راجل و سيد الرجال
“عرس”
نشرت
قبل 10 أشهرفي
من قبل
ياسين الرباعي Yassine Rebaïونحن على ابواب موسم الاعراس برشة عادات تنحاوا … فمة عادة برك ما تتنحاش ظاهرلي هي الاستديو التحليلي بعد العرس …
اول ملاحظة روبة العروسة وحجامتها
، بصراحة روبتها مهياش يدرشل عينيهم ياخي من قلة الروب هي بلحمتها وخذاتها ضيقة خرجت فيها كيف المصران وكمل هاكي الحجامة عاد ياسر بلحطتها لين هاكة المكياج الكل وكمل هاكة الي فوق عينيها تقول حطتلها ورقة سلق غادي انا ملي قالولي حجامتها فلانة وانا قلتلهم حال تمشي لفلتانة خير اوكم ما يسمعوش الكلام وخرجتها كيف الكلون مبلحطة يستاهلوا …
، كل شي يتعدى ولا هاكة العروس تفرك وفركها معاها بالشطيح الله منها مسكينة مع الكسوة رزينة حال لين هكك كيف دار الهبج
، هاكة الي فاتك اغرب عاد ، امو قد ما فنكوا فيها الناس تكري روبة قالتلهم لا نحب نخيط ، شفتشي هاكي الهيبر الي لابستها وهي تلحق فيها لاخر نهار وخياطتها حموم طلعت يكسر يديها
.ياخي ما تقولوليش خلت العروسة وين لا ريحتها ، زعمة لتوة عازز بها من ليلة العشاء وعملتها وما جاتش ؟ـ
وخيتي عندها الحق حال كان استدعاولها سلفها شكان عليه وهنات عليهم في العرس ، اوكي كملت خذاتلهم الحلو من عند جارتها جاب ربي وحلفت ما تحضرش
، لا محسوب هو حلو خليني ساكتة خير ، حال ناقصين فلوس هوما عاملينو هكك بقلاوة يابسة حجر الي راد الله قرشت قرشة شوية لا خليت سنانتي غاد
، حال مشاوا لمدام فلانة غير ما يسمعوش الكلام حلوها يشره ، الي مشاولها موش مدام قلك لتوة ما خذات تيتر مدام اوكي تحل الحلو وبرة
، انا حتى الصالة الحق ما عجبتنيش ضيقة وسخنت والله بالشرشارة العرق ليلتها وزيد سقفها واطي وتجاوب اوذاننا طرشت بالحس ومع هي فرقة عوالي يا ثوم يلوجوا على الرخص
بالله شعندنا فيهم وربي يهنيها الحمد لله عرست الطفلة والله وقتنا هذا الي يعرس لبنتو عبارة قتل عقرب وربي يهني الامة
ما ظاهرلي راهي حريقة قد ما هي صبية وما يسلم منها حد وراجلها يظهر بحويجاتو زادة والا ما تسمع عليهم …
كهو ربي يهنيهم وخيتي
تصفح أيضا
ماهو عاد كانت عطلة وسيدي رمضان ، قلت نصبح راقد فتيتة ونقوم نهبط كيف العادة ولا تقطعلنا عادة نعمل دورتي في بلاد العربي وسوق الحوت وبوشويشة ونعمل ضحكة على هاكة الناس المرمضنين الي على اي حاجة يعمل عركة ومشكلة وتتلم الحضبة وتكبر الحكاية وفرصة عاد لجماعة السطوشات الي يتحشاوا في الحضبة والنبي مولاك يبداوا يسترزقوا …
الحاصيلو نرجعوا وقت انا راقد ونسمع في صوت بسم الله المانع الستار تقول زلزال ونقوم مرعود نجري يا مرا شفمة ، قاتلي الحس جاي من فوق يا لندرا شبيهم لاباس دار محسونة الي فوقنا ، هكك ونخرج نطلعلهم ندق الباب وخرجلي جارنا الهادي مشمر يديه وقلي ايا تصوم بصحة البدن مرحبا بيك ، اما بدن قتلو وانا قمت كيف الفروج نرعش ، يا بلها ما عندكم سو ان شاء الله شنو ها اللطيخ عندكم ، قلي لباس هاكة ماهو خذيت قرنيطة خاطرني ثلاثين ليلة نحب التشيش بالقرنيط ، ايه عاد من حينك كركرت طاولة الكوجينة حيدتها على جنب واهة قاعد نخبط فيها اهو قريب نكمل التخبيط وبعد توة نكملها بعصاة البازين ونكسكسها …
ايا ريتو بلها جاري هو ياكل القرنيط وانا ناكل الفجايع على الصباح ، برة شعندنا فيه وبالشفاء انشاء الله تلقاه جبد قرض باش شراها ها القرنيطة اما المشكل شماشي نقول للموجيرة وها الحس شنو هو ، كان نقلها قرنيط توة تقلي قعدنا كان احنا بلاش وانت ما تاخذلناش وانا صايم موش ناقص تقرقير وزيد القرض الاول لتوة ما خلص باش نزيد قرض اخر للقرنيط ، ايا تعرفشي كيفاش قلها الهادي طاح في الكوجينة وهاكة الدبك خاطرو قعد يتسكك العزا ،
