راجل و سيد الرجال
“شَرْيان”
نشرت
قبل سنة واحدةفي
من قبل
ياسين الرباعي Yassine Rebaï– يا بويا ابويا ، نحب عشرة لاف غدوة عندنا تكويرة
– لين زادة ياخي تلعبوا على الفلوس يا ابن الكلب والله لا تحشم
– اما فلوس ماهو حق التاران نكريوه وزيد بايي في دبابس الماء والقهوة
– اما تاران الي تكريه ، امشي للبورة وكور للصباح وهز معاك بيدون ماء من الماجل
– انت ماك نعرفك يا راجل كيف تكب السعد فرد مرة ، توة من دون اندادو ياخي ماهو اعطيه وخليه يلعب شلعزة ، وانا زادة حطلي فتيتة فلوس راهو مية والا مية وخمسين نلف ماشية للجم مع دلندة اختي نلقاشي زربية والا سربيس والا ثرية الي نلقى المهم حاجات لازمينا هذم وكل مرة ناخذ حويجة
– توة بالله زربيتنا شفيها وانت الي عطاك على الشريان والا ماعونا شبيه اما الثرية موش لازم هاك انت في الدار يزي تضوي خير من الف ثريا
– اح عيني وقيلا استهويت ، شوف ما ارطب حديثو في الباطل منين جاك ها الكلام السمح ، قولها لجماعتك متع الفيس بوك هذي يصدقوك اما انا اعطيني الفلوس
– راهو الكنترا واقفة وما فمش سلعة في الجم لوح خلي مرة اخرى وزيد والله زربيتنا سمحة كان تحب هزخبيها يجيناشي حد وفرشنا الكليم الي عطاتهولك امي
– شوف عاد شيقول ، كوسالة النمر السمحة لاختك والمرڨوم القروي لمرت خوك هاكي ماهي ترعش منها وانا بايي كليم الشوالق ، ارشقوا عليك هاكة ، بالله خليني ساكتة خاطر وقت تجبدلي عليهم لحمي يتفرك ويركبني ستين عفريت والا وقت جات من العمرة مدتلي سبحة وقرطاس بخور تقول مخصوصة ليهم انا وانت تجري وتجري معاها اما اختك القفطان العزيز الغالي جابتهولها
– توة شدخل الكلام هذا في مشيانك للجم ، برة امشي اوكة الثنية قدامك وتوة نخليلك الفلوس
– كهو غير نجبدلك انا ترجعني غالطة وزيد تقلي اوكي الثنية قدامك بعدلي تحب ترتاح مني عوض يقلي نمشي معاك ونهزك ، ايا ورحمة بويا لا مشيتها وخلي حتى نمشي مع سجيعة بنت عمي لتركيا اوكي في الصلاعة ماشية وتقرق بيا
– لا والله تركيا الكل في الجم وارخص لين ها المشي والجاي وتزنڨيل الدبش اهم مية وخمسين نلف وامشي مع دلندة وغدوة احد تلقاوا كل شي …
تصفح أيضا
ماهو عاد كانت عطلة وسيدي رمضان ، قلت نصبح راقد فتيتة ونقوم نهبط كيف العادة ولا تقطعلنا عادة نعمل دورتي في بلاد العربي وسوق الحوت وبوشويشة ونعمل ضحكة على هاكة الناس المرمضنين الي على اي حاجة يعمل عركة ومشكلة وتتلم الحضبة وتكبر الحكاية وفرصة عاد لجماعة السطوشات الي يتحشاوا في الحضبة والنبي مولاك يبداوا يسترزقوا …
