين ماشي يطيروا على ايامهم ما نعرفش على اخفتهم كيفاش ولاوا

– ماهي عاد زعمة زعمة عملت اعمانا ورحات الڨطو وسبطتت المقروف تقلك نمشي نغسل حالتي , خليها تصفى بعدلي محسن يقلها ديما مشي للحمام , محسوب ما يتعدالهمش بلاش حمام , هي بلي تفوح زميط خلي على الاقل تفهر خليقتها

– يا دوجة انا للتوة موش عارفة لين جايبتنا سحنونة تحل اعمانا الحلو , راهي فركتلي لحمي وهي هافا ما يصيرش هكة , احنا الڨطو نڨرڨبوه يجي هشوش وخفيف , قالبك متاع المقروف يا مجيدة مشوم , برة يشوم فعلها الفرخ يزقق بوه ولينا , وكل شي عديتو الا انها قامت سنجات ولدها وجات طول كدست على الميدة تسبط في المقروف , جاب ربي ريتها وفكيتو من يدها , الي راد الله كان يسمع سيدك قادر لا يحطو في حلقو زڨلام ومشوم في ماكلتو ماك تعرفو , حتى خطرات تجيبنا صحين تفوقنا ماكلتها يقلي هز عليا متاع سحنونة لا نفوقو ولا نقربلو , تقوم انت تجيبها لحلان الحلو يا دوجة ؟

– هاكة عمايل سيدك النوري يا للا , شافها عند عمك سعيد وهو ياخف في قفية الحلو عاد قاتلة اشه ياخي ماشي تعملوا كعبات مقروف وڨطو , قلها ايه وايجا مع دوجة نعرف حلانك يشره , وهي ما كانتش من العاكسين كركرت شلاكتها وجات نقومشي نطردها يا مجيدة برة يعطيها تمسيدة , اوكة جاب ربي ما حطيناها تعمل شي وتلهات بصغيرها وبمريغة التاي ويصفى توة نعبيلها داڨرة كيف يجي الحلو ورات العين طاب الخاطر , اما الحق نيفرة شالتنا من الغريق , مرتوبة هاكي المرا ونفيفة وتشره , حتى القصان خليتها تقص هي الكعبات جابتهم على فرد كعبة والله نخلي فيهم في الصواني تقول نخلي في الفرفار والا فرتار والا شسمو الكعبة للكعبة , قاتلك حفظت على حماتها دباشة وفاتتها شخلى حموها يقلها يا نيفرة ما يحلالي شي الا ما تحطهولي بيدك , وهوما هكة هكة بيها دباشة وراجلها

– لا تشره هاكي المرا الحق اوكي جات واستعنات وعملت اعمانا , موش كيف هاكة الزوز حطايم الي عندي وحدة صبحت مريفة قالت , ما فهمتش منين جاها المرف وهي البارح نسمع فيها مع المنجي للصباح لندرى فاش يحكيوا , وكمونة الي دفنلها بشيمتها في البالة طول النهار تشري في القلاصن والبونتيات لامها والقلاسط للتوفيق , قامت على الصباح وقالت يا بالة يراها كي الزبالة وما تلقاش سبالة , وها , يعطيك ربي بعد كل وحدة بعين اصح مناش تعبي داڨرة وتقول نفوق امي الحلو تقول عملوه بمكاسرهم , ايا فك عليا منهم انا نتفكرهم ونولي نرعش بكلي

, … توة نبينا ونصليوا عليه يا دوجة , هاكي الحوسة بعد شعملت فيها انا والله غير بس مشيت نحفر فطور سيدك قادر وخليتك وحدك

– شعندي نعمل يا مجيدة , مهيرية ماهي مسشات للحمام ورصاتلي انا وقلالة مرت الباشا , هي دورتها رزينة وحركتها متاع تشفتير اما خير من بلاش تنحى الكافر وكدس المسلم وكملت هب هب كيف مفهوبة الشيرة وقالت عندها شوية حنة ماشي تعمل سقيها ويديها واوكي في بيتها مشتحة سقيها على المخدة كيف مطهر العرب , قلتلها بنيتي تشيح والا تقعد حنتك يجيوا الصواني ما عليك كان تقوم تقص اعمايا وتعبي القزادر , قلت باهي وينعم الله عليها كان ما شومتش السلكة في المطهرة وغسيل الراس وهاكي الحنة

