تابعنا على

راجل و سيد الرجال

“صيام”

نشرت

في

ليالي تونس.. ترويح بعد «التراويح»

ايا سيدي كل ليلة بعد الصلاة نمشي نعمل قهوة وندخل للدار ونلقى كل واحد لاهي في نوارو ، الي شادد تلفون وتدخل والا تخرج والله لا يفيق بيك والي منبر قدام التلفزة وغير تقول يمسيكم بالخير يقلك تي اسكت خلي نسمعوا ، ايا نعود نخرج وما يفيق بيا حد على الاقل ناخذ كلمة ونعطي كلمة في القهوة …

ياسين الرباعي
ياسين الرباعي

يا حسرة على رمضان وجو رمضان وتلفزة رمضان الي كانت تلمنا الكل اهي كاميرا خفية واهي فوازير واهم مسلسلات فكاهية وضحكة وتقلق تخرج للزنقة تلقى اولاد الحومة متلمدين وما تدخلوا الا ما يجي الطبال ، وتوة عاد دخلنا النصف الثاني ووقت نبداوا في الزنقة تشوف كان في الصواني ماشية جاية للكوشة والمتعدي والا المتعدية يهبط الصينية ويبدى يحلفلك تهز وتذوق ويقلك ايا شقولك في حلونا السنة ،

تذكرت اللمة قبل شقان الفطر وضربان المدافع هاكم متع المفتاح والمسمار وبعد نطلعوا للسطح ونستناوا المدفع الحقاني واول ما يضرب نهبطوا نتجاراوا بهاكي الغناية المشهورة : افطروا يا صايمين كسكسي بلحم بنين … والفاطر في رمضان الصوم عليه حرام …

عاد من حينك انا عايش في جو الزمن الجميل والنلفون يضرب نلقاها الموجيرة تقلي بالله وينك ياخي ما تشبعش من القهوة … يا بنتي ماني دخلت وقتلك انا خارج وقت انت لاهية بالفلوجة وقلة المعروف الي يعديوا فيها ، وترد عليا وتقلي ورحمة بويا لا ريتك ولا سمعتك ياخي انت وقتاش دخلت ، اهو حتى صغارك قالوا ما ريناهش ، خررف وبرة شوف عاد بشكون تستشهد ، بلازمة هاكم لاهم في الدنيا مبنجين بالتلفون ،

ايا ندخل ونمني النفس بشوية فطاير والا طشطاش عملتهم المرا نلقاها هي غمتني وقاتلي شلعزة ما تجيبلناش كعيبات فطاير في يدك انا والله لا لقيت وقت ملي خرجت وخليتني وانا في الكوجينة خلاف ريت المسلسل وخذاتني عيني مشوار وكلمت سجيعة اختي واوكي تسلم عليك …

أكمل القراءة
انقر للتعليق

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

راجل و سيد الرجال

“فضيلة”

نشرت

في

مسلسلات رمضان - كاريكاتير شريف عرفة| قصة الإسلام

– ابويا ابويا امانك هات الكومند نلوج على الماتش

– اما ماتش زادة ، برة يا ابن الكلب شد بيتك انت وخوك وشوف دروسك

– والله مريڨل ابويا قريت سياي وزيد ما عطاوناش قراية

– ايه حتى يعطيوكم محسوب ، ماهو اقرى وحدك ، ايا اقلب عليا وجهك تراه وخلي نشوف ها البرنامج قلك ماشي يجيبوا جماعة مجلس النواب خلي نشوف شماشي يقولوا

ياسين الرباعي

– بالله يا راجل ما كرهتهمش وما كرهتش خليقتهم جماعة السياسة وانت كل ليلة منبر قدامهم تقول شماشي يعملولك ، ايا اقلب عليا بنات فضيلة قلو نواب قلو دواب يعطيهم والله غداد

– ياخي لتوة ما وفى هو فضيلة ما اوسع بالك من الصيف وانت أتبع فيه ، المسلسل ما تقلقش منو اما كل ليلة تعملنا القمل وقت تاقف درجين في الكوجينة اطيب وتقول قلقت

– ماهو من سعدي الراقد نتبع فضيلة وبناتها لو كان جيت كيف النساء تخرجني وتحوس بيا ماهو راني ما تبعتوش اما انت لا ترحم ولا تخلي شكون يرحم

– وين عندي نخرجك ياخي ، بالكشي فاضي انا

– لصحابك والقهوة فاضي ، وللفيس بوك فاضي تتكوشخ من وحدة لوحدة وانا ما عندكش فضى مسيكن

– وقيلا بدى بنات فضيلة ايا توة نبدلك التلفزة واتفرج …

أكمل القراءة

راجل و سيد الرجال

“كَرنيات”

نشرت

في

La notation et l'évaluation des élèves : vers une révolution ? | L'ÉCOLE DE  DEMAIN

– سعيد يا نصاف ايا شحالك ، خذاتشي الكرني بنتك؟

ياسين الرباعي
ياسين الرباعي

– خذاتو ، الحق باهية عطاوها شكر اما ما جاتش الاولة يطرشق حبتها المعلمة طيحتها في الايقاظ باش خلات بنتها تجي الاولة