الحاصيلو نرجعوا وقت انا راقد ونسمع في صوت بسم الله المانع الستار تقول زلزال ونقوم مرعود نجري يا مرا شفمة ، قاتلي الحس جاي من فوق يا لندرا شبيهم لاباس دار محسونة الي فوقنا ، هكك ونخرج نطلعلهم ندق الباب وخرجلي جارنا الهادي مشمر يديه وقلي ايا تصوم بصحة البدن مرحبا بيك ، اما بدن قتلو وانا قمت كيف الفروج نرعش ، يا بلها ما عندكم سو ان شاء الله شنو ها اللطيخ عندكم ، قلي لباس هاكة ماهو خذيت قرنيطة خاطرني ثلاثين ليلة نحب التشيش بالقرنيط ، ايه عاد من حينك كركرت طاولة الكوجينة حيدتها على جنب واهة قاعد نخبط فيها اهو قريب نكمل التخبيط وبعد توة نكملها بعصاة البازين ونكسكسها …
ايا ريتو بلها جاري هو ياكل القرنيط وانا ناكل الفجايع على الصباح ، برة شعندنا فيه وبالشفاء انشاء الله تلقاه جبد قرض باش شراها ها القرنيطة اما المشكل شماشي نقول للموجيرة وها الحس شنو هو ، كان نقلها قرنيط توة تقلي قعدنا كان احنا بلاش وانت ما تاخذلناش وانا صايم موش ناقص تقرقير وزيد القرض الاول لتوة ما خلص باش نزيد قرض اخر للقرنيط ، ايا تعرفشي كيفاش قلها الهادي طاح في الكوجينة وهاكة الدبك خاطرو قعد يتسكك العزا ،
وكان الحديث هكك ، ولات وقاتلي تعرفشي كيفاش مالا توة صيام اما بعد شقان الفطر جيبلنا طرف بنان وتفاح هاكة متع كيلو اربعطاش نلف ونمشيوا نطلوا على الراجل هذم جيران ما فيها باس ، اكهو عاد لقيت حسبة البنان والتفاح تقرب لحسبة القرنيط وعلى الاقل ناكلوا انا موش بلها ياكل القرنيط ونزيدوا انا التفاح البنان ، قمت قلتلها تعرفشي هاكة الهادي يدق في قرنيطة واهو توة ناخذ كعبة حتى انا ونجي ندقها وشد دارك ها الليلة قلو تفاح وبنان
ايا سيدي كل ليلة بعد الصلاة نمشي نعمل قهوة وندخل للدار ونلقى كل واحد لاهي في نوارو ، الي شادد تلفون وتدخل والا تخرج والله لا يفيق بيك والي منبر قدام التلفزة وغير تقول يمسيكم بالخير يقلك تي اسكت خلي نسمعوا ، ايا نعود نخرج وما يفيق بيا حد على الاقل ناخذ كلمة ونعطي كلمة في القهوة …
يا حسرة على رمضان وجو رمضان وتلفزة رمضان الي كانت تلمنا الكل اهي كاميرا خفية واهي فوازير واهم مسلسلات فكاهية وضحكة وتقلق تخرج للزنقة تلقى اولاد الحومة متلمدين وما تدخلوا الا ما يجي الطبال ، وتوة عاد دخلنا النصف الثاني ووقت نبداوا في الزنقة تشوف كان في الصواني ماشية جاية للكوشة والمتعدي والا المتعدية يهبط الصينية ويبدى يحلفلك تهز وتذوق ويقلك ايا شقولك في حلونا السنة ،
تذكرت اللمة قبل شقان الفطر وضربان المدافع هاكم متع المفتاح والمسمار وبعد نطلعوا للسطح ونستناوا المدفع الحقاني واول ما يضرب نهبطوا نتجاراوا بهاكي الغناية المشهورة : افطروا يا صايمين كسكسي بلحم بنين … والفاطر في رمضان الصوم عليه حرام …