– هكة راد الله علينا يا دوجة , نافسة وعروسة في ليلة عيد , توة يجي سعيد بالصواني ونقصوا وحدنا يقص عنقهم لا يسدوا لا يردوا ها البنات تقول رماهم علينا الباي

– حتى تارا عاد سعيد وقتاش تخرج هاكي المغبونة من الحمام , ديما وين ما يجيبها نقلها شبيك لتو يقلي يا دوجة راهي بطات الداخل وقالت الحمام معبي

, والله يجعل منو هاكة الراجل يسلم في حانوتو ويمشيلها بالفمة ويوسع بالو

– مالا تعرفشي كيفاش , انا حليت القزادر يتشمسوا نمشي نمسحهم خير ما يقوطعنا الحلو ونجيبهم ونجيك , وفرشنا في الوسطية نقصوا الكعبات موش كيف الصباح فرشتنا في السقيفة والي يدخل يفحج على الصواني وبلايط العجين

– باهي يا مجيدة المهم ما تبطاش , خلي نشعلوا المجمارة ونعملوا كاس تاي ونكدسوا بالوهرة وحدنا ونحكيوا واحنا ديما كيف مفاهيب الشيرة اللطف نجكيوش كليمتين على بعفهم

– ايا تصوم بصحة البدن يا مجيدة ، اهو ما يدوم شي الايام حل عينيك وغمضهم يطيروا

– اوكم طايرين خلقي عينيا والنظر ولى جمالي ، ليدك في العاهد الله ما عاد ندل شي بعدلي الطبيب قلي عندك الماء في عينك في غير جاهك ، شعدنا فيه ايا مرحبا ورمضانك مبروك

– لا من ناحية مبروك اوكة مبروك من اولو ، بعدلي سيدك النوري صبح يتشهى من نهار القرش وجابلي ذيل قلك يحبو بالملفوف يقرش عليه ، وقصلو يدو جات سمحة للطنبور عاد ، ماهي كنتي نفيسة مرت الباشا ابني تتوحم وطولك يا نهار وهاكة الطفل يكركر وهي تتشهى عليه ، قمت مكنتها في تشوشيط الذيل فمشي ما يتنحى الوحم

– يامة علينا يا دوجة نحبلوا ونولدو ولا من يسمع بينا موش كيف بنات توة حبالتهم بعشرة شنعات كيف هاكة المغابن الي عندي ، اوكة عاد فيبلنا نرمفنوا مع بعفاتنا واولادي دايرين بيا قامت الي هافي قالت نشد داري شقلي وشقتلك الصغار يقراوا ، وهو لا يقراوا لا شي عملوها سبة ، ماهو من رمفان عمناول وهوما فك يدي من شوشتك لا يزي يجيوا قبل المغرب بفتيتة ولا يزي يكملوها ليلة قدام التلفزة وهاكة الماعون الا ما نقوملوا انا وهو ملوح فوق الصينية بدهانو

– هافم عملوا كيف الحريقة الي عندي تعديه نهار كامل راقدة وتدخل عليا للكوجينة مع الافان وتقلي يا امي مجيدة شنعملك ، قلتلها شعندك تعملي توة كونشي تقيم الاذان خلي نشقوا فطرنا

– يصفاوا محسوب نستناوا في عميلهم احنا وزيد نعرف سيدك قادر وسيدي النوري ما يحلالهم كان تطيبنا ولا تملغيزهم هوما ، ايا قلي عاد وقتاش نمشيوا لمنانة مرت الحبيب قلك ماشية للعمرة العاقبة ليلك

– لا خليني هكة بلاش عمرة لا نحكي بحد ولا نجبد حد موش كيفها ما يسلم منها حد ، وخيتي هاكي لين ماشية وهي لسانها يدور برقبتها ، ليدك في العاهد الله كان تستكفى بروحها منانة تحج وهي في مطراحها ، انا كان نمشي راهو على خاطر الحبيب مولى بيتها يشره هاكة الراجل غير مكتوب يعطيها بعزة الدنيا ، اما قلي ياخي منين جاوها فلوس العمرة موش العام افناش وهي تجوح علينا وحتى الزليزوات ما جابوش السنة قالت

– يا للا لا قاتلك ملمدة تفتوفة من قبل وباعت فرداتها والحبيب ماهو كتب هاكة الخرخوط القبلاوي لابنو وشرط عليه ما يكتبلو الا ما يقصلوا للعمرة وهي عاد حرنت تمشي اعماه ، فيبالو يبرد خليقتو منها في بيت ربي اوكي زادت لصقت فيه وكان ما ربي يتقبل وبرة

