. توة ولاوا الناس في المطر الكل تولي رومنسية وقال اشنوة نعشق المطر ونخرج للقهوة مع الفيالة ونشد كرسي بحذا البلار وتجي رعدة قوية وبالخوف تعنقني صاحبتي وتتحشى في حضني … وولات كلمة ربي يرحمنا يقصد بها رعدة اخرى ما اقوى

رومنسية قبل تختلف عليكم برشة راهي , قبل تصب المطر تتقسم العايلة الي يدز في الماء من وسط الدار باش ما يدخلش الماء للبيوت والي يلبس بوط وكبوط شمع ويخرج يحفر ساقية تولي مجرى متاع ماء للجنان باش نجموا ندخلوا للحوش والي يحل في منفس الماجل خير ما يتعبى و يطرشق ,

اما جماعة الربط فعلى حالهم لا تسال وقت تتبلع الزنقة باللبزة والماء والفوارة تولي تطلع في الماء من النقب الكل والي بكرتل يغرف في الماء من الميحاض والي ينقب في ساس البيت الي على الزنقة باش يخرج الماء من البيت والي في السطح يغلف في شبابك الفنار بالمشمع باش ما يهبطوش ماء ,

وبعد الحرب هذي في الجنان والا في الزنقة يخرجوا الصغار بالسرقة ويلوجوا على غديرة كبيرة وغارقة شوية وتولي حصة سباحة وزعمة زعمة نعاونوا في العباد الي تحب تشق البورة ونرجعوا للدار كيف الفلالس ويتم استقبالنا بهاكي الموسيقى الترحيبية المعتادة : وين كنتوا يرزيني فيكم راسكم عريان ولحمكم بالماء باش تتسوقطوا ونقعد نقالع فيكم برة يشويكم صحتي وفات في جرتكم ,

ويسخن بانو الماء على البابور ونهارتها غسيل الراس كنفور راهو الماء من الماجل باش انقصوا منو مادام ربي رحمنا , وتبدى رحلة جديدة متاع قرص وتشويش وكل قطعة تتحك في البدن تاكل ما كتبلها مع كلمتين سماح من نوع وليتوا زنزي ويديا تفركوا في جرتكم يفرك يديكم , شعرك باللبزة نحب نعرف منين جاتك يراك في اللبزة خلي نرتاح ,

وتقعد احسن لقطة هي اخرها وقت فاضل الماء الي في البانو يتصب عليك باش تشللك وتنشفلك لحمك وتلحق ما فاتها من قرصان وتشويش وتربطلك راسك بالبشكير وتقلك برة حط الميدة وشوف دروسك ونادي خوك يخويك ويرزيني فيك …

اما خير زعمة رومنسية قبل والا رومنسية توة ؟

اليوم هزان دبش سلسبيل بنت سجيعة جارة سلفت اخت مرتي ، طبعا العرس قريب ولازم نمشيوا خير ما نقعدوا حديث خاصة هوما جاونا في طهور شادي ولد رشيد حوانتي الحومة ، ايا قلت للصغار يحضروا باش نهزوهم قامت قاتلي راهم وصاوني بحبوا الكرهبة فارغة يطلعوشي معانا نساء يمشيوا لدار العروس …

لبست سوريتي المنورة الفاروزي ولبست مرتي قفطانها الوردي الي تسلفتو من مرت خويا وعملتلو عطفة بالمساك خاطر طويل عليها شوية وقصدنا ربي ودوب دخلنا زغردوا علينا الحق ومدولنا كاس روزاطة باردة تشره وكعبة بتي فور وقالونا نستناوا الكراهب يجيوا من دار العروس ، ايا احنا هكك وعم العروسة يحكيلي كيفاش جارهم من قبلة بنا على الثاني وسكر عليهم الهواء وطيح الطابية وحرمهم من كعيبة هندي ونسمعوا في الكراهب تزمر بيب بيب … وقالوا شكون مولى هاكي الكاترال يبعدها باش تدخل الكميونة الي ماشي تهز الجراري والبيبليوتاك والمسند.

ايا قمت كيف الناس الملاح وبعدت كرهبتي بعد ما ترحرحت مرتي القدام وجابت ثلاثة نساء معاها اخف وحدة فيها توزن 120 كيلو لين الكرهبة بركت طبست عليها قلتلها ياسر عليها الكرهبة راهو توة يطيبوا الامورتيسرات ، قاتلي بالله اسكت وانت ديما هكة قلبك على الكرهبة تقول ما كسبتها كان انت يصفى ما بجرالها شي وعيطت لمفيدة قالتلها ايجا ايجا ترص جنبي القدام كان ما لقيتش كرهبة وجات مفيدة …