– هاكي ماهي معروفة عاد حتى قبل عملتهالي مع ولدي ، والله سمعت وسكت كنت داخلة للمدير بطلت الفايدة في المستوى تصفى وتنفى هي والشهايد متاعها

– وانت ولدك شعمل جابشي باهي؟

– لا الثلاثي هذا انا من الاول موش معملة عليه جابولهم معوضة ماهي انيستو حبيبة ولدت ، الحق كانت تعرفو وهذي ما تعرفش الصغار وما تعرفش تقري حتحتتهم الكل ، حتى بنت سلفي تقرا معاه متعلمة ديما الاولة جات الثانية المرة هذي ، مشينا للمدير قال وسعوا بالكم توة ترجع حبيبة المهم موش في الرتبة الفايدة في المعدل

– اهي جات اساور ندرا شعملت بنتها. يا اساور شحالك؟

– بالله شحالي ماهو خرج من عيني الامتحانات كل ليلة وانا معاهم كلمة بكلمة

– ايه جاشي وجهك للضو شعملت بنيتك؟

– شعندها تعمل بعد الي احنا نقريوا ونتعبوا والمعلم طلع عامل عليها بونتو خاطر ما قراتش عندو ايتيد اوكة قام طيحها في الحساب ونحالها 3 بونتو والله عملتو صحيح غير الطريقة موش كيف ما يحب هو قام كرسحها وزيد جابلهم دراسة النص صعيبة رصاتلها بلاش شهادة ، هو الحق زادة قسمهم قوي بلي معدلها باهي اما جات سبعطاش ، المهم انا نعرف مستوى بنتي محسوب ماشي يدوملهم سي المختار رغم قتلو اول العام المدير نحب نحولها وشيء ما لقاليش بلاصة

– هاكة البلايص يلقاهم كان لجماعتو وتجي فينا احنا يقلك ممنوع ، انا والله مولى بيتي قلي نشكي بيه في المندوبية اول العام غير خفنا لا يعمل بونتو على الطفل

– اهي آمال زادة جاية تظهر مغششة وكانت في بيرو المدير ، يا امال شبيك ياخي شفمة وجهك مشوم؟

– وهوما يخليوا العبد مسلم في ها المكتب ! ولدي خاطر غلطة في المحفوظات نسى كلمة تقوم تعطيه ثمنية ، علاش والله يحكيلي ولد مصطفى المعلم ماهو يقرا معاه ما عرضش بالباهي وعطاتو تسعطاش ، انا سياي ماشي نحول ولدي من ها المكتب اهو بعد نحكي مع بوه نعملوا مطلب ، لا يا حسرة على مكتبنا ونتايجو توة فسد ومعلمين جدد يغيبوا ياسر وصغارنا ضاعوا …

أكمل القراءة

راجل و سيد الرجال

“رُمضان”

نشرت

في

Caricature De Femme Au Foyer En Colère Nettoyage Clip Art Libres De Droits  , Svg , Vecteurs Et Illustration. Image 16612710.

– ايا قمتشي خلي نخمل البيت وفرد مرة طلعلي الفرش للسطح يتشمس ، رمضان غم ودارنا تحوس وانت مولى الدار موش هوني

ياسين الرباعي
ياسين الرباعي

– توة بالله شتحبني نعمل ورمضان مرحبا بيه وان شاء الله نكونوا من صيامو وربي قال صوموا وصليوا موش اقلبوا الدار وطلعوا رجالكم للسطح

– زايد الرجال الكل يد بيد مع نساهم ويعاونوا الا انت ما عطاك على الحومة وغير تسمع بيا ماشي نهز الدار تدخل فيك غولة

– لا الغولة دخلت فيا من نهار العرس

– بالله شتقول وشنو اتمتم

– لا قتلك انا قايم واسمع ما نعمل شي الا ما نخرج نعمل قهوة اهو نقلك

– ما عملت انت القهوة الا ما كملت كل شي ، ايا تعرفشي مالا كيفاش انت خارج خارج ، اهي ورقة لقضيات رمضان جيبهملي

، – باهي هات لهون الورقة نشوف شفيها

– فيها الخضرة والغلة اوكة قلك البنان والتفاح رخصوا فيهم امشي اسمع واسكت عاد وما تاخذهمش، والباقي حكاية فارغة من المغازة النعمة وحكك الطماطم ومواد التنظيف وما تنساش البن والسكر والزيت النباتي وزيت الزيتونة … وحقة راهو اللحم ما قيدتوش قلت عينك ميزانك خوذلنا حتى ثلاثة كيلو علوش يقعدوا في الفريجيدار نستحقهم للشربة واتعدى تلقاشي كعيبة والا هوما اثنين قرنيط ودجاجتين وبلاتو عظم …

– اسمع وقيلا الاولاد صحابي كل واحد لاهي مع مرتو في الحركة عندهم الحق رمضان غم غمان وزايد نخرج للقهوة ، ايا هات شنطلعلك للسطح وعبيلي سطل المسحان انا هابط ما نبطاش.

أكمل القراءة

صن نار