وكان الحديث هكك ، ولات وقاتلي تعرفشي كيفاش مالا توة صيام اما بعد شقان الفطر جيبلنا طرف بنان وتفاح هاكة متع كيلو اربعطاش نلف ونمشيوا نطلوا على الراجل هذم جيران ما فيها باس ، اكهو عاد لقيت حسبة البنان والتفاح تقرب لحسبة القرنيط وعلى الاقل ناكلوا انا موش بلها ياكل القرنيط ونزيدوا انا التفاح البنان ، قمت قلتلها تعرفشي هاكة الهادي يدق في قرنيطة واهو توة ناخذ كعبة حتى انا ونجي ندقها وشد دارك ها الليلة قلو تفاح وبنان
ايا سيدي كل ليلة بعد الصلاة نمشي نعمل قهوة وندخل للدار ونلقى كل واحد لاهي في نوارو ، الي شادد تلفون وتدخل والا تخرج والله لا يفيق بيك والي منبر قدام التلفزة وغير تقول يمسيكم بالخير يقلك تي اسكت خلي نسمعوا ، ايا نعود نخرج وما يفيق بيا حد على الاقل ناخذ كلمة ونعطي كلمة في القهوة …
يا حسرة على رمضان وجو رمضان وتلفزة رمضان الي كانت تلمنا الكل اهي كاميرا خفية واهي فوازير واهم مسلسلات فكاهية وضحكة وتقلق تخرج للزنقة تلقى اولاد الحومة متلمدين وما تدخلوا الا ما يجي الطبال ، وتوة عاد دخلنا النصف الثاني ووقت نبداوا في الزنقة تشوف كان في الصواني ماشية جاية للكوشة والمتعدي والا المتعدية يهبط الصينية ويبدى يحلفلك تهز وتذوق ويقلك ايا شقولك في حلونا السنة ،
تذكرت اللمة قبل شقان الفطر وضربان المدافع هاكم متع المفتاح والمسمار وبعد نطلعوا للسطح ونستناوا المدفع الحقاني واول ما يضرب نهبطوا نتجاراوا بهاكي الغناية المشهورة : افطروا يا صايمين كسكسي بلحم بنين … والفاطر في رمضان الصوم عليه حرام …
عاد من حينك انا عايش في جو الزمن الجميل والنلفون يضرب نلقاها الموجيرة تقلي بالله وينك ياخي ما تشبعش من القهوة … يا بنتي ماني دخلت وقتلك انا خارج وقت انت لاهية بالفلوجة وقلة المعروف الي يعديوا فيها ، وترد عليا وتقلي ورحمة بويا لا ريتك ولا سمعتك ياخي انت وقتاش دخلت ، اهو حتى صغارك قالوا ما ريناهش ، خررف وبرة شوف عاد بشكون تستشهد ، بلازمة هاكم لاهم في الدنيا مبنجين بالتلفون ،
ايا ندخل ونمني النفس بشوية فطاير والا طشطاش عملتهم المرا نلقاها هي غمتني وقاتلي شلعزة ما تجيبلناش كعيبات فطاير في يدك انا والله لا لقيت وقت ملي خرجت وخليتني وانا في الكوجينة خلاف ريت المسلسل وخذاتني عيني مشوار وكلمت سجيعة اختي واوكي تسلم عليك …
– ابويا ابويا امانك هات الكومند نلوج على الماتش
– اما ماتش زادة ، برة يا ابن الكلب شد بيتك انت وخوك وشوف دروسك
– والله مريڨل ابويا قريت سياي وزيد ما عطاوناش قراية
– ايه حتى يعطيوكم محسوب ، ماهو اقرى وحدك ، ايا اقلب عليا وجهك تراه وخلي نشوف ها البرنامج قلك ماشي يجيبوا جماعة مجلس النواب خلي نشوف شماشي يقولوا
– بالله يا راجل ما كرهتهمش وما كرهتش خليقتهم جماعة السياسة وانت كل ليلة منبر قدامهم تقول شماشي يعملولك ، ايا اقلب عليا بنات فضيلة قلو نواب قلو دواب يعطيهم والله غداد
– ياخي لتوة ما وفى هو فضيلة ما اوسع بالك من الصيف وانت أتبع فيه ، المسلسل ما تقلقش منو اما كل ليلة تعملنا القمل وقت تاقف درجين في الكوجينة اطيب وتقول قلقت
– ماهو من سعدي الراقد نتبع فضيلة وبناتها لو كان جيت كيف النساء تخرجني وتحوس بيا ماهو راني ما تبعتوش اما انت لا ترحم ولا تخلي شكون يرحم
– وين عندي نخرجك ياخي ، بالكشي فاضي انا
– لصحابك والقهوة فاضي ، وللفيس بوك فاضي تتكوشخ من وحدة لوحدة وانا ما عندكش فضى مسيكن
– وقيلا بدى بنات فضيلة ايا توة نبدلك التلفزة واتفرج …
صن نار
- ثقافياقبل 3 ساعات
المنستير… النسخة الثانية من مهرجان “Monastir plays jazz”
- صن نارقبل 10 ساعات
الاحتلال يتأهب لاجتياح رفح
- رياضياقبل 10 ساعات
تطاوين عند وزير الرياضة
- راجل و سيد الرجالقبل 20 ساعة
“قرنيطة”
- صن نارقبل يوم واحد
شهيد ومصابان في غارة إسرائيلية جنوب لبنان
- جور نارقبل يوم واحد
ورقات يتيم … الورقة 26
- اقتصادياقبل يومين
تأجيل النظر في بيع المعامل الآلية بالساحل
- اجتماعياقبل يومين
وأخيرا… البدء في محاسبة قاتلي الجيلاني الدبوسي