ايا حكمت عليا نشد وراء الكميونة الي فيها المزاودي وما نخلي حد يدوبل علينا ، وفي كميونة المزاودي عاد البنات والاولاد يتشاطحوا ومرتي تخرج يدها من البلار تقول مركات بونتو والا هزينا البطولة وتقلهم قولولو يغني نلمو نلمو نحبو ونكره امو … ومفيدة تقول والله يشره جوهم وانا تحصرت هوني ومنكب راجلك في صدري قريب ينقبني وهي تقلها اصبر شوية اهو قريب نوصلوا ونسيت عاد نقلكم الي روبة مفيدة بالرشراش ووركها يحك في فخذي وسروالي ولى يلمع خرجتني كيف الرقاصة ،

ايا وصلنا لدار العروس واستقبلونا بالزغاريد وري ري ري وهبطنا وخلاونا الرجال في الفيراندا والنساء دخلوا يريڨلوا الدار وكل قطعة تتحط ري ري ري ري وجابونا كاس السيترون المحنون وكعبة ملبس ، ايا قلتلها اخرج نمشيوا شمازال قاتلي حتى نكمل معاهم حطان الدبش ، وانا نستنى تقريب النساء الكل خرجو الا هي خرجت اخر وحدة ، قلتلها بالله شخلاك لتوة قاتلي ماهم عطاوني القلاصن والبوسطوات نخليهم في قجر القلص والله يشدوا اليد ايا اخرج نمشيوا اوكة مادام شي ،

هكك وعيطت لهاكة الثلاثة قنابل الي جبناهم قاتلي نرجعوهم ياخي قلتلها هات نرجعوا مفيدة ما فيها باس وخليها جنبك قامت قاتلي مفيدة مشات مع الطيب ولد اختك خير خلينا بالخف هكة يفكو من شبايك البلاء الطيب ، قلتلها لا والله ما فيها باس كات قلتلها تجي معانا ربي يهديك … ورجعنا للدار عاد والعاقبة الافراح عندكم وكيف تستحقوني كلموني المهم نهز مفيدة معايا …

ماهو عاد كانت عطلة وسيدي رمضان ، قلت نصبح راقد فتيتة ونقوم نهبط كيف العادة ولا تقطعلنا عادة نعمل دورتي في بلاد العربي وسوق الحوت وبوشويشة ونعمل ضحكة على هاكة الناس المرمضنين الي على اي حاجة يعمل عركة ومشكلة وتتلم الحضبة وتكبر الحكاية وفرصة عاد لجماعة السطوشات الي يتحشاوا في الحضبة والنبي مولاك يبداوا يسترزقوا …

الحاصيلو نرجعوا وقت انا راقد ونسمع في صوت بسم الله المانع الستار تقول زلزال ونقوم مرعود نجري يا مرا شفمة ، قاتلي الحس جاي من فوق يا لندرا شبيهم لاباس دار محسونة الي فوقنا ، هكك ونخرج نطلعلهم ندق الباب وخرجلي جارنا الهادي مشمر يديه وقلي ايا تصوم بصحة البدن مرحبا بيك ، اما بدن قتلو وانا قمت كيف الفروج نرعش ، يا بلها ما عندكم سو ان شاء الله شنو ها اللطيخ عندكم ، قلي لباس هاكة ماهو خذيت قرنيطة خاطرني ثلاثين ليلة نحب التشيش بالقرنيط ، ايه عاد من حينك كركرت طاولة الكوجينة حيدتها على جنب واهة قاعد نخبط فيها اهو قريب نكمل التخبيط وبعد توة نكملها بعصاة البازين ونكسكسها …

ايا ريتو بلها جاري هو ياكل القرنيط وانا ناكل الفجايع على الصباح ، برة شعندنا فيه وبالشفاء انشاء الله تلقاه جبد قرض باش شراها ها القرنيطة اما المشكل شماشي نقول للموجيرة وها الحس شنو هو ، كان نقلها قرنيط توة تقلي قعدنا كان احنا بلاش وانت ما تاخذلناش وانا صايم موش ناقص تقرقير وزيد القرض الاول لتوة ما خلص باش نزيد قرض اخر للقرنيط ، ايا تعرفشي كيفاش قلها الهادي طاح في الكوجينة وهاكة الدبك خاطرو قعد يتسكك العزا ،

وكان الحديث هكك ، ولات وقاتلي تعرفشي كيفاش مالا توة صيام اما بعد شقان الفطر جيبلنا طرف بنان وتفاح هاكة متع كيلو اربعطاش نلف ونمشيوا نطلوا على الراجل هذم جيران ما فيها باس ، اكهو عاد لقيت حسبة البنان والتفاح تقرب لحسبة القرنيط وعلى الاقل ناكلوا انا موش بلها ياكل القرنيط ونزيدوا انا التفاح البنان ، قمت قلتلها تعرفشي هاكة الهادي يدق في قرنيطة واهو توة ناخذ كعبة حتى انا ونجي ندقها وشد دارك ها الليلة قلو تفاح وبنان