عاد من حينك انا عايش في جو الزمن الجميل والنلفون يضرب نلقاها الموجيرة تقلي بالله وينك ياخي ما تشبعش من القهوة … يا بنتي ماني دخلت وقتلك انا خارج وقت انت لاهية بالفلوجة وقلة المعروف الي يعديوا فيها ، وترد عليا وتقلي ورحمة بويا لا ريتك ولا سمعتك ياخي انت وقتاش دخلت ، اهو حتى صغارك قالوا ما ريناهش ، خررف وبرة شوف عاد بشكون تستشهد ، بلازمة هاكم لاهم في الدنيا مبنجين بالتلفون ،
ايا ندخل ونمني النفس بشوية فطاير والا طشطاش عملتهم المرا نلقاها هي غمتني وقاتلي شلعزة ما تجيبلناش كعيبات فطاير في يدك انا والله لا لقيت وقت ملي خرجت وخليتني وانا في الكوجينة خلاف ريت المسلسل وخذاتني عيني مشوار وكلمت سجيعة اختي واوكي تسلم عليك …
– ابويا ابويا امانك هات الكومند نلوج على الماتش
– اما ماتش زادة ، برة يا ابن الكلب شد بيتك انت وخوك وشوف دروسك
– والله مريڨل ابويا قريت سياي وزيد ما عطاوناش قراية
– ايه حتى يعطيوكم محسوب ، ماهو اقرى وحدك ، ايا اقلب عليا وجهك تراه وخلي نشوف ها البرنامج قلك ماشي يجيبوا جماعة مجلس النواب خلي نشوف شماشي يقولوا
– بالله يا راجل ما كرهتهمش وما كرهتش خليقتهم جماعة السياسة وانت كل ليلة منبر قدامهم تقول شماشي يعملولك ، ايا اقلب عليا بنات فضيلة قلو نواب قلو دواب يعطيهم والله غداد
– ياخي لتوة ما وفى هو فضيلة ما اوسع بالك من الصيف وانت أتبع فيه ، المسلسل ما تقلقش منو اما كل ليلة تعملنا القمل وقت تاقف درجين في الكوجينة اطيب وتقول قلقت
– ماهو من سعدي الراقد نتبع فضيلة وبناتها لو كان جيت كيف النساء تخرجني وتحوس بيا ماهو راني ما تبعتوش اما انت لا ترحم ولا تخلي شكون يرحم
– وين عندي نخرجك ياخي ، بالكشي فاضي انا
– لصحابك والقهوة فاضي ، وللفيس بوك فاضي تتكوشخ من وحدة لوحدة وانا ما عندكش فضى مسيكن
– وقيلا بدى بنات فضيلة ايا توة نبدلك التلفزة واتفرج …
ويستمر النزيف… آلاف الأطباء والمهندسين والجامعيين يغادرون تونس
وفاة الفنان صلاح السعدني… وداعا سليمان غانم!
الاحتلال يواصل عدوانه على مخيم نور شمس
بن غفير يصف الهجوم الإسرائيلي على إيران بـ”الضعيف”
بعد اعتراضها على عضوية فلسطين بالأمم المتحدة… ماذا تريد واشنطن؟
استطلاع
صن نار
- اجتماعياقبل ساعة واحدة
ويستمر النزيف… آلاف الأطباء والمهندسين والجامعيين يغادرون تونس
- ثقافياقبل ساعتين
وفاة الفنان صلاح السعدني… وداعا سليمان غانم!
- صن نارقبل ساعتين
الاحتلال يواصل عدوانه على مخيم نور شمس
- عربيا دولياقبل ساعتين
بن غفير يصف الهجوم الإسرائيلي على إيران بـ”الضعيف”
- صن نارقبل ساعتين
بعد اعتراضها على عضوية فلسطين بالأمم المتحدة… ماذا تريد واشنطن؟
- صن نارقبل ساعتين
طهران… مفاعل ديمونا ليس من ضمن أهدافنا!
- صن نارقبل ساعتين
استمرار الهجمات المتبادلة بين الكيان وإيران… وقصف أصفهان
- من يوميات دوجة و مجيدةقبل 12 ساعة
حميدة في ساتت كرش