– الليلة ماهو الصلى ع النبي وموش مبرمجين ، غدوة الليل يدخل سيدك قادر من الجامع نمشيولها يمشيها لاجية من مارا ، ايا قلي عاد شحفرت لشقان الفطر الليلة؟

– اوكي عاد مرت الباشا قامت لا يوريك سو قالت هي ماشي تطيب الليلة ولاندرا كيفاش تجيبو بعدلي جات لامها تطيبها موش فاوح غير حشمت نبخصها ونقلها ما تطيبش ، اما انا نمشي نفرد العصيدة من توة وفي السحور نسخنها ماك تعرف سيدد النوري فلافين ليلة يفركلي يديا وانا نعصد ، اسمع انا تعرفني هافا حديف هب هب ما نحبوش ، خلي نشق الفطر وتتحل العينين ونجي نعمل كاس تاي بالوهرة بحفاك …

ياسين الرباعي:

– يا مجيدة .. مجيدة .. بالله وينهي ها المارا يعطيها تمسيدة

– اقعد اسرج انت طول النهار يا دوجة ، بالله وين عندؤ نكون ، ماهو في الكوجينة يراني في تركينة … بعدلي سيدك قادر جابلي مرقة قد البلاء وقلي ريڨلها لشقان الفطر واستافن اولادوا الافنين بنساهم وصغارهم ، وانا كيف الباصة قلت توة هاكة الكناين يجيوا على بكري يطيبوا معايا ياخي عوينتك ما تارا سو

– حتى سيدك قادر سقيلو وحدو طلع كيف سبدك النوري يبرمج ويستافن ويخليني بين حكمو وقضاه ، ماهو عملهالي ليلة اول ليلة في رمضان ورصاتلي وخيتك وحدي نحضرلهم في شهاويهم ، هافا يحب السلاطة وهافا يحب بريكتو بالعظمة والاخر هو ومرتو يحبوها بالحشو وسيدك النوري الحق ما يلوجش على البريكة اما فم التشيش لازم منو ، وكهو عاد وليدك في العاهد الله ورحمة بويا عبد الله ما كملت كان قريب المغرب وهكك وجات سجيعة مرت الباشا ابني عامل روحها تجري وطرحت صغيرها فوق الجلد وهي يا امي فضيلة شنعملك وفاش نعاونك ، بالله حال في المغرب باش تعاوني قلتلها كونشي تذن خلي نشقوا الفطر

– شفت ماهو ما اصح رقعهم تقول قاريين فرد مدب يقطع دابرهم ، حقة ياخي حميدة تسنافنتكشي لطهور ولد ابنها قالوا ليلة النفص

– برة يارا راسها يتقص هاكي حميدة ، اع عليها احنا ما خلينا فاش جبناها وهي تحرم تقول حتى بالكذب ايجا للطهور ، ورحمة بويا العزيز الغالي الا ما نرميهالها الكلمة وقت تجي في وتوها ، بالكشي نعملولها العار احنا ، يالا تصفى وتنفى ويزينا من جبدان الخلق تعرفني ها الكلام في الناس وتركيب الذنوب ما نحبوش ، وهو لا بعد كيفاش يطهر ولدو ابنها وخوه نازلتو في المحكمة قلك ماشي يطلق مرتو بعدلي امو كرهتو فيها وناوية على بنت اختها تعطيها لولدها

– هو بيناتنا الحديف ، والله ريحها ربي مرتو من هاكة القوم حميدة وبناتها ، وخيتي صعاب الحق وحناضل وما خلاولها دارها مدكان هوما ، اوكة سمعت قلك ماشي ترميلو صغارو عندو والله تستاهل هاكي حميدة خلي يحكولها فمها وبعد ها العمر ترجع للكوش وقرضان الفرش

– يدبروا روسهم والي تلقاه راكب على فركة قلو مبروك الحصان ، احنا ماهو الحمد لله ما نحكيوا بحد وما نجبدوا حد ولا ننقبوا صيامنا موش كيف برشة ناس حسيبهم ربي ما سلم منهم حد

– والله قلت الحق يا مجيدة لوح علينا ، اما بالله قلي محسونة زعمة شقام عليها حالة مرمة توة ، ياخي صحلها عرس الفتحي ابنها

– ايا اسمع يا دوجة انا تعرفني هافا حديف هب هب ما نحبوش ، ايجاني بعد شقان الفطر وتتحل العينين وتوة نحكيوا بالوهرة …